قصيده لدفن جسد الامام الحسين عليه السلام 2020
سليل المصطفه الهادي شهيد الغاضريه
صريع بلا دفـن دامي عله تراب الوطيه
صحت بويه وشبگته
شلت جسمه ودفنته
شهيد الغاضريه. شهيد الغاضريه
.......................
بلا دفــن ظل عله الارض. تسفي الرياح بنحره
مطبوگ صدره عله الظهر. بالخيل سحگو صدره
الـف وتسعـمـيّــة جــرح. مابين طعنه وطبره
ردّيـت مـن درب السبـي. ادفن حبيب الزهره
بحصيره لملمت جسمه توذر قطعه قطعه
احوم ودمعتي بعينـي ادوّر عـن اصبعه
الگبر بيـدي حفــرته
شلت جسمه ودفنته
شهيد الغاضريه. شهيد الغاضريه
....................
شحال اليشاهد والده بحرّ الشمس جثمانه
آنه العليــل المنفـجــع فـاگـــد هله وخوانه
شاهدت جثّة والـــدي. سابحه بدم شــريـانه
وعضائه كلـها مگطّعَـه. هـذا العشـت بحضـانه
أنه السجّـــاد بچفوفي. شلت جثّة حبيبي
ابويه الاغله من روحي ادفـنّـنـه بنحيبي
عله التربـــــان شفته
شلت جسمه ودفنته
شهيد الغاضريه. شهيد الغاضريه
....................
خلّيت جسمــه باللحِـد. وتمددت وي جسمه
ماعنده راس امن النحر. ودّعــت ابويه بشَمّه
يحسين بويه بفـرگتك. دنياي وحشه وظلمه
گد ما بچيت عله النحر نحره انغسل من دمه
صحت ياربي ساعدني ابويه شلون ادفنه
عجيبه ومانفذ صبري أنه السـجّـــاد ابنه
أنه المـايــوم عفتـه
شلت جسمه ودفنته
شهيد الغاضريه. شهيد الغاضريه
....................
لن صوت من جوف النحر السجاد يبني يگلّي
لا تنسه يبني عله الصدر. يوليدي وسّد طفلي
عبدالله عطشان انذبح وبالدم تخضّب مثلي
وسده عله صدري ياعلي يبرد دليــله اليغلي
الرضيع بصدره وسّدتّه مثل ماراد منّي
دفنت حسين بچفوفي. يويلي وزاد ونّي
ترابه بأيـــدي هلّتـه
شلت جسمه ودفنته
شهيد الغاضريه. شهيد الغاضريه
....................
من بعد دفنة والدي. ادفنت الصحابه الاطهار
واولاد عمي وخّوتي وجملة عمامي الابرار
وعالمشرعه عمي الگمر. شبل الأمين الكرار
بيدي حفرت گبر الوفي واريته عمّي المغوار
رجعت لعمّتي زينب بچت لمن لگتني
ابوك حسين يوليدي دفنته سائلتني.؟؟
صحت امرچ سمعته
شلت جسمه ودفنته
شهيد الغاضريه. شهيد الغاضريه
سيد زيد الفحام
@zaidzai_______________________________
