هذي اوصيتي .. برگبت امتي
ثقلين الهدى .. اكتابي وعترتي
وإن ظلمتُم عترتي من بعدي
فالثأر معقودٌ بسيف ِ المهدي
. . . . . . . . . . . . . . . . .

وصيتي من كبل موتي اسمعوها
كتاب الباري أحكامه احفظوها
ومن بعده عترتي لا تظلموها
وبنتي فاطمه البضعه تعرفوها

لا لاتنظلم .. ومن حگ تنحرم
وبجف الغدر .. عالخد تنلطم
وإن اتتني باحمرار ِ الخدي
فالثأر معقودٌ بسيف ِ المهدي
. . . . . . . . . . . . . . . . .

القرآن ابأمر من الله ظل محفوظ
وحق ذو القربى واجب عالخلك مفروض
ليش الأمة من بعدي بنزاع اتخوض
وليش الزهره ترجعلي ابصدر مرضوض

ومن هذا الوضع .. منها اشجم ظلع
متكسّر يرد .. وتشكيلي ابدمع
نارٌ لمدمعِها دوت في وجدي
فالثأر معقودٌ بسيف ِ المهدي
. . . . . . . . . . . . . . . . .

اشذنبها فاطمه وتتصوب ابّسمار
ومحسنها يطيح ابعصر باب الدار
بين المحسن وفاطم لهيب ونار
والزهره تنادي يا علي الكرار

والدمعه اتهلي .. وآنه ادري بعلي
بحبل اوصيتي .. مجتوف الولي
فالصبر عند المرتضى ذا عهدي
فالثأر معقودٌ بسيف ِ المهدي
. . . . . . . . . . . . . . . . .

بعض أصحابي ادري تخلف اوصيتي
وتحاربني وتأذيني بأهل بيتي
روحي فاطمه وحيدره بشخصيتي
وتعرفون الحسن وحسين عافيتي

واليسلب فدك .. هذا ابلايه شك
حرّف بالشرع وبالمحشر هلك
فالعذر في الحشرِ غداً لا يُجدي
فالثأر معقودٌ بسيف ِ المهدي
. . . . . . . . . . . . . . . . .

ادري بحيدر ايطبروه بالسجده
وادري بالحسن يكظي بغدر جعده
بالسم ابني لمن ينمرد جبده
وعن كبري ابسهام الحاقد ايبعده

أصحاب الفتن .. غدرت بالحسن
وأسباب الحقد .. ظهرت للعلن
فكإنما السمُ سرى في كبدي
فالثأر معقودٌ بسيف ِ المهدي
. . . . . . . . . . . . . . . . .

ادري حسين بعدي ينكطع نحره
وادري الخيل باجر تسحك ابصدره
وزينب بالحقد تنوخذ متيسره
ومن مجلس المجلس بس غصص مره

وجفين الدعا .. يم المشرعه
تدعي بالفرج .. واهيَّ امكطعه
تدعوا وترجوا لا يطول الدعد ِ
فالثأر معقودٌ بسيف ِ المهدي
. . . . . . . . . . . . . . . . .

خادم أهل البيت عليهم السلام
عمار العيساوي الكربلائي