@BeshiKurdiZanistgayKurdistan
...
پەڵە ھەورێکی چڵکنە
گرتی سووچێکی ئاسمان
گەڵای زەردی دارێک وەری
زریان بردی بەرەو نەمان
...
ھەوا بوولێڵە، ئاو لێڵە
گوڵ سیس بووە، گەڵا زەردە
تەنانەت ڕەنگی گۆڕاوە
ئەم دیوار و دار و بەردە
...
«بەڵێ ھەن و یەکجار زۆرن
بازرگانی فرمێسک و خوێن
بەڵێ ھەن و پێدەکەنن
بە سەر بە ھەش، بە مل بە کوێن
...
بە ناڵە، بە کوڵ، بە گریان
بە سینگ کوتان، بە ڕوو ڕنین
بە بەرگی ڕەش، بە چاوی سوور
بە گۆڕخانە، بە کۆڕی شین
...
بە نووکە نووکی بێوەژن
بە ھانە ھانی ماندووان
بە زیڕەزیڕی منداڵان
بە نووزەی نیوە زیندووان
...
بە نەڕە نەڕی جەللادان
بە قرمە قرمی شەست تیران
بە ویڕە ویڕی قەمچییان
بە ئەشکەنجەی ڕووناکبیران
...
دەبا خوین بێ و سەران بەرێ
چەرخی کارگەیان بگەڕێ
پێدەکەنن، پێدەکەنن
بە بڵێسەی ئاگری شەڕێ»
...
گوتم: «کەوابوو، ئاشنا!
بەشی ئێمە لەنێو چوونە»
گوتی: «نا،نا، دوور بنواڕە،
دوور بنواڕە، ئاسۆ ڕوونە.»


مامۆستا هێمن (۱۳٦۷-۱۳۰۰)
بەشێک لە شیعری «ئێوارەی پاییز»