Faqat intellektual o’yinlar haqida

Marafondagi apellyatsiya haqida

Apellyatsiya — bu, xohlaymizmi, xohlamaymizmi, hissiyotli jarayon. Chunki ba’zan kimlar uchundir hayot-mamot masalasi bo‘lishi mumkin.

Hissiyot aralashgan joyda esa adekvatlik yo‘qoladi. Ko‘zingizga hamma dushman ko‘rina boshlaydi. Miyangizga turli konspirologik qarashlar o‘rmalaydi. Falonchi atayin qildi, o‘zi u azaldan shunaqa odam va h.k. Balki rostdan rad qilib to‘g‘ri qilgandir, bizning apellyatsiya asossizdir, deb o‘sha paytda o‘ylamaysiz (keyin sovuq miyada tushunasiz, balki keyin ham tushunmassiz).

Yoki aksincha, ba’zan ikki karra ikki to‘rt bo‘lib turgan joyda navbatchi jamoa a’zolari ko’zini lo’q qilib, "yo‘q, bu besh" deganda, boshingni qaysi devorga urishni bilmaysan.

Bilimdonlarning intellektual o‘yinlarga qarashi har xil. Qaysidir jamoaning omadi keladi — bag’rikeng va mantiqni ustun ko’ruvchi jamoadan ochko oladi. Qaysidir jamoa esa qattiqqo’l va mantiqni emas, faktni ustun ko’ruvchi jamoadan xuddi shunaqa holat uchun ochko ololmaydi.

Shu sababli navbatchi jamoaning o‘zi o‘z paketiga apellyatsiya qabul qilishi noto‘g‘ri, deb o‘ylayman. Bu kutilmagan nizo, o‘zaro munosabatlarda dilxiralikning oldini oladi.

Yoki aksincha, tanish-bilishchilik, qarzdorlik hissi degan narsalar ham bor. Masalan, kechagi marafonda Farrux Rafiqov jamoasi bizning apellyatsiyamizga ochko berdi. Rad qilishi ham mumkin edi, "bu iborani falon odam aytmagan" deya. Lekin unaqa qilishmadi. Bizning navbatchilikda esa Farrux aka apellyatsiya bilan chiqdi. Ochiq aytaman, ularga ham shunaqangi ochko bergim keldiki, asti qo‘yaverasiz. Qarzdorlik hissini qaytargim, menga qilingan yaxshilikka javob bergim keldi. Hatto bir muddat o‘sha apellyatsiyaga ochko berish uchun jamoadoshlarimni qanaqa ko‘ndirsam ekan, deb o‘ylab ham qoldim😃 Yakunda ochko bermadik (Farrux aka, chin dildan uzr lekin, haliyam xijolatdaman).

Xullas, kirish qismi cho‘zilib ketdi, taklifga o‘tsam.

1) Marafon uchun alohida apellyatsiya hay’ati shakllantirilishi kerak. Shunda hamma jamoa uchun bir xil sharoit yaratiladi. AH yomon bo‘lsa, hammaga yomon, AH yaxshi bo‘lsa, hammaga yaxshi;

2) AH a’zolari onlayn ishlasa ham bo‘ladi, faqat asosiy sharti o‘sha kuni ular ham kun davomida doim aloqada bo‘lib, marafon o‘tishi kerak;

3) Vaqtni tejash uchun texnik apellyatsiyalar (so‘zma-so‘z bir xil yozilgan❗️) og‘zaki, boshqa har qanday apellyatsiyalar yozma (elektron) berilishi kerak;

4) Har tur yakunlangandan keyin yozma apellyatsiya berish uchun jamoalarga 15 daqiqa vaqt beriladi. Og‘zakida ham turlar orasida taxminan shuncha uzilish bo‘lmoqda;

5) Yangi tur boshlangach, avvalgi tur uchun apellyatsiya yozib bo‘lmaydi;

6) AH o‘yinlarga parallel ravishda o‘z verdiktlarini chiqarib boraverishadi. Agar topilgan savollarga ochko berish tizimiga o‘tilsa, muammo ham bo‘lmaydi, shunchaki ochko qo‘shilib ketilaveradi. Agar reytingli tizimda qolinsa, unda AH qarorlaridan keyin tur natijalarini qaytadan hisoblab chiqishga to‘g‘ri keladi;

7) Bo‘lgan va bo‘lmagan apellyatsiyalarni qalashtirib tashlamaslik uchun har bir jamoada 5 ta apellyatsiya berish huquqi bo‘lishi kerak. To‘g‘ri, bu bir hisobdan adolatsiz cheklovdek ko‘rinishi mumkin. Lekin birinchidan, ko‘plab sport turlarida ham chellendj so‘rash huquqi cheklangan bo‘ladi. Bu normal amaliyot. Ikkinchidan, 5 ta huquq ham kam emas. Menimcha, bu jamoalarga bemalol yetadi. Va bu jamoani tavakkal apellyatsiya berishdan ham qaytaradi.

Agar juda bu miqdor kam deyilsa, unda ochko berilgan, ya’ni qanoatlantirilgan apellyatsiyalar shu 5 ta ichiga kirmaydi, deyish ham mumkin. Ya’ni jamoalarda 5 ta asossiz apellyatsiya berish huquqi bo‘ladi. Asoslilari esa cheklanmaydi.

8) Apellyatsiya jarayonini tashkil qilish uchun NNTdan bitta neytral xodim biriktiriladi. Uning ishi eng avvalo kelib tushgan apellyatsiyalarni qog‘ozdagi javob varaqalari bilan tekshirish va haqiqatdan jamoa shunaqa javob berganini tasdiqlash, apellyatsiya matnlarini AHga yetkazish va AH qarorlarini jadvalga kiritish bo‘ladi.

Yana nimadir qolib ketmadimi? Bu ham shunchaki takliflar, yanada takomillashtirish mumkindir balki.

@zakovatklubi

Intellektual marafon hisoblash tizimi yuzasidan taklif

Eng avvalo alohida ta’kidlashim kerak, har qanaqa hisobda ham bizning jamoa 4-o‘rinda qolar ekanmiz, ya’ni biz uchun hech narsa o‘zgarmasdi. Shu sababli marafon g‘olibini aniqlash tizimi haqida xolis fikr bildirishim mumkin.

Kim bilimda kuchli ekanligini aniqlashning eng optimal va eng adolatli usuli yo‘q. Barcha hisob tizimlarida o‘ziga xos kamchilik va yutuqlar bor. Ayniqsa, kuchlari teng jamoalar soni ko‘p bo‘lsa, bu yanada seziladi.

Ammo baribir nisbatan yaxshisini tanlash kerak, bu dunyo nisbiylikdan iborat.

Menimcha, marafon kabi turnirlarda topilgan savollar soniga qarab g‘olibni aniqlash nisbatan adolatliroq bo‘lar edi. Chunki hozirgi reyting tizimi juda va juda ta’sirchan bo‘lib, topilmagan atiga 1 tagina savol hammayoqni ostin-ustun qilib tashlayapti. Aniqki, bu adolatdan emas.

Eslasangiz, dastlabki marafonda reytingga emas, aynan topilgan savollar soniga qaralar edi. Unda bu tizimdan nega voz kechilgan? Asosiy maqsad — agar topilgan savollar soniga qarab baholansa, jamoalar atayin o‘ta qiyin (grob) paket ko‘tarib kelish ehtimoli oshadi. Ya’ni o‘zining navbatchiligida raqib jamoalari kamroq ochko to‘plasa, unda bu o‘sha navbatchi jamoaning g‘olib bo‘lish ehtimolini oshiradi. Mana shu mantiq asosida reyting tizimi joriy qilingan.

Men yana savollar soniga qarab g‘olibni aniqlash tizimiga qaytishni taklif qilish bilan bir paytda, mana shunday sun’iy o‘ta qiyin (grob) paketlar ko‘tarib kelinishining oldini olish (riskni sug‘urtalash) bo‘yicha ham ayrim takliflarimni aytmoqchiman.

Menimcha, buning eng oson yo‘li — o‘ta qiyin (grob) tur natijalarini butunlay bekor qilish bo‘ladi. Paketning o‘ta qiyinligini qanday baholaymiz? Albatta, bu ham nisbiy baho bo‘ladi, ammo boshqa ilojimiz yo‘q.

Bunda quyidagi natijalardan qaysidir biri qayd etilsa, o‘sha tur natijasi to‘liq bekor qilinishi kerak:

1) tur davomida barcha jamoalar tomonidan umumiy topilgan savollar soni 25% dan kam bo‘lsa;

2) tur davomida birorta jamoa 5 va undan ko‘p ochko ololmasa;

3) tur davomida umuman ochko olmagan jamoalar soni 10% dan ortiq bo‘lsa.

Mana shu 3 ta holatdan ISTALGAN BIRI qayd etilsa, unda o‘sha tur o‘ta qiyin (grob) paket hisoblanib, natijalar to‘liq bekor qilinadi va hisobga olinmaydi.

Ushbu turda navbatchilik qilgan jamoaga esa musobaqa davomida bitta turda to‘plagan o‘rtacha ballari miqdorida jarima ochkolari qo‘llaniladi. Nega deysizmi? Chunki o‘sha tur natijasi bekor bo‘lsa, o‘ta qiyin paket ko‘tarib kelgan navbatchilik jamoa mazza qiladiku. Raqiblarining birortasi ochko ololmagan bo‘ladi. Shu sababli ham albatta o‘sha jamoaga jarima ochkolari qo‘llash kerak bo‘ladi.

Masalan, kechagi marafonda ushbu mezonlarga tushadigan birorta paket bo‘lmadi. Eng yaqin kelgani "Metaverse" jamoasi paketida bo‘ldi. Birorta jamoa 6 ochko to‘play olmadi (yettida jamoada 5 ochko bo‘ldi) va tur davomida topilgan savollarning umumiy foizi 26,7 foizni tashkil qildi. Ammo bular natijalarni bekor qilishga asos bo‘la olmaydi.

Xullas, shunaqa takliflar. Siz bunga nima deysiz?


@zakovatklubi

Assalomu alaykum.

"Zakovat" hayotimning allaqachon ajralmas qismiga aylanib bo‘lgan. Buning hayron qoladigan yeri yo‘q, chunki klubga a’zo bo‘lganimga 20 yil bo‘ldi. Bu esa umrimning yarmidan ko‘pi "Zakovat" bilan o‘tib kelmoqda degani.

Menda klub faoliyati haqida fikrlar, takliflar, mulohazalar ko‘p bo‘ladi. Ammo ularni qayerda aytishni bilmayman. Katta kanalimda (@xushnudbek) ham, o‘ta shaxsiy kanalimda ham (@xushnudbekuz) "Zakovat" klubi faoliyati bilan tanish bo‘lmagan insonlar ko‘p, shu sababli klubning ichki hayotiga oid ba’zi postlarni ular umuman tushunmasligi mumkin.

Shu sababli faqat "Zakovat"ga oid manbaga ehtiyoj sezildi. Yuragingni kimga ochib-sochishni bilmaysan, deydiku :)

Bu kanalni keng omma oldida reklama qilib o‘tirmayman. Qancha kam odam kuzatsa va o‘sha kamchilik faqat intellektual o‘yinlar olamidan bo‘lsa, men uchun shuncha yaxshi.

Xullas, son-sanoqsiz bekorchi kanal va guruhlardan charchagan qadrdonlar, xush kelibsiz, yana shunaqa bitta bekor kanalga 😉

Hurmat bilan,
Xushnudbek.

@zakovatklubi