الشاعر حسين صادق العقابي

قصيدة للامام الكاظم ع

رساله. من طوامير السجن
رساله. انكتبت بدمعه وحزن

ابتدت بالحمد لله والشكر
تحچي عن موسى ابن جعفر والصبر
رساله. رساله

.........................

الصبر مفتاح الفرج. واليصبر الله يعينه
يتحمل آلام وغصص. ودوم الدموع بعينه
الموت ارحم من سجن. بالضيم تكضي سنينه
والمنسجن تحت الارض. نتعجب مكيدينه

دعائه. من كلب ينكط دمه
دعائه. يوصل لسابع سمه
الليله ياقصة عذاب المنكسر
تحچي عن موسى ابن جعفر والصبر
رساله. رساله

........................

اول رساله من گلب. يشكر الباري هوايه
صار السجن مسجد اله. واعبايته مصلايه
لسانه رطب من الذكر . أيه وتگود بآيه
الطاموره بالكاظم صفت. كبه ومناره ورايه

صلاته. رغم كيده بكل وكت
صلاته. دوم وي روحه اخت
والصلاة الكلهه روحيه الفجر
تحچي عن موسى ابن جعفر والصبر
رساله. رساله

..........................

من القصر جابو جاريه. للسجن وبلاحشمه
وتوقعو بيها الذنب. يتغلب اعله العصمه
لكنها صارت عابده. ومتحجبه ومتعلمه
وصلَّت ورا فرض الستر. ودلاهه درب النعمه

حياته. رغم جدران الحبس
حياته. النه بيها چم درس
سنين عمره لله خلاهه نذر
تحچي عن موسى بن جعفر والصبر
رساله. رساله

........................

من سدو ابواب السجن. كلبه فتح بيبانه
ودوم التسامح والعفو. ما يوكع من لسانه
اول سجين بهيبته. حيَّر عقل سجانه
السجان يبچي بكل فرض. كلما سمع آذانه

صفاته. الرحمه والحب والعدل
صفاته. يفرح بلم الشمل
الشيعه باچر بانتظاره اعله الجسر
تحچي عن موسى بن جعفر والصبر
رسالة. رسالة

..........................

كل محب واكف عالجسر. وبالامل ينتظرونه
اليتلاگه وي وجه النبي. بشوفته يكحل عيونه
لكن اجه بوسط النعش. وبس اربعه يحملونه
هذا إمام الرافضه. صاحو لليحبونه

نهايه. للظلم ولكل الم
نهايه. المهدي لو شال العلم
رايته ترفرف بثارات ونصر
تحچي عن موسى بن جعفر والصبر
رسالة. رسالة

………..

نسألكم الدعاء
حسين صادق العقابي

قصيدة بين صاحب الزمان عج والسيدة زينب ع

تتعثر نبضاتي بكلبي من اذكرهه
آيا زينب آ يا كسرة خاطرهه
غريبه. يزينب. غريبه يزينب.
....................

بدموعي. اذكرهه. اذا اسمع. اسم زينب. يبچيني
منو مثلي. سبو عمته. بهزيل النوك. تطب للسوك. تأذيني

أنه الماتنعد جروحه ولا تلتام
يوم المالت الدنيا بسبايا الشام

آنه المهدي الشلعو كلبه بعماته
وشابع ضيم من الطف ومن شماته
غريبه. يزينب. غريبه يزينب

.....................

بالعاشر.. شافوهه.. بظهر طلعت.. من الوادم..خجل ماتت
تعبانه.. وتتعثر..والم بيهه.. وعله اخوتهه..شكثر صاحت

تدير العين وحدهه بمصيبتهه
ومن كثر الدمع ثكلت عبايتهه

تتعثر مو خوف ام عون بمشيتهه
مستحيه امن عيون الوادم شافتهه
غريبه. يزينب. غريبه يزينب

.........................

محتاره.. وحدهه.. ويتامه هواي.. بلايه فياي..بوسط هيمه
شيلمهم.. والوادي.. بلايه حسين.. ولاعباس..ولاخيمه

ومنضر للشمر خله السهم بالعين
اجه الزينب يكلهه هذا راس حسين

تشوفه اينكط دم من نحره وشيباته
ميت بس عيونه تصد لبنياته
غريبه. يزينب. غريبه يزينب

.........................

مشوهه.. والحادي.. اجه وجايب.. لديهه احبال.. ويحاجيهه
اخوانج.. يازينب.. اعله روس ارماح.. وحجي الذباح.. شمت بيهه

وصاحت عازتك عازه يبو فاضل
عكب عينك يبو الخوه الحمل مايل

تحجي وتبجي وعباس بكل احساسه
كل ما صاحت خويه ايفز جرح براسه
غريبه. يزينب. غريبه يزينب

..........................

قصتهه.. وغربتهه.. تشيب الراس.. وعشت كل يوم.. وجع روحي
واسوني.. بمجلسهه.. يخدامي.. الحزن والنوح.. دوه جروحي

أنه الماغمّضت عيني وجفن مانام
الفرج كلش قريب ادعولي يالخدام

ترجع كل زوار ام عون الحضرتهه
وبراية عباس انشف دمعتهه
غريبه. يزينب. غريبه يزينب

……….

نسألكم الدعاء
حسين صادق العقابي

يا دمعة الزمان. يازينب الغريبه
كلبچ اذا يموت. يغفه اعله چم مصيبه
ضلع انكسر. راس بجرح. سايل
چبد انمرد. راس برمح. مايل

.........

ينكضي حزن الليالي. وتنشف دموع. وجوّه الضلوع. توكف الشهكه
الله يرحم كلب زينب. بخنكة فراك. عاش مشتاك. بعازة الملگه

من الزمان اشايفة. ليش روحچ خايفه. بكلبچ اچم سالفه. ادور اعله حسين

منهو كال شلونچ. الوكت غير لونچ. معلمات. عيونچ. ادور اعله حسين

يلميته من زمان. يادمعة الليالي
الهه شبگه يموت. يالماخذ الغوالي
الزهره. وعلي. حسين وابو فاضل

..........

يلكضت زهرة شبابچ. لو جرح طاب. يبتدي مصاب. يهدم بحيلچ
تبچچي ياقصة عذابچ. كلب مشلوع. سوالف دموع. الحزن يحچيلچ

صرتي دمعه وسايله. بدنيا صارت مايله. خذت زلم العايله. وحيده ظليتي

عشتي اصعب فتره. بين ضلع الزهره. واللي رضو صدره. وحيده ظليتي

يتوقف الكلام. مايوصف المصايب
فاركتي چم امام. والاخوه والحبايب
چدمچ. مشه. شلون. وبلا كافل

.........

كلهه صعبه اعليچ مرت. لكن حسين. شخله بالعين. بيوم صحتيله
كام بس طاح اعله وجهه. من نخيتي. انداس بيتي. عود تشكيله

طاح فوك سهامه. سمع صوت ايتامه. وهجمو اعله خيامه. وينظر الحاله

صاح اخو بحساسه. مافزع عباسه. والكطع انفاسه. عشره خياله

عينچ عله الذبيح. عاري عله الوطيه
كلچ اظن تعاي. وكلتيله هاي اديه
كيد بحبل. راسي بخجل. نازل

.......

شكد هضيمه انتي انسبيتي. حرتي بمرچ. شكال كلبچ. وبسمچ يصيحون
شظل الچ فوك الشريعه. كلب ذابل. لو بوفاضل. لو نسيتي عيون

شكد اله مشتاكه. الصعدچ عالناكه. شلونه جرح فراكه. ماأظنه يطيب
من نظرتي حبالچ. شنهو صار ابالچ. ياجرح كفالچ. ما أظنه ايطيب

تشوفينه عالرماح. محني وخجل يشوفچ
كلفه عله الغيور. ينظر حبل چفوفچ
هواي اعتذار اعله الرمح شايل

.........

ياسلام الله اعله كلبچ. عله متونچ. دمع عينچ . هاكثر أذوچ
انتي محد شاف طولچ. الچ متلوگ. طبة السوگ. وبحجر صابوچ

چنتي مامعروفه. وصاحو اهل الكوفه. بت علي مچتوفه. اه يازينب
ولا اخو بي جيه. بيدچ انتي مغطيه. وجهچ ومستحيه. اه يازينب

بدمعي يظل قصور. للكل مسيه ينحب
بس صاحب الزمان. بكلبه اشجره يزينب
صبح ومسه دمعه دمه. هامل

........

منهو كال بيوم موتچ. ماكو ذرعان. ماكو خوان. بكطعة الانفاس
الله منطيچ اعله نيتچ. بموتچ حسين. غمض العين. وشيعچ عباس

خلصي من احزانچ. الدنيا موش امجانچ. روحي ويه اخوانچ. فاطمه اتاني
روحي نشفي دموعهه. وشاهدي موضوعهه. البچي اذه ضلوعهه. فاطمه اتاني

ارتاحي هالحياة. ماتسوه بس اذيه
كضيتي هالسنين. يوميه غاضريه
المثلچ اذيه لا ميستاهل

.........

نسألكم الدعاء
حسين صادق العقابي

قصيدة لصاحب الزمان عج

امنيات. عله طول سنيني كاتبهه بدمع
امنيات. بكثر نبضات الكلب جوه الضلع
يامولاي.. يامولاي.. يامولاي
……..

ياجبير جروحي. الامل باقي بروحي. جمعه جمعه بانتظارك
امنياتي هوايه. يمته اشوف الرايه. بيها اسمك فوك دارك

انته ماي. وانه صحره وتدري حالي بيا وضع
امنيات. بكثر نبضات الكلب جوه الضلع
يامولاي.. يامولاي.. يامولاي
..........................

ارد اعرف شلونك.. وين اشوف عيونك.. بوجع روحي بس اتاني
عيوني الك مشتاكه.. اوياك وين اتلاكه.. يمته ياصاحب زماني

اشتياق.. ياغريب الجيتك افزع دمع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

امنيات احساسي.. تمسح ايدك راسي ومن الاكيك بدمعتي

خوفي يخلص عمري.الفركه كسرت ظهري. بدونك اني ياغربتي

وين اروح.. وبيك يابو دموعي يايوم انجمع
امنيات.. بكثر نبضات الگلب جوه الضلع
يامولاي.. يامولاي.. يامولاي
....................

ردت اشوفك مره. صدك عينك حمره.
عله حسينك والسبايا
تشيل راية ثارك. واني من انصارك.
وانته تعلم بالنوايا

خاف اموت. ويظل بالحسرات كلبي المنشلع

امنيات.. بكثر نبضات الگلب جوه الضلع
يامولاي.. يامولاي.. يامولاي

…….

الله يعلم بيه.. ادعي الك يوميه
ونته تدري بنكساري
ياامامي الغايب.. گلبي بالهم ذايب
وليلي دمعه وي نهاري

بالدعاء.. ربي عجل في ضهور المنفجع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

الغربه هدت حيلك .. وزينب تناديلك
مهدي عمه شهل مصيبه
لا اخو تعناني.. والدمع اذاني
اليمته روحي تضل غريبه

صعبه حيل .. ازيارة الخدام عني تنمنع
امنيات.. بكثر نبضات الگلب جوه الضلع
يامولاي.. يامولاي.. يامولاي
.......................

حسين صادق العقابي

الحمد لله. الشكر لله
خادم صرت لحسين. الشكر لله

……..

كالولي الاجر يحسين. اعله گد اليتعب بخدمه
وما رايد اجر وياك. احبك يا ابو اليمه


بهالدرب ماكو استراحه. والتعب بالخدمه راحه. يا ابا عبد الله
والسأل تحچيله عيني. فدوه راحتلك سنيني. يا ابا عبد الله

يا احله موضوع. ظل جوه الضلوع.
خادم صرت لحسين. الشكر لله

…………

شفت الوادم بدنياي. كلمن موقفه ودوره
وانه خادم صرت لحسين. ابوي واخذ بشوره

دخيله كلبك ماكو منه . ضامي ويوزع محنه. يا ابا عبد الله
بدونك انته عمري ضايع. چنه ديره بلايه جامع. يا ابا عبد الله.

ياربي ممنون . بكد شوف العيون
خادم صرت لحسين. الشكر لله

…….

يواهس عمري يامولاي. بدونك كلشي مايسوه
من اسولف ويه روحي الكاك. انته السالفه الحلوه

روحي صحره يا امامي .وانته كوثر واني ضامي . يا ابا عبد الله
لعالم جروحك اخذني. الزم ايدي ولاتهدني . يا ابا عبد الله

هنيالي بس بيك . تقبلني ادريك
خادم صرت لحسين. الشكر لله

……….

روحي تضيع واتعناك. والكه بحضرتك روحي
الحب الصدكي بالدمعات. ويحله بخدمتك نوحي

ظلمه من دونك سنيني. انته اقرب من وتيني. يا ابا عبد الله

تبدي عالفطره الحكايه. حبي باقي بلا نهايه. يا ابا عبد الله

عاشك واذا موت . ماعندي بس صوت
خادم صرت لحسين. الشكر لله

………….

بكل كعده السوالف بيك.يا تسبيحة لساني
وحلاة الليل يكضي وياك. واحد يسمع الثاني.

كلبي يبعثلك سلامي. وبس الك صار اهتمامي. يا ابا عبد الله
يا ساگي زهرة شبابي. يل طفك قصة عذابي. يا ابا عبد الله

شكراً يمولاي. شكراً يبو الراي
خادم صرت لحسين. الشكر لله

……..

الك يحسين برض الشام. غريبه ولا اهل يمهه
عليك بداعة العباس. لتعوفوهه وحدهه


زينب الله شمصيبه. عدله وميته ياغريبه
يا ابا عبد الله
تحضرو اهل الحميه. لليالي الزينبيه. يا ابا عبد الله

والغربه مرتين. متمرهه يحسين.
خادم صرت لحسين. الشكر لله

……..

نسألكم الدعاء
حسين صادق العقابي

قصيدة لاستشهاد الزهراء ع. شوط كربلائي


افضالج علينه هواي. ياخيمة مجالسنه
عهد يم الحسن للموت. مانترك شعائرنه

.....
مخلوقين الج خدام. من الذر يأم حسين
من الاصلاب صحنه وياج. احنه اعله العهد باقين
صغار كبار صوت نصيح. بخدمتچ والله وتأمرين

نرفع راية الخدمة
نردد احنه هالكلمه
مشكوره اعله هالنعمه

لو ما انتي وين نروح. لو ما انتي چا ضعنه

......

عشكنه الاه والحسرات. بعزاء حسين والخدمه
اباب حسين كل الخير. نعمه مچلبه بنعمه
كل خادم فلا ينهاب. بس خادم ابو اليمه

يازهراء حزمينه
بهاي الخدمه خلينه
بس لحسين ابو سكينه

نموت ومانعوف حسين. غير حسين ماعدنه

....

كلب بكلب مشدودين. خدامج بهالمجلس
من حيلج خذو هالحيل. كل الاجه ومتحمس
والماشدله رايه وياج. هذا الخاسر المفلس

لاينفع ولد لامال
موبس چلمه من تنكال
الويه الزهره بحسن حال

لحد كطع النفس والله. مانترك مآتمنه

......

الواعي اليفهم الله شراد. وجوب المأتم يحضره
تخلف عاللطم كالو. وجاهل راسه اليطبره
ثقافتهم بترك الدين. وثقافتنه انتي يالزهره

نفسنه لو خمد والصوت
وننشال بخشب تابوت
ولو الفين مره نموت

حتى بالكبر نهتف. يحسين بضمايرنه

.......

خدمتج والله رفعة راس. بعزائج نرفع الهامه
الف شكراً والف نعمه. الج من صرنه لطامه
الف هنياله يازهراء. الكضه وياكم ايامه

ياباب الكرم والجود
منج هالعزم والزود
عمرنه بشيلتچ معكود

يا أم الخدم ننخاج. تتقبلين خدمتنه

........

الدنيه كلهه عفناهه. ولاهمنه الحچه والگال
بحبلچ احنه متمسكين. شما تتقلب الاحوال
العمر لوما نخدمج بي. غم ذاك العمر لو طال

الچ يافاطمه الزهره
كل خادم نذر عمره
قسم وبزينب الكبرى

ايد بأيد حد الموت. خدام لابو سكينه



نسألكم الدعاء
حسين صادق العقابي

قصيدة للزهراء ع

يكلبي. الليله سافر
على جناح المنابر

لعالم الخدمه إتعنه واتوضه بدمع
واعلك العشره للزهره بالمجلس شمع
……

لا تتكاسل بس ياكلبي. انطيني چفوفك يله وكوم
ومن ليل اسود مابي كمره. كون تفصل منه هدوم
بشريانك ياكلبي اتحزم. مايتعوض هذا اليوم
عايش من خيرات ام زينب. بالك تتسجل محروم

الليالي الفاطميه
امانه من الزچيه

اجزع الليله للزهره مكسورة ضلع
واعلك العشره للزهره بالمجلس شمع

………

بالك ياكلبي من الدنيا. ميّز واعرف وافهم زين
لاتبرد خليك بنارك. خلصانه الدنيا وماشين
انبض للزهرا والخدمه. هاي الخدمه تگر العين
چف اليلطم باچر يفرح. والعين التبچي اعله حسين



غرورك مايفيدك
تفيدك. لطمة ايدك

باچر الحسره متفيدك وعضت الصبع
واعلك العشره للزهره بالمجلس شمع

……

عاشرنه هواي بهالدنيا. شفنه الناس اشكال اشكال
وعاشرنه الزهره وكل خادم. لا ماطحنه بأي اشكال
كالو طاحت امكم زحمه. ومن العصره المدمع سال
شلال وطايح جاوبنه. ويحله من يطيح الشلال

سلاماً. ام ابوهه
شمسنه وماطفوهه

وي خدمهه مثل نسمه وي ريه انجمِع
واعلك العشره للزهره بالمجلس شمع

………

ابنادم ينحب اعله الفطره. مو كوه يحبونه الناس
الموقف لو مابي روحيه. بلسانك لا ماينقاس
يالكلبك صخره من الدنيا. الزهره تعلمك عالاحساس
احنه نحب المجلس تدري. چي بي طعم من العباس

المجالس. علمتنه
على الله. وافتهمنه

لو عمر ثاني اخدم ابد ما اقتنع
واعلك العشره للزهره بالمجلس شمع

……

لتلوم الخادم يتجنن. من يخدم امه الزهراء
وداعة هالمنبر تعرفنه. واحد واحد بالاسماء
تعلمنه الحب والروحيه. كلما ندخل هالاجواء
هذا العام احنه تعاهدنه. نقيم لفاطم عاشوراء

الخدمهه. عن قناعه
اله صك الشفاعه

الخدمه ماي الله تجريله من اطهر نبع
واعلك العشره للزهره بالمجلس شمع

………

حسين صادق العقابي

قصيدة لشهادة الزهراء ع

من گلبي صحت.. يمج شيبت
اكتب عالگبر.. ماتت من وكت
……..

بخنكة الصوت.. صحت ياعافيتي بعدج هالعمر ضاع
بخنكة الصوت.. آه وايام الحبايب يكضن بساع

بيه حسره وسالفه ومابيه انعه
راح اسولفهن يروحي دمعه دمعه
ياخسارة كلبي ما ادري شكبرهه
كلشي يرجع بس اليموت شيرجعه

ريتي بلا هوه. وعيني بلا ضوه
تسولف دمعتي. ماتت من وكت
.....................

بيت مهيوب. يصير للفقره وطن لو دكو الباب
بيت مهيوب. ومن عتبته مراد اخذو كلهم تراب

دارت الدنيا علينه والله صعبه
ياهظيمه لبيتي طبت ناس غربه
18 نبضه انتي عمرج ليش اذوج
والقصد چان النبي يشلعون كلبه

مذبوح الامل. دك بابي الاجل
وناده ياعلي. ماتت من وكت
...................

اسمع الاه. من وره الباب وضلع للزهره مكسور
اسمع الاه. وانه اجرع بالصبر يالزهره مجبور

طايحه طيحت نده بحسره شكبرهه
ظلوعج مكسريهه واعله الباب اثرهه
الله يدري الحسره البكلبي بغيابج
كومي يابعد اليشوفن يانظرهه

يرويحة علي. ياناسي وهلي
ما اسمع ردت. ماتت من وكت
.....................

بيه تدرين.. الليل من ايمرني اخلصه بدمعة العين
بيه تدرين.. ضهري محني من فركتج يم الحسين

ذبل عودي والحزن خيم عليه
مامصدك دافنج اني باديه
للمكابر امشي الج محتار حيره
وعل كبر اغفه ودمعتي تضل جريه

اصحه امن الألم.. فراكج جن سهم
وكلشي ايصيح الي.. ماتت من وكت
........................

كلبي مشلوع. بلايه كواك الله لمن ادخل البيت
كلبي مشلوع . هواي وادم بس احس لوحدي ظليت

هواي كبرتيني من عفتيني وحدي
الليل يكضي بدمعتي وايدي اعله خدي
ردت كلمة ياعلي بلسانج انتي
اه ياكبرج اخذ كل فرحه عندي

اوصل بالدمع. بقرآن وشمع
ويرد الكبر. ماتت من وكت


حسين صادق العقابي

قصيدة لاستشهاد الزهراء ع


التاريخ شاهد قبل. وعدنه ادلة عقل
عن ما جره لفاطمه. نثبت ظلم لو عدل

……

ما نروي عن اهل البيت. ولا نستدل من عدهم
اربع مذاهب يروون .ناخذ الشاهد منهم

كتاب المصنف بي خبر. ابن أبي شيبه يكول. الثاني چان المسؤول. هدد الزهره

بانساب الاشراف انذكر. بالجزء الاول والصار. نفس الشخص جاب النار. هدد الزهره

من نستدل بالخصم. شاهدنه مابي ظلم
بس ردنه نوصل الى . نثبت ظلم لو عدل

………

بهاي الرواية التأكيد. من تروي عن الزهره
المحسن عله اعتاب الباب. من طاح من العصره

فاطمه يكلوله اجت. وكفت تره خلف الباب. كلهم وإن والاسباب. يرضي الخليفه

هواي المصادر والكتب . بس ردنه هالناس تشوف. كيدو چم مره چفوف. اهل السقيفه

واليروي هذا الحصل. كتاب الملل والنحل
للعنده شگ بالامر. نثبت ظلم لو عدل

…….

العقل مصدر تشريع. يهل العقول اسألكم
فاطمه بلا مرقد ليش. وضايع كبرهه انشدكم

الوارث الشرعي للنبي. اخذو فدك منهه شلون. العاقل عرف والمجنون. نحلة محمد

من كيدو چف الوصي. ظل صابر وچان الراي. يحفظ الاسلام بهاي. والدنيا تشهد

وصت علي وبحزن. بالليل كون اندفن
عالشيخ ما راضيه. نثبت ظلم لو عدل

………

والد محمد بالنار. عدكم خبر متواتر
وما كفرتكم تروون. مات ابو طالب كافر

ويوم الرزيه لو كلت. ظلمو الزهره الشيخين. كافر اصير وموزين. لا مو عداله

مو حادثة تاريخ ابد. فاطمه صارت ميزان.
للباطل وللايمان. ورب الجلاله

بين الوعي و الجهل. اختارينه خير العمل
لا مو تعصب ابد. نثبت ظلم لو عدل

……….

من عنده مثل الكرار . من عنده مثل الزهره
من عنده مثل العباس. من عنده مثل العتره

نحب الصحابي بس شرط. لازم يحب الكرار. مثل ابو ذر وعمار. ومالك الاشتر

يتساوه عدنه لا ابد. القاتل ويالمقتول. يحتاج هالامر عقول. يالسامع احذر

لماشاف حيدر شمس. كلبه يدك بالعكس
وبالحشر من نلتقي. نثبت ظلم لو عدل

………

نسألكم الدعاء
حسين صادق العقابي

كون يطلع كلبي كدامي واشوفه شلون فرحان بخبرهم ❤️

اما خيبرٌ سنعيدُ فيكم
واما كربلا ستعادُ فينا
ففي الامرينِ يُكْتَبُ انتصارٌ
وللامرينِ نحنُ العاشقينا

#لبنان_الصمود

( قصيدة 14 نور ) متباركين بولادة الاقمار المحمدية

صلو على محمد

يا طه يا بو الزهرة
يا اصل نور العترة
بيك الله تمم امرة
والكون بسمك ردد / صلو على محمد

حيدر يحماي الجار
العالم بوصفك محتار
كرار لا مو فرار
بموقفك خيبر تشهد/ صلو على محمد

فاطمة يا ام حسين
يا شافعة بيوم الدين
يالشيعتچ مفطومين
من النار امر مأكد. / صلو على محمد

الحسن ثالث رحمة
بالكرم واضح اسمة
مشكورة هاي النعمة
ما تنحصي ولا تنعد. / صلو على محمد

يحسين يابو الاكبر
للشمس انت المصدر
يا ماي نهر الكوثر
حبيتك ومدري شكد. / صلو على محمد

السجاد في كل سجدة
للشيعة تنحل عگدة
اليگصدلة لا ميردة
للباري بي نتودد. / صلو على محمد

هيكل قداسة الباقر
يجبر بذكرة الخاطر
بگلوبنه يضل حاضر
باقر العلم الاوحد. / صلو على محمد

يبقى الامام الصادق
قرآن بالحق ناطق
يا جبل عالي وشاهق
نور البقيع الغرقد. / صلو على محمد

يدور الفلك وابراجه
بكاظمنه باب الحاجه
واللي مشة بمنهاجه
ما يجري دمعة اعلة الخد/صلو على محمد

يا شمس مدفونه بطوس
يالتنحني گباله الرووس
لكل المعارف قاموس
مشهدك شرف مشهد. / صلو على محمد

تبقى الجواد انواره
شمعة بدرب احراره
ترست الدنيا انصاره
وشعت انوار المرقد. / صلو على محمد

يا علي الهادي محلفك
تلزم ادينه بچفك
بحبك درينه وعطفك
نار الله تطفة وتخمد. / صلو على محمد

يا جود ماي الجنة
يالعسكري انته المنه
اطاك الله ما تتمنة
المهدي اللي بي نتوعد. / صلو على محمد

اسال الرايح والرد
جزتهه هالدنيا الحد
لبسهه بيدك چرغد
يالمهدي يا. سر. احمد. / صلو على محمد

الشاعر حسين صادق العقابي