ليش عينج باجيه زينب وماحاجيه
امي وين خويه فدوه احجيلي
امي وين وحشه صاير ليلي
**************************
تلاكيني يوميه من اطب تشبكني واشتمها ومن جفها الزمها
بكل رقه رقه اكلمها
تسميني محبوب الكلب ياروحي اسميها متعود عليها
امي واحن ليها
ومستغرب انه بهل الوظع اعيونج اشبيها ياهو المبجيها
ريحيني وحجيها
خويه شنهي السالفه ليش احسج خايفه
امي وين ونهدم كل حيلي
امي وين وحشه صاير ليلي
****************************
ياخويه لاجمني الكلب هدوم امي جيبيها خليني اشم بيها
ناري شيطفيها
الدار احس ظلمه اصبحت شوامي ماهيه ماسالت عليه
وليش انتي محنيه
عالباب عينج شابحه ياهو الشعل ناره وخله امنه محتاره
وبالظلع بسماره
وانتي خمسه سنينج مربيه دمعه بعينج
امي وين نظره خل تهديلي
امي وين وحشه صاير ليلي
*******************************
يحسين شحجيلك بعد لاتصفك باايدك هناكه امي اتريدك
وصتني بوريدك
كالتلي بالطف نلتقي ونضمد جروحه من ينازع بروحه
وعيونه مفتوحها
يباوع عليج لخيمتج ينظره محتركه وظلوعه منطبكه
وتكتلج الحركه
والخيم ماطافيه يمه اشوفج حافيه
امي وين بالصبر تدعيلي
امي وين وحشه صاير ليلي
********************************
جابتلي طاري المشرعه ومنها الدمع سايل تسولفلي عالكافل
البيده العلم شايل
لمن يطيح عله النهر احظرله ماعوفه اركظله ملهوفه
واستقبل اجفوفه
وكالتلي حظريلج متن مسبيه يردونج وتزرك تره متونج
ولازم يبجونج
من عكب عباسج يشيب زينب راسج
امي وين بشدتي لحكيلي
امي وين وحشه صاير ليلي
*******************************
اذكرها من نكعد سوه تسولفلي واسمعها وامسح مدامعها
وتعصر بصابعها
تلزم اشوف بخنصري وتكلب المحبس بالكوه تتنفس
بجفوفي تتلمس
الف وتسعميه جرح باجر يجرحونك من الكفه يذبحونك
يبني يعذبونك
ميه ماينطونك بخيل ويسحكونك
امي وين ماتجي اتجيلي
امي وين وحشه صاير ليلي
***************************
بالاخر امي تبسمت كالتلي بحجايه شيعتنه وفايه
تسويلك اقرايه
وبمصحف امي فاطمه احجيها كدامك امسجله خدامك
خل يرتفع هامك
باجر مواكب تنصب بسمك يسجلوها والرايه علوها
يحسين كتبوها
وللمجالس رايحه الك تقره الفاتحه
امي وين ويالخدم يبجيلي
امي وين وحشه صاير ليلي
**********************************
تمت
علاء الزيدي