თეატრის გაფიცული ხელოვანები რედიქს ჯგუფის დამფუძნებელს და გენერალურ დირექტორს ლაშა პაპაშვილს, რომელმაც BMG-ის ეთერში ბიძინა ივანიშვილზე თქვა, რომ "ის უკვე შევიდა ისტორიაში, ქვეყანას აარიდა ომი" განცხადებით მიმართავენ.

გაფიცული ხელოვანების, კერძოდ კი, პრემია დურუჯის ლაურეატების თქმით, ლაშა პაპაშვილის მიერ დაარსებული პრემია დურუჯი წლების განმავლობაში ერთ-ერთი უმნიშვნელოვანესი კულტურული ღონისძიება იყო და აღნიშნავდა სეზონის საუკეთესო თეატრალურ ნამუშევრებს, თუმცა აღნიშნავენ, რომ მისმა "მოძალადე რეჟიმის გამამართლებელმა განცხადებებმა სრულად გამოაცალა პრემიას ყველა ღირსება".

პრემია დურუჯის ლაურეატები ამბობენ, რომ უკან აბრუნებენ ჯილდოებს, რომლებიც პრემია დურუჯის ფარგლებში ამ წლების განმავლობაში მათ ნამუშევრებს მიენიჭათ.

ამასთან, აცხადებენ, რომ პრემია გულისხმობდა ფულად ჯილდოსაც, რომლის ეკვივალენტსაც ახლა გაფიცული კოლეგების დახმარების ფონდში გადასარიცხად აგროვებენ.