من باب المراد ــ اتمنـه ادخل حضرتك
من باب المراد ــ اقره يموسى ازيارتك
حلمي ياموسى الوحيد
اكنس ابصحـنك اريـــد
****

اطلب استـــإذان ودخــل يا امــامي
أوگف استعــــــداد ادّيلك ســـــلامي
من مصابك كون جرح اعيوني دامي
حتى يحلى اويــــاك يالكاظم كلامي

ملجومـه الگوب ــ ياموسى جرحك موسهل
ملجومه الگلوب ــ يالشيعــــــــــوك ابلا أهل
يالعشت عمـرك وحيد
اكنس ابصحنــك اريد
****

عـن بعـد مــــولاي لوشفت المناره
روحـي ترتــاح واضل اقره الزياره
إليحبـــك منـك ايحصل وقـــــاره
فايز ابيوم الحشر كون انته جـاره

منك يمــــولاي ــ الحاجه آخــــــــذهه وأرد
منك يمــــولاي ــ بجفوفي احس خضّر ورد
كلبي يالكاظم سعيد
اكنس ابصحنك اريد
****

اگعد اباب الجزاء واخذ جـــزائي
ماتردني واعـــــرف اتقــدر ولائي
والدليل ابكل وكـت هذا انتمــائي
كاضميـــــاً حيــــــدرياً كــــربلائي

مهيوب اضل دوم ــ وشعر أبواهس خدمتي
مهيوب اضل دوم ــ وبحبك ارفــــــع هامتي
والله عنك ما احــيد
اكنس ابصحنك اريد
*

يلي ماسديت بابك عـن ضيوفك
والله يالكاظـم اموت وما اعوفك
كل وكت اتعـنه مــولاي واطوفك
حيل يرتـاح الگلب لمن أشــوفك

شايل ألك شوگ ــ كثـر النجـــــوم ألبسمه
شايل ألك شوگ ــ شوگ الحسين الفاطمه
ابگلبي گاعد مو بعيد
اكنس ابصحنك اريـد
*

ادگ بــاب القبــله بجفوفي وانادي
جيــت يابن جعفــر انطيني مرادي
يا شهـيد اليــوم الك اعلن حـدادي
يالگضيت اسنينك ابسجن الأعادي

كلك كـــــرامات ــ يالما تفشــــل شيعتك
كلك كـــــرامات ــ واليـوم اجيت الگبّتك
اي وحق يوم الوعيد
اكنس ابصحنك اريد
*

الخادم
كامل السعيدي