آنه البتول الطاهره واحضر بنيني ابسامره راح انصب عزه بدموع عيني
تحضر شيعتي اتواسي دمعتي
----------------------------------
آنه بنت الهادي والناس اتعرفني
مأتمي ابسامره يم العسكري ابني
هالمصايب ما رعن كَلبي وجوني
بحزني بس زينب تظاهت فوك حزني
آنه المصايب والجزن بالدنيه سهمي لا كَبري ظاهر للخلكَ لا ولدي يمي
هذي محنتي اتواسي دمعتي
----------------------------------
العسكري من شاهدت حالة جبدته
امكطعه ابسم العده وتهمل دمعته
ومن اشوف الناس متحضره الدفنته
حسين اذكره امسلب ومرميه جثته
بالسم جبدته امكطعه لمن انظره اذكر حسين النبله وصلت خرز ظهره
تصير امصيبتي اتواسي دمعتي
----------------------------------
لأبو الحجه الحسن من كَربت منيته
روحي ظلت طايفه اتحوم اعله بيته
عينه لمن غمضت رأسن اجيته
او ويّه ملك الموت آنه استقبليته
ناديته ها يالعسكري ودموعي تجري ابلهفه حظني اوليدي حط راسه اعله صدري
وآنه لهفتي اتواسي دمعتي
----------------------------------
الحسن ابني اعله الصدر لمن حظني
بألم جبده اشعر ابظلعي لجمني
كَتله فجعوني ابمصابك حيل يبني
كَمت اون لمصيبته او ون اعله ونّي
يوليدي من هذا الدهر ما شفنه راحه أمن امصيبه لمصيبه غدت تكثر جراحه
النار ابجبدتي اتواسي دمعتي
----------------------------------
ابيا ذنب يوليدي ما رحموا شبابك
بعدك ابريع العمر تسكن ترابك
يبني والملعون من سبب مصابك
يبني قبل الموت متقصد عذابك
يوليدي لمصابك دمع كل عين ساجب حتى الشمس حتى الكمر حتى الكواكب
تبجي البجيتي اتواسي دمعتي
----------------------------------
هالدهر ياناس ليش وياي قاسي
ما شفت لحظة فرح بس المآسي
ابحقد صب كل المصايب فوك راسي
وآنه بنت اطهر بشر لو جان ناسي
لو ناسي اذكره آنه بت من وآنه أم من زوجةُ من لو ما عرفني يسمع الون
يعرف ونتي اتواسي دمعتي
----------------------------------
خادم اهل البيت عليهم السلام
عمار العيساوي الكربلائي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



________________________
لمن يجد صعوبة بالحن اطلبه من
@moatmed1