Рондель-1

Капалак – муҳаббат учқуни,
юракдан гул сари ўрлаган,
гулдан гулга учиб ва қўниб
ўргимчакдай боғни тўрлаган…

Капалак – муҳаббат учқуни,
у теккан гул ёнар - қирмизи
бир кунми, икки кун, уч кунми
боғни кўмар юракнинг изи.

Ўргимчакдай боғни тўрлаган
капалак ўчмайди… қон каби.
Муҳаббат кўз очиб кўрмаган
бир ёнғин рўй беради, сабил!

Бир кунга, икки кун, уч кунга
капалак боғларда ўйнайди.
Шамоллар тегади учқунга,
кўнгил ўчкизгани қўймайди.

Капалак – муҳаббат учқуни…


Каналга обуна бўлинг👇
https://t.me/fahriyor_poet