ዜና: ሰሞኑን ከተከሰቱት ከፍተኛውና በሬክተር ስኬል 4 ነጥብ 9 የሆነ የመሬት መንቀጥቀጥ ትላንት ምሽት መከሰቱ ተገለጸ

ትላንት ታህሳስ 14 ቀን 2017 ዓ.ም ሁለት #የመሬት መንቀጥቀጥ መከሰቱ ተገለጸ። የመጀመሪያው የመሬት መንቀጥቀጥ የተከሰተው ቀን 9 ሰዓት አከባቢ ሲሆን ሁለተኛው የተከሰተው ከምሽቱ 4 ሰዓት ከ41 ደቂቃ ላይ መሆኑ ተጠቁሟል።

የአዲስ አበባ ዩኒቨርሲቲ በፈንታሌ ተራራ በመተሃራ አቅራቢያ ትናንት ምሽት የተከሰተው መሬት መንቀጥቀት ንዝረቱ አዲስ አበባ ድረስ መሰማቱን አስታውቋል።

በዩኒቨርሲቲው የጂኦ ፊዚክስ ሕዋ ሣይንስና አስትሮኖሚ ተቋም የሴስሞሎጂ ትምህርት ክፍል ሃላፊ አታላይ አየለ (ፕ/ር) እንዳሉት፥ በአዋሽ ፈንታሌ ወረዳና በመተሃራ አካባቢ ከታሕሣሥ 10 ቀን 2017 ዓ.ም ጀምሮ የተለያየ መጠን ያለው የመሬት መንቀጥቀጥ እየተከሰተ ነው፡፡

ይህም ሰሞኑን ከተከሰቱት ከፍተኛው መሆኑን ጠቅሰው ንዝረቱ አዲስ አበባ ድረስ መሰማቱን አስረድተዋል።

በአካባቢው የሚከሰተው የመሬት መንቀጥቀጥ ከቀን ቀን እየጨመረ መምጣቱን ጠቁመው ነዋሪዎች ላይ ችግር እንዳያስከትል የቅርብ ክትትል እንዲደረግ አሳስበዋል፡፡

በአፋር ክልል የዞን 3 ዋና አስተዳዳሪ አቶ አብዶ አሊ አቡበከር በበኩላቸው ከምሽቱ 4፡41 የተከሰተው የመሬት መንቀጥቀጥ ከበፊቱ በተለየ ሁኔታ ንዝረቱ መቆየቱን አንስተዋል።

እስከ ሌሊቱ 7 ሰዓት ድረስም በአካባቢው የተለያየ መጠን ያለው የመሬት መንቀጥቀጥ መከሰቱን መናገራቸውን ከፋና ያገኘነው መረጃ ያሳያል።

ሌላኛው ትናንት ከቀኑ 9 ሰዓት አካባቢ በፈንታሌ ተራራ የተከሰተው የመሬት መንቀጥቀጥ በሬክተር ስኬል 4 ነጥብ 6 የሆነ ነው ተብሏል።