ننحب والمصيبه الكاظميه
تذكِّرنه ابمآسي الغاضريه
نهمل دمعة العين...الموسى وجدَّه الحسين
وانواسي الزچيه

عله الگَضَّه العمر ليل ونهار اينوح
يضل دمع النواظر كل وكت مسفوح
من نذكر غربته وجسمه كله اجروح
تاخذنه المصيبه الغربة المذبوح
السجين امصيبته تحرگ بالگلوب
لاچن هَوِّناهه الثوبه مسلوب
ابگلبنه الليله نارين...الموسى وجدَّه الحسين
وانواسي الزچيه

عالمسموم ننعه ونهمل العبره
واجروح السجن عشناهه بالحسره
موسى اعله الجسر وانفجعت الزهره
ويلي اشحالهه اعله الطاح عالغبره
شالوهه الجنازه اربع حماميل
بس ضل الغريب الداسته الخيل
نبچي اعله الغَرِيبيَن...الموسى وجدَّه الحسين
وانواسي الزچيه

بالدَّلاَّل نار الهظم تِتوَجَّر
من نذكر مصيبة موسى ابن جعفر
نسوِّيله نعش والرافظه تحظر
ونبقه انصيح واويلاه يبو الاكبر
ثلث تيام ضل روح الزچيه
عاري ابلا دفن فوگ الوطيه
الليله انقسم الونين...الموسى وجدَّه الحسين
وانواسي الزچيه

أهله ابعيد عَنَّه ومِنَّه محرومه
وصفت مثل العليله اجروح معصومه
والدهه وعليهه انگطعت اعلومه
يرد يمته وگلبهه تنجلي اهمومه
اهواي الوالد اتأخر عليهه
ماتدري ابسجن مَيِّت وليهه
تجرح كلمة الوين...الموسى وجدَّه الحسين
وانواسي الزچيه

يذكِّرنه الرضا ابيوم الحظر يمه
ابعلي السجاد وَيَّه حسين ابو اليمه
الكاظم غَسِّلاه ابنه الرضا او شمَّه
والسجاد ابوه اموذَّر ايلمَّه
تعنينه ابجرحنه ابهالمسيه
وللمهدي نصيح ابكل عزيه
نبچي اوياك كل حين...الموسى وجدَّه الحسين
وانواسي الزچيه

سيد علي الموسوي