الدللول.. حظني كشخلك بيهه
الدللول .. ما لحكت احـــــجيهه
حظني خجل// كَماطك سال // وين محسن فاطمه
****************************
ترفه روحك يمه محسن كَماط حظرت ومهد
امنيتي جانت بس اكلك يادلي اللول الولد
فاركتني وحيرتني وياك حظي ماكعد
لا يغرد فوك داري بغيبتك طير السعد
نتظرتك.. ومساهره الليالي
نتظرتك.. حظن اليحبك خالي
جاك الاجل// كَماطك سال// وين محسن فاطمه
****************************
جوه ظهرك ردت امدهه ايدي بس مالحكت
بلا مشاعر حظن التراب أللمك لمن طحت
شهور يمه عشت بيه بهوه ريتي تمرجحت
يبس ريجي من ونيني كبلي ليش استشهدت
وره الباب.. ظلعي اللتقه بمنيتك
وره الباب.. يبني بدمع حاجيتك
ماظل امل//كَماطك سال// وين محسن فاطمه
****************************

ليش صوتك ماسمعته يمه بذني ماهمس
بعتبت البيت نار شبو وبيتي دخان انترس
جذوع بابي وبي عصرني كمت مااجر النفس
بالي يمك وانه اللوجن بصدري بسمار انغرس
صحت آه.. يفظه اتلاحكيني
صحت آه.. فلان العصر جنيني
من المحتمل// كَماطك سال// وين محسن فاطمه
****************************
بيه حسرت ام حنينه بكل مشاعرهه دفو
حظرتلك خظرمايه من حسد عين العدو
بكل صراحه يمه محسن ردتك الزينب اخو
بطاري اسمك جانت اتكول ثلث تنعام وكفو
بديهه.. فصلت زينب رايه
بديهه.. سمتهه بسمك هايه
دمعي نزل//كَماطك سال//وين محسن فاطمه
****************************





جنت اكولن من تناغي يحله وياك السهر
مانسيتك يالغيابك تارك ابروحي اثر
من اذكرك يفز جرحي وانسه ظلعي الي انكسر
حمره عيني وخدي ازرك بجف نذل يمه انسطر
اعرفه.. يمه السلب راحتنه
اعرفه.. الطشر شمل لمتنه
هذا الحصل//كَماطك سال//وين محسن فاطمه
*****************************
بعده وكتك عالمنايه وينك اوين الكبر
ابالي عايش انته واسمك ربي ينطيني الصبر
ياوردتي بلايه عطرك كام مايسوه العمر
من كثر ما عليك انوحن الليل هداعله العصر
اجه الليل.. وانطيته دمعت عيني
اجه الليل.. وياريــــــــــته مايجيني
كلبي جفل// كَماطك سال//وين محسن فاطمه
تمت___ علاء الزيدي