الشاعر حسين الغالبي

مقدمة للدفنة


يتراب كلي بيا وجه لو متنوح
عرش الله عاري فوكك وظل مطروح
..............

يتراب انثر دمعتك عالمظلوم
عاللي كظه من الضمه وكله هموم
وحده بقه وما رحمته ذيج الكوم
مجروح واللي تشيعه جتاف جروح
.............

الميت اكرامه تعرف لو دفنوه
بس الحسين عله الترب شو خلوه
ثلاثة بقه وراسه برمح هم رفعوه
ما يكفي لو هيجي بقه بس مذبوح
.............

ياهو اليدفنه وكل هله مذبوحين
ونسوانه وأطفاله بسبي هل ماشين
واعداه ما عدهم رحم لا من دين
مستحية من عنده الشمس لو متروح
............

عاري وثيابه بلا رحم مسلوبات
اه ويه اه وما تسد هالاهات
ديرة بجي ما توفي إله مو دمعات
عطر المصاب بكربله كام يفوح
............

عرش الله معقولة يظل عالتربان
ويلي وحيد ويمه مامش انسان
بحر الشمس ظل مرمي وسط الميدان
وحته العليل عله الجره ظل بس روح
............

شلون اقبلتهه يبقه وثلث تيام
جان احفرت نفسك إله وخله ينام
ردله الجميل الحفرت بصدره سهام
شافك عطشت وشربك دم مسفوح
.............


حسين الغالبي

خلص كلشي ومشت زينب سبية

أعظم الله اجورنا بمصابنا بالحسين عليه السلام وجعلنا وإياكم من الطالبين بثأره مع وليه الإمام المهدي من ال محمد عليهم السلام

الرضيع ع


حسين حسين حسين
......................

يابو علي تعبك ذبل ورباك صاير خشبة

يالتسكي بستانك نده اسكي الرضيع بشربة

من الخيم طلع علي .. تدري الطفل روحي وهلي

اسكيه كطرة من العذب .. ماريد المية الي
.....................

ها يالرباب شكد صعب الشيخ ويمد ايده

لاجن الكاسر خاطري من تربي عيني وريده

وجي يقره بآيات النحل .. حيل اشتهاه ذاك النبل

مجبور قدمته وكلت .. بلكت أمية للطفل
....................

شتنفعهم أمية نهر ماي الكصص واتبده

يا ريت ما قدمته ابد يا شوك يسكي الوردة

كد الترافة البي احس .. متكمط بخيط الشمس

لاجن شفافه اتيبست .. عطشان ويفرفح همس
...................

اسمع يكلي اتيبست كاع النحر مو فشلة

بلكت أمية ترشهه الي جا وين اكعد النبلة

ماخذ الشمرة عله الكرم .. وما حسب حساب الالم

من العطش ذابل لجن .. محتار شيضيف السهم
....................

وسير سهمهم عالنحر ووليدي ما مش حسه

ازغر معزب عدنه بس للضيف ذابح نفسه

بيديه لولح ركبته .. ومن دمه صارت شربته

منج أخذته وهسه رد .. مذبوح هذي قصته
...........



الخادم .. حسين الغالبي

أساسية للانصار ع


عنبر كل للعنبر خل نفزع للبستان
باجر يوم الفدوة نروح بحب العطشان
واللي هواي اتمنه
يشوف بعينه الجنة
هاي هاي هاي هاي
...............

شيخهه الانصار يسمع الأخبار
سمع زينب تنشد حسين وصبر
تكله خويه حسين أخبرت صحبك زين
عازتك الهم تره عازة ظهر
كالهه حسين اطمئني صحبتي وفاية
الكون خميته وطلعت بهالانصار ويايه

خميته وبس همه ليه انصار يلوكون
عيونج باجر تشهد جدامي من يطيحون
واللي بدمه اتحنه
يشوف بعينه الجنة
هاي هاي هاي هاي
..............

عنبر الطف كال حيهم الله رجال
وسفة اخت عباس ما مرتاحة
امشونه للخيمة والوفه غيمة
نكلهه آدم ما دنه التفاحة
احنه ويه حسين نبقه وما نعوف الغالي
واللي كدامه ايتوذر صاح الف هنيالي

عهد وياه من الذر كدامه نتوذر
يخط الدم عالتربة نعشكك يابو الاكبر
ونفرح لو يقبلنه
يشوف بعينه الجنة
هاي هاي هاي هاي
..............

بليلة العاشر اتحضر الناصر
للوداع وبس وداعه يختلف
يا مرة يكلهه منيتي كلهه
العايلة تصير لابو الاكبر وقف
باجر احنه ننفرشله للصلاة سجادة
وانتن تصيرن عباية تغطي عمة السادة

يحركونه يذرونه يطشونه صم رماد
الفين ومو مرة لو هالموقف ينعاد
هم ندافع عنه
يشوف بعينه الجنة
هاي هاي هاي هاي
.............

باجر البستان مفطر وعطشان
واحنه قررنا عله كاعه نمشي دم
كلشي منطينه واحنه من طينه
وعله حسين نغار حته من السهم
خاف سهم يبوس جسمه وهوه واكف للصلاة
صدورنه خلهه تموت ولا من الغيرة الممات

وجي نعرف نيتهم نوكف بالاستعداد
واليكرب للغالي يلكانه بالمرصاد
منريده اليتعنه
يشوف بعينه الجنة
هاي هاي هاي هاي
...............

شمحله باجر طف وكلشي يتوقف
ملحمة بيهه الله النه انطه الرزق
باجر الفدوة نروح للفدوة
نروحله لو ما هو جا ما ننخلق
باجر مسابك عليهه موتة وبطعم العسل
باجر اللي يطيح منه بحضن ابو الاكبر نزل

يا محلاهه الموتة وبحضنه آخر انفاس
وكلما يوكع واحد سجل اسمه العباس
واخر لحظة بحضنه
يشوف بعينه الجنة
هاي هاي هاي هاي
..............

نسمع بجنة وكلنه نتمنه
نشوفهه ونتنطر بفارغ صبر
هاي هيه هنا جنة المأوى
الطاح يم حسين يتلكه القصر
الجنة من يباوع النه وهوه راضي علينه
بعده واحدنه بدماه الجنة تترس عينه

واخر ما نتمنه بهاي الدنيا نريده
ساعة نوكع يمه نبوس حسين بايده
كل عاشك وبفنه
يشوف بعينه الجنة
هاي هاي هاي هاي
.............



الخادم .. حسين الغالبي

أساسية ل مسلم ع


يحسيني ابعثلك جلماتي السلام السلام
مو راسي دنكته طحت انه احترام احترام
من شفت ضعنك اجه جدامي
من القصر كلي طحتلك ضامي
................

بنظراتي من فوك القصر .. منظركم كبالي يمر
شفت الظعن بي نور
يا بو علي ومن سلمت خنكتني عبرة وجا متت
كبالي شفت عاشور
ابعثلك بخنكة صدر مني التحية
وبركعتين من السطح موش باديه

بركعاتي بحسراتي حييتك يا حسين يا حسين
وادريبك تنظرني وتعذرني مالي عين مالي عين
مالي عين وتنتظر ملكايه
والرسايل ذيجه مو ويايه
...............

اما بعد يا سيدي .. للكوفة ريتك ما تجي
ما ظلت اي وعود
ذيج الرسايل والكتب .. نكروهه والموقف صعب
منانه ريت تعود
مختلف مضمون الكتب ثاري كتب موت
والكوفة الي صارت وسف يالغالي تابوت

غرتهم دنيتهم خسروهه كربلاء كربلاء
لا وينك ونعينك سبعينك الوفاء الوفاء
انسه يحسين الرسايل كلهه
مايلة الوادم تجي تعدلهه
................

مولايه قصرت اعتذر .. عرضو إلي أهل الغدر
محد بقه وياي
كاطع لاجلهم هالدرب .. وياك سباح الكلب
وين العزيز الجاي
مبعوثك الدزيته ما كمل مهمته
من طوعة بس ماي الشرب آخر شربته

وبلوعة بس طوعة وكفتلي امتثال امتثال
ما هزهه ريح الشر وكفتهه الجبال الجبال
جيشك الكالولك أقبل ما هم
يوم ما سالم بقيت وياهم
................

بيد الغدر لمن طحت .. بلا ناصر بنصهم صرت
دارو عله المبعوث
سيفي تعب حيلي ركد .. واتذكرت وكت الشدد
نندب علينه الغوث
ما غزر وياهم ملح والحامي جاره
كالو أمان امشي إلى قصر الإمارة

ذبيته سيفي وظل أبالي الأمان الأمان
الحجة القيهه واعرفهم بس لسان بس لسان
تالي يم شيطانهم جابوني
ويا أمان الماي هم حرموني
.................

ولمن صعدت عله السطح .. بعيوني جان أكبر جرح
شفت الوعد مجتول
صليت ركعاتي قصر .. جي راح اطيح من القصر
عدنه التمام خيول
يا بو علي طلبة الي طلبة وحيدة
تبقه أمانة بركبتك بنتي حميدة

يابن العم لا تهتم جي ضامي ماكو ماي ماكو ماي
بس انته وعيالك مو مثلي وحدي جاي وحدي جاي
هاي آخر جلمة اودعك بيهه
كلي مسلم ذمتك باريهه
................


الخادم .. حسين الغالبي
21/8/2020
١ محرم ١٤٤٢

الخيل تكول الف شيطان وزني
عله سحك حسين جيت بثكل وزني
انكسر ظهري عله صوت الشهكة وز ناي
وعزفهه اول خنكته المغربية

Powered by @Manybot

يحسين سر دمعتي
خليتني ويه اخوتي
بالخدامة يحسين
والكرامة يحسين
يحسين سر دمعتي
..............
ابطن امي وانه اذكرك
لعبت خيل عله صدرك
كالتلي امي سرك
بالمجلس سرك ذبيته
من زغري وانه جيتك
موطن للحب لكيتك
انسه الله لو نسيتك
يا أكبر خطوة بدرب الله
ولا يوم دونك يمر
وياك ابقه العمر
وبيقيني يحسين
انته ديني يحسين
مولاي يا نعمتي
يحسين سر دمعتي
..................
عابس بيك انته شاطر
ودرسنه عله الشعائر
الما ينجن حبه عابر
يرسب لو ما شك هدومه
يا درس الحب دخيلك
خليني اوصل دليلك
لمن داسته خيلك
ناده الرب بس كونك ترضى
وعلوم هالمدرسة
محبوب تتنفسه
تضحي لاجله يحسين
وما هي سهلة يحسين
خليتكم قدوتي
يحسين سر دمعتي
.......................
من نحضر للمجالس
عمرين ويبقه واهس
مو بس دمعة مدارس
والمنبر خرج طلابه
بأخلاقه يبدي درسه
لسانه بغيبة يخرسه
يباوع بس عيبه نفسه
ميباوع لعيوب الوادم
مهموم لازغر ذنب
ويكول كلش صعب
ويرفع ايده يحسين
ما اعيده يحسين
الغفران بس طلبتي
يحسين سر دمعتي
................
شكرا يل من حنانك
اخدم صرت بمجانك
واسمعهه يعلي شانك
يومية الوادم تدعيلي
نعمة وما منهه نعمة
توفقني لهيجي خدمة
يل كلك انته رحمة
وعليه اتفضلت هوايه
افضال ليك شكثر
وتطول من تنذكر
الينسه فضلك يحسين
سابي اهلك يحسين
يا نور في ظلمتي
يحسين سر دمعتي
..............
هنيالي وانه خادم
بيتي أصبح بالمآتم
خادمكم وانه سالم
ما متوذر شي من جسمي
لو تسأل شنهي حالي
فارغ بالخدمة بالي
عيالك لا مو عيالي
للشام انكادت عالهزل
نسوانكم تنسبي
وتنشاف ذيج العبي
وانه اهلي يحسين
كلهه يمي يحسين
بمصابكم حيرتي
يحسين سر دمعتي
.................
خادم بس يا خدامة
ما مش للذل علامة
عايش بس بالكرامة
خادم والناس يقدروني
هنيالي يابو الأكبر
محسود بمجلس احضر
بهل خدمة هوايه اكبر
ويوم المحشر تتلكاني
يا نور وسط القبر
والكاك يوم الحشر
للشفاعة يحسين
هل قناعة يحسين
تنداف وي فطرتي
يحسين سر دمعتي
....................


الخادم .. حسين الغالبي

الاكبر يكل للكافل
خليلي بالطف عازل
حي على القتال
حي على القتال
...........
طلعو شبه شمس وكمر
من الخيمة ولصوب النهر
جن ركبو بساط السفر
سليماني
واتفقو بنص الدرب
يتونسون بهل حرب
ياهو أسرع لماي الشرب
انته اني
نقسمهه بيني وبينك
وادري زغيرة بعينك
حي على القتال
حي على القتال
...........
الاكبر نده يابو الفضل
نقسمهه بالنص بالعدل
لمن سوه ندخل نمل
معروفة
كلهه تظل تصرخ يطف
سبعين ألف كلب ورجف
وجه الهوه منه انخطف
متشوفه
وجه الزلم هل عابس
للوادم انطي واهس
حي على القتال
حي على القتال
............
خليلي عازل ها يعم
كله ابو فاضل نعم
مناك انته وانه هم
منانه
بسم الله سمي وابتسم
لتخلي شردة للزلم
حته اليذب منهم هدم
يلكانه
هناك علي عافاهم
عيوني اعصب من الكاهم
حي على القتال
حي على القتال
............
من هسه خلي نتفق
يا عمي لمن نفترق
كلمن إله نص الرزق
وبكيفه
نتوكل عله الله بعد
عالعلكمي عمي الوعد
واحدنه المعاتب ورد
من سيفه
كترين اجو وبغاره
تشبه علي وفقاره
حي على القتال
حي على القتال
...........
كلمن عله جهته حمل
جن حيدر وبالطف نزل
بس ما هي معركة الجمل
لا خيبر
صوب المعسكر من اجو
سبعين ألف واتورطو
حته النفس شح ما لكو
من يكدر
والما كتم أنفاسه
لحظة ويودع راسه
حي على القتال
حي على القتال
..........
كلمن لزم جهته ودخل
ومشرعة باب الاجل
ما بقو لعزريل امل
بالراحة
يقبضله روح وعشرة اجت
شبه الجبل يمه اصبحت
جن محشر الطف وبقت
اشباحه
يا ربي صاح دخيلك
بس لا اجه إسرافيلك
حي على القتال
حي على القتال
............
ما لحكت سيفي احد
جم ركبة ما ظل اي فرد
جنت الهه كلش مستعد
واتنطر
وانه الكلت سبعين الف
نلكاهم الجتف بجتف
تاليهه جيش ويرتجف
ما ظل فر
سمعت خبر ثاريهه
بخلفة علي وطاريهه
حي على القتال
حي على القتال
...........
يا عمي بشرني الوضع
شو صوت الإبرة ينسمع
هالملة عدهم هالطبع
وانته ادرى
من يشتد عليهم امر
يتصفطون بفد شبر
وجنهم ينزلون بقبر
بس حفرة
وسفة الزلم تتشارد
وعله النفس تتشاهد
حي على القتال
حي على القتال
............
للعلكمي اوصلنه بعد
وبسرعة جينه عله الوعد
مو صورته البدر وورد
يم مايه
خل نترس الجربة ونرد
ونعلي رايات الخلد
متانينه بالخيمة ورد
وجم اية
نصلي صلاة الساقي
نكبر حسين الباقي
حي على القتال
حي على القتال
............

الخادم .. حسين الغالبي

عطشان بس مو للماي .. هاي السنة لزواري
...........
عطشان احس بس هالسنة مو للماي
ومرت علي فترة اختنك بيهه هواي
أتلفت بصحني ولا واحد جاي
يا ليتنا صارت وين .. وينه الينادي بثاري
...........
بالموقف العاشك يبين عشكه
كون بفعل مو بس سوالف حركة
وين اليكولون الهوه من نشهكه
ماله زفير البحذاك .. وأنه بجذبهم داري
...........
صحني اليضك جان بعددهم كل عام
صيف الجفه حل ويبخر الخدام
ما ذكرو التحت الحوافر من نام
ما غزر الحافر ليش .. دين الهم برض شاري
..........
صحني فرغ وسوالفي ويه الحيطان
ما ظن جزاء احساني الا الإحسان
ما مش مثل صحباني وتصح صحبان
ذولاك همه السبعين .. وين الكه مثل انصاري
.........
يا شيعتي محرم كرب هل جاكم
وعله الوعد كون السنة الكاكم
إياكم الله يغضب وإياكم
لو ما يشوف العزيات .. يكلبهه بينه الباري
.........
فوك السطح صعدوهه سودة الراية
وكون اسمع بكل شارع انه قراية
تكية ومواكب تنصب بحجاية
ونسمع قصيدة عاشور .. يقراهه حمزة بداري
.........
يوم الطبك كون استمع للمقتل
حرك الخيم تشبيه زينب عالتل
تطبير اكو وزنجيل ما يتأجل
وانظر عزاء طويريج .. الركضة تبرد ناري
.........

الخادم .. حسين الغالبي

العليلة ع

آيحسين آيحسين آيحسين
--------------
من امشيتو المدمع هدني
احسب خطوات العذبني
آثار النوك يتعبني
وياي يصيحن لاوين
---------------
بكل خطوه انظر طاحت دمعه
جن كالن نوح يطك ظلعه
خل نشبع شوف من التسعه
واحد منحسبه مأكدين
---------------
روحي عله النوك شكد تربي
وموش الكاع يدوسن كلبي
شال الدنيا وحطها بدربي
من كلي لا ما ترحين
---------------
كتله تنطر بس خل اشبع
شبكة والد تسوه المدمع
باجر عكبه تضل مكطع
وحدك وتدوسك سبعين
..............
عزريل شسواه حسيني
ماخذ روحي وتارك عيني
تابوتي بكلمة ودعيني
ما مش رجعة ولا بعدين
-----------------
من بيتي الجنة شطلعهه
وشلون النار تكطعهه
ابليس يدوس عله اضلعهه
حلم بمحشر بس مو زين
......
شلون النار اتطب للجنه
هيه الناس اتطب تتمنه
حلمي الجمرات يترسنه
وخدر الله مطشر صوبين
------------------
لتكول العايفهه بنية
حسين الطف الأول بيه
صح اوكف لاجن مرمية
شلون اتنفس عكب حسين
-----------------

الخادم .. كرار الخفاجي
الخادم .. حسين الغالبي

كورونا البعد عنك موش المرض كورونا
ولون رادو علاج وحل بعزائك راح يلكونه
.................
انصابينه بمرض فركاك وبدت أعراضنه تظهر
الحناجر كلهه ملتهبة ما تصرخ لابو الاكبر
وضيق النفس جي بالبيت ما نتنفس المنبر
ما نشتم دفو ذكرك
ولا نستطعم بهجرك
الحرارة صعدت لنحرك
بحر الظهر يا مولاي من رادو يذبحونه
.............
اجيناك ونعرفك زين للمرضى انته مستشفى
استعلامات وكفتنه اليطبلك لازم تعرفه
ب اه يحسين ومصابه صحنه وشكثر لهفة
بيهه نعقم وندخل
ومعلوماتنه نسجل
بعد فركاك ما نحمل
وموش الحركة بالبلعوم عنك من يمنعونه
.............
دخلنه لحضرتك يحسين بردهات الصحن صرنه
كلنه ننتظر دكتور يجينه يفحص شعدنه
وعله الردهات مر النور كزبر كلشي من مرنه
دزلنه الطبيب حسين
يفحص بس بلا جفين
يمشي والسهم بالعين
وكبل ما يترك الردهات دون كلشي بعيونه
..............
العلاج يكول يا هالناس من تحضر بالقراية
المناعة تقوى باللطمة كل يومية حباية
ومضاد الخنكة بالشباج بس تتعنه مشايه
والكمامة دمع العين
وجفوفك اللطم الزين
تعقيمك ب اه يحسين
وعن شيطانك اتباعد لا تاكل بماعونه
..............
وصلت يمك الحالات وانته تقيم الموقف
وخلية رحمتك يحسين راية كبتك وترف
الناطق باسمك العباس إذا اعلنهه ما يخلف
اجه وجنه خبر شايل
واعلنها ابو فاضل
هلال محرم من يهل
حالات الشفاء يكول كلهه تصير مضمونة
............


الخادم .. حسين الغالبي

للعليلة عليها السلام



هذا اول صباح وشفته الغروب
مشت عني الشمس مترد الي النوب
وانه وحيدة وزغيرة وعليلة
وحشة الدار عاليفكد خليله
مو كده المفارك يمرد كلوب
..............
هالمشراكة واخر مرة الي تلوح
واحسهه مغربية وخنكتي تفوح
يا مصباح هذا الياخذ الروح

اهو بس كالي انتي هنانه تبقين
وأخذ كلشي ومشه وماخذني الحسين
اعرفتهه بلاية رجعة ذيج الدروب
..............
إذا عذره عليلة وماخذ عليل
وإذا عذره زغيرة وازغر يشيل
معناهه حلم فاكد التأويل

ما مش يوسف يأولها الاحلام
وغريبة حسين شافه بلايه مينام
حرت جي سر مشيته عني محجوب
..............
بقيت افتر واخم الدار وحدي
حته الطفل ما خلوه عندي
الدمع طلع عظم وجهي عله خدي

المصيبة أكبر من سنين عمري
ولا يمي اليكلي بنيتي صبري
وانه زغيرون كلبي زين ميذوب
............
سوه صارن نهاري ويه ليلي
مو هاي الشمس شمسي خليلي
رحل عني وصبح أظلم دليلي

اجيب منين جدي يردهه إليه
ولا ترهم ترد من صبع اديه
أشرت شكثر ظل صبعي متعوب
............
اباوع عله الباب خلاف الحسين
لحدما عله الباب انطبعت العين
ردت اي خبر منهم زين مو زين

وردت واحد إله يوصل الرسالة
يكله تره حالة بنته حالة
تتخيل لجن محد عله البوب
...........



الخادم .. حسين الغالبي

كرب موعد محرم والكلب كزبر
ومو مثل السنين الراحت المنظر
............................
كرب موعد محرم واختلف حالي
لونهه الراية سودة صارت كبالي
خايف حيل اشوفنه الصحن خالي
وبده موسم حزن واتكتر الاحمر
............
الصحن وحشة يصير بلايه زواره
اليغص بيهم كبل ما تحمل اكتاره
بدرس الغاضرية ناخذ صفاره
ونحس ميتين إذا هالليلة ما نحضر
............
جنه يهل محرم كلهه ملتمة
نتراكض عله صحنك يبو اليمه
شكبرهه دخيلك بهاي السنة الهضمة
حمامات الصحن من العزاء أكثر
...........
لا موكب يطب لا يقره زنجيلك
الوادم عن بعد مولايه تبجيلك
فاتح حضنك لحافر جدم خيلك
افتح بابك الوادم وجهه اصفر
...........
حمزة بيا شهر عاشور الك يصرخ
ومن نسمعه جرحك بالكلب ينجخ
محرم هالسنة طرف الأرض وانطخ
تثبتهه بدينك سيدي تكدر
............


الخادم .. حسين الغالبي