یاندیریر ایچیمی یوخلوغون قات-قات
سن دئمه اوره‌ییم سویوق ترپه‌نیر!
سون باخیش یادیمدا ائله قالییب کی
ایندی ده اوره‌ییم بیردن اورپه‌نیر
بو سئوگی، بو ایستک، نه دیر بیلمیرم
مین دیلک، ایچیمده دؤیونور سنی
یاغیرسان، گؤزومدن سنی سیلمیرم
داملالار آخدیقجا، بوغدورور منی
تانریسیز! تاپدالا، از بو سئوگینی!
ازیلمیش دویغوما یازیغیم گلیر
سن باشقاسیلا گز بو سئوگینی!
هر شئیین سونوندان آجیغیم گلیر
سون گولوش، سون باخیش، بیرده کی اؤلوم،
بس نییه چکیلمیر حیاتیمیزدان؟
سن ده کی قاتیلدین سون‌لارا، گولوم!
آسیلدین چیرپینان ساعاتیمیزدان
بیر داها من‌ایله دانیش، سئوگیلیم!
یاشامیم بیر آنی سنسیز اولماسین
یازدیغیم قوشوغو دینله، سئوگیلیم!
ائشیدن قولاغین دین‌سیز اولماسین
سانما کی بو یوللار گولور اوزونه
قارانلیق گیزله‌نیب دوراقلاریندا
آسلانیب دره‌لر ساختا دوزونه
گولومسه، قوی آخیم دوداقلاریندا!
بیلیرسن یوللاری نه‌چون چکیبلر؟
یالنیزجا یارانیب، گتیرسین گولوم
آیریلیق یولونا اؤلوم تیکیبلر
«یانغین»ام سؤنسم ده قالاجاق کولوم...
🖌 #اسماعیل_سالک_یانغین
@telnazsheir 💚
