الكاتب علي بيرهوف

تجي مرحلة بحياتك تختفي من حياتك الحلول الوسطية متحب تعيش بمرحلة النص : لو هذه صديقك الحقيقي لو لا
لو صدك تحب لو منعزل ، لو هذه الشغل تحبه لو مترغبة بعد
لو رايد تشتغل من كل گلبك لو واهسك مكسور
بلحظة معينة راح تكبر ومتحب تمثل على نفسك بعد .

علي بيرهوف .

احلى هدية يقدمها البشر لأخوه الانسان يعوفه بحالة
وميتدخل بحياتة .

بعد كل انكسار وصدمة وخسارة بمعارك الحياة الكبرى لازم تطلع بره السياق وتوكف على صفحة شوية ، ترتاح وتاخذ نفس وتسترخي ومتحكم على وضعك بلحظة ضعف ، من تشوف نفسك تعبان لتكول بعد ماعندي واهس للعطاء
من تحس انت مرهق ومالك واهس للشغل لتصور هذه آخر المشوار .
كل السالفة انت محتاج بيها مساحة بيضة مابيها مسؤوليات
هدنة للنفس بدون تأنيب ضمير ، وهذه الشي مو عيب ، كل مرحلة لازم تخلص حتى تبدي غير مرحلة ،
اركض واضحك ونام هواية واكل بشراهة واتفرج برامج تافهة ومسلسلات ، أشحن روحك من جديد شغف وحياة ومن تشوف نفسك اتوازنت راح تهدأ وتضحك وتثكل بتفكيرك ،
لازم تعرف نهاية اَي طريق هو بداية طريق ثاني ، وانتهاء اَي تجربة معناها ماتكدر تنطيك اكثر من الاخذتة منها .
وبالنهاية ماكو شي متتعلم منة سلبي لو ايجابي ولاتجربة تمّر اذا متنطيك درس تستفاد منه بالمرحلة الجاية

‎كل عقل له حد ومقدرة على تحمل الصدمات فإذا زاد الحد تحطمت هذه المقدرة.
سيغموند فرويد .

علي بيرهوف .

اسهل شي يسوي الرجل والمرأة المشوهين نفسياً بعلاقاتهم
على غفلة تشرد منه ، لو يلغيها من حياتة فجأة .
ياخذ البي نصيب منها ويقفل تلفونة ، لو تعاشرة سنين وعلى غفلة تكله ماريدك بدون ماتوضح الأسباب .
محد يقدر السهر والليالي العاشوها ، لو يصون الزاد والملح الصار بيناتهم وميجاوب بعد حتى على علامات الاستفهام .
يقرر هالشي واليصير خل يصير .
طبيعة الشاب العراقي سواء رجل لو امرأة بهالوكت ميحب يحسم
يمكن يحتاج الهيج علاقة يوم او شهر ، غفلة الظروف تتغير ، لو يشوف واحد جديد لأن انتهى غموض ذاك ، ومرات ينجح ويحقق اليريدة ،
الثغرة الوحيدة بهالموضوع اليتغافل عنه ، هو الله مينسى ، الكادر يدير سبع سماوات من فوك مايعصى علّي هيج نموذج
ينطي حجمة واستحقاقة الطبيعي ، يكلب على راسة الموضوع ويخلي يعرف معنى الخذلان والظلم والباع واستهان .
مرات تشوف وحدة فرحانة على غفلة تحس بألم نفسي لو تشوف واحد ماعايز شي بحياته بس عايش بكأآبة 24 ساعة
ماعدهم قدرة على الاستمتاع بأي شي ، يسأل نفسة ليش هيج صاير بيه ،
الصاير بيك هو ذنب ارتكبتة ونسيتة ، گلب مسالم اليف خذلتة وجرحتة بعز ماجان محتاجك ، مساحة بيضة لونتها بسواد نيتك بدون مبرر .
بمعنى ثاني : كل شي سويته بي فاتورة قديمة اجة وكتها .
ترضى ماترضى راح تدفعها اذا مو اليوم باجر ،
فأاحسن ادفعها بوكتها ولتأخرها، قبل ماتدفعها اضعاف غصباً ماعلى راسك ، بفوائد ماتكدر عليها اله
بخذلان وندم راح تشوفة بعينك ،

علي بيرهوف .

شكراً الكل شخصية تافهة خلتني اعرف اتعامل ويه امثالهم بالمستقبل

قبل سنتين لو اقل بنية دزتلي رسالة ، تحب واحد ومتعرف شلون تتصرف وياه ، هو فوضوي شوية ، يوم زين وياها ويوم معذبها
حارت شتسوي وياه ، كلتلي هو متابعك بالفيس وصديقك بالواقع
كتلها الله كريم ويصير خير ، وره فترة بالصدفة حبيبها دزلي رسالة بدون متدري ، كلي اني احب وحدة بس حياتي مخربطة اريدها تتفهم وضعي بس مااعرف شلون انقل حالتي الها .
كتله سوي هيج ، وبدون ميدري اروح الحبيبته اكلها سوي هيج
بقوا كل يومين تجي هي تكلي صار احسن ومتعجبة شلون اتغير ويجيني هو يكلي يوم عن يوم علاقتنا تصير احسن .
الحد ماقرر يخطبها قبل سنة . وصدك خطبها واتزوجها وعرفوا جنت طرف يوم من الايام بكل شي عاشوا ، والفرحني اكثر بولادة طفل عن قريب راح يجيهم عزموني اذا اجه اروح اشوفه واشوفهم
_ عندي طيور حب اثنين حاطهن بالشغل ، متعلق بيهن الدرجة غريبة ، حرصي على اكلهن وشربهن اكثر من روحي ،
البارحة انشغلت مشفتهن خابرت صديق بالشغل كتلة شوف الطيور اذا ماعدهن اكل انطيهن ، كلي ميخالف.
بالليل رجعت سويت عشة ، اتذكرتهن ، خابرت نفس الولد كتلة انطيت اكل للطيور لو نسيت ؟ بقى ساكت كلي اَي انطيتهن
عرفتة ممنطيهن اكل بس استحى يكلي .
ساعة 12ونص بالله الكريم رجعتلهن للشغل القفص حاطه فوك
صعدت اشوفهن لكيت عدهن اكل بس مي ماعدهن ، الماعون فارغ والفحل واكع باقي بي اخر نفس ، ترست كلاص مي ودرتة عليهن اقل من دقيقة رجع الطير نفس وضعة ،
ربع استكان مي رجع طير للحياة وخلاه يكمل باقي عمرة
ونصيحة وحدة جمعت اثنين ببيت واحد وخلتهم يكونون اسرة

ذني اكثر موقفين اعتز بيهن بحياتي
وطول عمري ماراح انساهن ،

فعل الخير هي الصدقة التنطيها من گلبك ❤️

بس بهذه المجتمع يرتبطون بشخص يعذبهم ويبقى بعيد ومن يقترب ويقدرهم يهملوه ويطيح حظه .
هالشي مو نقص ومرض ؟
مو خداع وتشوه نفسي ؟
المجتمعات البقية كل ماتزيد العشرة بيها ، يزيد وياها الود والاحترام
مجتمعات بيها الناس تعرف تستثمر القرب وتستمع بي وتصدر منه للمجتمع نجاح ورحمة .
راح يصير عمري 34 سنة بهذه المجتمع احس بروحي معوق عاطفياً لأن مااؤمن ب الثكل الصنعة ، مااؤمن ابعد خطوة تزيد محبة ، مااؤمن بالسعي يكون للشي المفقود مو للشي الموجود
والناس كلها تطلع عقدها على الغير ، يتشنج ويتصنع ويستغل ويكبت وهو اقرب الك من حبل الوريد بعد الله
يضيع احلى لحظات عمره بغدر وسكوت وترقب ، ادري عليمن ؟
لعد لو جنتوا واحد يكره الثاني شتسوون ؟
الطلع وسافر واتونس ، اذا شاف الحب بره مو هيج خل يدليني حتى اروح اتفرج عليهم قبل لااموت

علي بيرهوف .

الوضع صاير غريب ،
اليتزوج بعقل يفشل واليتزوج عن حب هم يفشل . والطلاك يصير لأتفه الأسباب ، يمكن لأن الزواج صار لأتفه الأسباب
بس بالنهاية عُمر راح يضيع وتجارب تتشوه وتخليك واكف بمكانك متتحرك بعد .
يمكن لأن من الاول منعرف شنو معنى الزواج وشنو الغاية منة بالمطلق .
اكثر الشباب يتزوجون حتى يشبعون رغبتهم الجنسية بالحلال
ويلكون واحد يحضر اكلهم ولبسهم ، ويعيش لحظات رومانسية بالفيس والانستكرام ، واغلب البنات يتزوجن حتى تخلص من بيت ابوها ويصيرلها مكان تحقق بي حلم الأمومة . بس اكو حد لازم نراعيه وندور علّي وميصير غرضنا من الزواج الجنس والخلفة
لازم نعرف اكو طبقة ثانية من التوقعات اسمها البهجة والسعادة والاكتمال .
يعني اَي علاقة مابيها بهجة وتفاهم متصلح ، اَي علاقة بيها تهديد مستمر متصلح ، اَي علاقة مابيها مستقبل وخطة عمل متصلح ، اَي علاقة منفصلة عن الواقع متصلح . اَي علاقة بيها شخص ينطي والثاني يستقبل متصلح ، اَي علاقة متراعي الفروق الفردية متصلح .الزواج نهاية رحلة المراهقة والتشرد
رحلة الوضوح والبصيرة . رحلة الانتقائية والوعي . نهاية الترحال وبداية الاستقرار ، نهاية الوحدة وبداية المعشر ، واتصورها رحلة نصير بيها بمرحلة من الوعي نختار بيها شريك حياتنا وماكو شي اسمة قطار الزواج فاتها ، ماكو شي اسمة ظل رجال
ماكو شي اسمة عوفها وازوجك اغاتها ، ماكو شي اسمة نجرب شهور واذا مااتفقنا نتعاوف ،
اكو مسؤولية وبصيرة ووعي ورجولة ومخافة الله
غير هالامور أبقى عايش بمؤسسة الأحلام مؤسسة الزواج تريد واحد يفكر بغيرة قبل ليفكر بنفسة

علي بيرهوف .

شتستفاد من تكسر انسان كبالك وتجرد ضحكتة الساتر بيها ضعفة ؟
ليش متعوفون التزوجت واطلكت بدون ماتقترحون عليها جان تكدر تتحمل وجهالها يحتاجون اب وهيج راح يتأذون .
هي تدري بهذه الكلام بس ماكدرت تكمل بعد .
ليش متخلون الكبرت ومتزوجت بحالها ؟ بدون ماتذكروها عبرت ال30 سنة .
ماكاعدة ببيتك وشايلها على راسك ، هي تدري الوضع تعبان واكو مئات البنات مثلها وعايشين نفس وضعها ،
ليش ماتخلون الماخلف طفل بحالة بدون ماتقترحون علّي يروح للدكتور الفلاني لأن اكيد هو حاول وراح المليون دكتور غيرة ممنتظر اقتراحكم العبقري .
ليش متعوفون الماعنده شغل والخلفت بس بنات والزوجها يخونها وباقية وياه والميحب شخص وباقي وياه واليضحك من دنيتة والزوجها مات ولبست ملون ، عوفوهم بحالهم مايحتاج تأذوهم
عوفوا الناس بحالها ، لحد يكسر الثاني ، ممجبورين نخلي واحد ضام دموعة يبجي كبالنا ،
كل واحد بينا يعرف اليريدة ويعرف الرافضة ويعرف الناقصة
اذا متعرف تصير قوة وسند لأنسان لتصير سبب بضعفة وكسرتة

علي بيرهوف .

من الله يرزقك ويفتحها بوجهك اخذ الوالدتك فراش جديد تريح بي جسمها الكريم ، وصلحلها غرفتها اذا تكدر تبيضها وتصبغها
وجدد بملابسها اليومية وحذائها الشريف . مرة بطانية ومرة سجادة ، واذا الله رزقك اكثر اجبر خاطرها بقطعة ذهب تجدد بي حيويتها .
وفاجئ والدك بنظارة جديدة غير هاي اليلبسها ، وكل فترة اشتريله شي يحبه ، سبحة لو دشداشة واهتم حتى بجواريبة اليلبسها يومية ، وكل مايخلص عطرة فاجئة بوحدة جديدة
ودواه اهم من المي التشربة .
لتتصور ابد اكتفوا بالحياة لان أكلوا كل شي وشربوا كل شي
وانت أولى بالحياة منهم .
هم أولى بكل شي بالحياة واسأل الناس الفقدوهم .
واذا مزعلك واحد من اخوانك صالحة الخاطرهم ، خليهم يرتاحون على بنيانكم قبل الرحيل .
قبل سنتين غسلت والد صديقي الله يرحمة ، وشفت ابنه يبوس برجليه ويمسح بيها وجهه ، كلت ويه نفسي شكد حلو هالشي بس يصير احلى من تسوي وهم عايشين .
صديق ثاني بوفاة والده كاعد يمي بفاتحتة يبجي ، كلي علي ابوية متشبع من اكلة جان يحبها بس ماجان يطلبها ، مو لأن اني بخيل بس جنت مشغول عنة .
واحد ثاني بالشغل وياية يسولفلي ، يكول رحت للبيت شفت امي نايمة وبردانة ، كلتلة نمت من وكت ومااكدر أغطي نفسي بالبطانية ،

احفظ امك وابوك بلطفك وعطفك ، قبل لتكعد بيوم متندم على كل دقيقة راح تعيشها بدونهم .

علي بيرهوف .

مريم العذراء هي اكثر امرأة اجتمع على حبها المسلمين والمسيحيين وغيرهم من البشر ، اجتها الملائكة كلتلها : يامريم ان الله اصطفاكِ وطهركِ على نساء العالمين . اكو عظمة اكثر من هيج شي ؟
الأنسانة الوحيدة الي اتسمت بأسمها سورة كاملة بالقرآن الكريم
الله خاطبها من حملت بالمسيح وعانت صعوبة بالحمل ( وهزي إليك بِجِذع النخلة تساقط عليك رطبا جنيا ، فكلي واشربي وقري عينا ) شوف الله الرحيم راد يهون عليها من كثر الضغط الصار عليها من كالت ياليتني مُت قبل هذا وكنت نسيا منسيا
الله دللها بقوله تعالى . فكلي واشربي وقري عينا ، ليهمج شي اكو اليباوع عليج ومينساج .
خلاها تهز جذع نخلة بالشتة الي هو مو موسم التمر والمعروف النخلة ماتثمر اله تتلقح بنخل الذكر ، حتى يأكد معجزتة الها من حملت بدون ميمسها بشر مثل هالنخلة .
الدرس المستفاد من امنا مريم عليها السلام ومحنتها بمواجهة العالم ، الي وياه الله ليخاف ،
والله العظيم ليخاف .

علي بيرهوف .

اكو شخص نصيبة اخ حنون . واكو شخص نصيبة صديق وفي
واكو شخص نصيبة زوج صالح ، وأكو انسان نصيبة ابن بار
وغيرة نصيبة ناس زينين .
كل واحد بينا اله نصيب من شي مهم وانحرم من غيره . لأن هاي دنيا مو جنة تاخذ بيها كل شي تتمناه .
انت متدري العنده شي نفسك بي شنحرم من غيره والله عوضه
اتمنى الخير للناس .واتأكد الشي الممكتوبلك متاخذه بالگوة
والشي المكتوبلك متنحرم منه بضعفك بس هاي رحمة الله .

علي بيرهوف .

الدنيا تدور . والتسوي اليوم ماراح ينسّي وينمسح ،
راح يرجعلك كل شي بالملي بالوكت المناسب ،
ومهما تفكر العالم نسوا وغفرولك وانتهى كل شي ، لا
الموضوع متقيد وراح يرجعلك بزمان ومكان وبشخص ماراح تتوقعة .

وباجر اذكرك .

نجحت لو رسبت
كلنا راح نتساوى يوم القيامة

لتصدك انسان يكلك اني مااعرف اكره ، الميعرف يكره ميعرف يحب والميعرف يشك ميوصل لليقين والماكافر بتفكيرة ماواصل للإيمان ، محد يتأذى غيرك اذا تتبره من احساسك لأن سلبي
اقبلة للشر بداخلك حتى تعرف تروضه ، اعترفلة انت اخوه الشرعي ، صديقك وصاحبك الابدي ،
وكتها راح يسمع كلامك واذا كتله كن راح يكن ،
ولازم تعرف البشر مو خطاء لأن يخطئ بكد مااحنه نخطئ لأن خطائين .

علي بيرهوف .

واحنه صغار جنّة من نغلط نتعاقب بس من نسوي شي زين متجينا حجاية حلوة ، لأن جانوا مفهمينا العادي تبقى صح ومتزن .
الطبيعي تبقى ناجح وموهوب وذكي وكل هالامور بس تغلط شلون انت براسك عقل ؟!
من كبرنا وعرفنا الغلط شي حتمي حاولنا نوازن بين مفهوم تربيتنا وبين الواقع . ف لكينا نفسنا واكفين بنص طريق مااله معنى . الي هي منطقة التبرير .
الحمد لله عودنا نفسنا وبمساعدة الناس الداير مدايرنا نلكه مبرر الكل غلطة وبمرور الوكت صرنا اساتذة التبرير . ومن كد مااتقنا هذه الشي نسينا بعد نسوي الشي الصح .
عمري ماراح ارسب بس هي حظوظ . اكيد المادة الاجتي بالامتحان جايبيها من بره المنهج . اكيد المدرس حاطني بعقلة
بس ارسب لان اني مقصر مستحيل .
عمري مااخسر بموعد بس حظي فكر ، عمري مااخسر بالبلي ستيشن لان مااعرف العب ، اكيد الجويستك ميشتغل لو الحكم مرتشي . عمري ماافشل بالشغل بس الادارة تعبانة ، اكيد لو عندي واسطة جان صرت غير شي . بس لو مديري ميحقد علية جان طلعت مواهبي المدفونة . بس شسوي هي هاي الدنيا
بس اني صوجي ؟ لتحجيها عيب عليك .
وحتى يبقى بعلمكم . اني مااغلط اصدقائي . اني 24 ساعة صح . واذا اكو واحد يريد يناقشني راح يطلع مغفل وامة مارايدتة ، اني عندي رد على كل سؤال ، وعندي اسلوب اعرف شلون اغير الموضوع . وعندي اصرار لو تجي عشيرتك مااغيرة
كلامي منطقي واكدر اوجهك واوجه عشرة مثلك . وعندي موهبة من الله بالتأليف . متكدرلي صدكني . اني الصح والتتمناه اَي بنية وأبو شغل وكلية وحياة .
اني المميز
اني عراقي

علي بيرهوف .

ماحب اخسر انسان بيني وبينة زاد وملح وعشرة طويلة بسهولة
انطي فرصة واثنين وعشرة وهذه مو معناه ماعندي غيرة او فارض روحي علّي . بس الفكرة انت من تعرف شخص وتخلي شي مهم بحياتك مو حتى بالاخير تخسرة . الناس تروح وتجي والتقدير يتغير . والتراقبة هسه حتى تحجي وياه باجر تضربة بلوك والتحلم تشوفة بيوم تتمنى متصير صدفة ويصير كبالك وهذه الشي محزن من شخص مكانتة تتغير بداخلك
يصير طيف عابر بحياتك ولاتفكر بعد ويجي على بالك
لأن كل واحد يختار حجمة وقيمتة بأفعالة واختياره

عندما يرحل احدهم فذلك لأن أحداً آخر على وشك الوصول
"باولو كويلو"

علي بيرهوف .

غفران وحيدة امها وأبوها ، سمرة ، شعرها خشن ، وزنها زايد عن اللزوم ، داومت كلية مرحلة أولى ،
غفران بنت اجتماعية ويه البنات ، مقتنعة بداخلها مستحيل تصير فتاة احلام اَي شاب الهالسبب جانت شكد متكدر تتجنب تحتك بالشباب حتى متحرج نفسها ، اكبر شغلة شاغلة بالها هي دراستها ، ابوها عمرة 42 سنة وامها عمرها 36 ،علاقتهم مثل الأصدقاء اكثر من ماهي علاقة اب وبنتة او أم وبنتها ،
يوم من الايام عيونها صارت على شاب حلو وياها بالكلية ، غصب عنها مشاعرها اتحركت تجاهه ، شخص وسيم ، انيق ، وأبو بنات
فرصة هي تخطف گلبة جانت مستحيلة ،حاولت تلفت نظرة بكل الطرق ، توكف يم بنات هو يعرفهن ،تصير كبالة بسنتر الكلية ،
لكت طريقة تحاول تجذبة بيها ، تروح قبلة القاعة المحاضرة تحطلة وردة وكارت بيهن كلمتين مابيهن اَي اسم ، اعتمدت هو راح ياخذ باله يتعجب ويدور ويربط نظرتها بالكارت والوردة بكافتريا الكلية ، هو ممهتم ، بقت تكرر الموضوع بدون فايدة ،
راحت على امها وأبوها حجتلهم الموضوع ،استقبلوا الموضوع بهدوء وكعدوا وياها يفكرون بحل ، الحد ماوصلوا النتيجة نصحوها لازم تعوفة لأن هذه هو الصح وهو اللازم يصير ،
رفضت وبقت متمسكة بأعجابها والكارت والوردة يومية يتكررن ،
ابوها وامها شدوا عليها من شافوها هملت دراستها وعاشت بملكوت الإعجاب من طرف واحد ، كالت اني لازم احب وانحب مثل باقي البنات وآني واثقة راح يحس عن قريب ، يومين والأمور اختلفت بصورة غريبة ، دك باب بيتهم ساعة 9 بالليل ،ابوها جان طالع ، طلعت هي وامها للباب ، لكوا على عتبة البيت ظرف ووردة بيهن كلمتين حلوات ، امها خابرت ابوها صارت نظرتهم عليها نظرة شك وريبة بس هي جانت طايرة من الفرح ، كالت وأخيراً حس ، وره 3 ايام لكت بملزمتها بالكلية نفس الظرف والوردة والكلام الحلو ، عاشت غفران بعالم ثاني ، وره فترة صاحتها صديقتها كلتلها لكيت هذه الكارت علّي اسمج بقاعة المحاضرات
بقت تنتظر شوكت يجي يصارحها ، الحد مااجتها رسالة عالموبايل من رقم مجهول ، قبل الامتحانات كل الكلية عرفت هذه الولد خطب ثانية وياه بنفس القسم ،البنت انصدمت بس الكارت والوردة بعده مستمر يجيها ، كالت منو هذه اليدزلي كارتات ، انشغلت بيهن وبالحبيب المجهول ونست تدريجياً هذه الجانت معجبة بي ، الفضول اخذ كل عقلها ، اهتمت بنفسها وبشكلها حبت هذه الانسان الي هي مشايفتة ، الأولاني راح من بالها نهائياً ، يوم من الايام امها وابوها صارت عدهم شغلة مهمة وسافروا ، بقت وحدها بالبيت ، دك الباب عليها ابو المولدة اجه راس الشهر ، راحت الغرفة ابوها تجيب فلوس ، فتحت باب كنتورة لكت كارتات، ظ نفس الكارت اليجيها وقلم احمر نفس خط الينكتب بيها كلمتين حلوات ، ابتسمت وافتهمت ، عرفت امها وابوها سووا هيج حتى ليحسسوها هي اقل من أي بنت ،حبها الهم تضاعف ، قررت متكلهم وطول عمرها ماراح تجيب سيرة بهالموضوع ، انطوها ثقة بنفسها صارت عدها اهم من جبال من الذهب ، اذا جوابهم الي انطاني ثقة 100‎%‎ اكو شخص يحبني ومهتم بيه ، بس حبهم هذه انطاني دافع للحياة مليون ‎%‎

الثقة تكدر تخليها ترياق الكل انسان ، تكلب حياتة 180 درجة
امشي ووزع للناس ثقة بنفسهم وبنفس الوكت لتضيع ثقتهم بيك
الكلمة والتصرف البسيط ميكلفك شي ، بس يعتبر شي جبير الناس يتمنون امور بحياتهم صعبة عليهم ،

الكلمة والابتسامة بوجوه العالم هي الصدقة التنطيها من گلبك

علي بيرهوف ،

الفيلسوف المعروف سورين كيركيجارد انسان كئيب وسوداوي وكع بحب وحدة عايشة بسعادة وفرح ، راح خطبها ووافقت علّي ، وره فترة فسخ خطوبتة
جان يخاف على روحها الحلوة من كآبته ، ويخاف اكثر اذا يتزوج وينتهي حبه الجبير ، عندة نظرية يكول الانسان ميكدر يعيش الحب والزواج بنفس الوكت ذكرها بكتابة ( إما ، أو )
الهالسبب راد يندم حتى يبقى يحبها ، وره سنة اتزوجت حبيبته ، ظل كيركيجارد عايش وحده ، وكلما مرت الايام زادت تعاستة ، واتيقن اكثر بمرور الوكت، قرار ترك حبيبتة من الأخطاء الماراح ينساها طول عمرة ،
عندة كتاب كلش مهم اسمه "التكرار" يعارض بيها نظرية أفلاطون على مصدر المعرفة ،
أفلاطون يكول : مصدر المعرفة هو التذكر ، البشر مولودين بمعرفة مسبقة وراها احنه نتذكرها بالحياة ، كيركيجارد كله لا :
مصدر المعرفة مو التذكر ، التكرار ، كلما مرينا بموقف يتكرر اكثر كلما تعلمنا من خياراتنا شنو هي الأصح ،
أتصور هذه الفيلسوف العظيم الحياة راح تتواطئ وياه حتى تكرر لحظة حياة يكدر يختارها من جديد ،

ظل على هذه امله الحد مامات بدون ماتوهبه الحياة فرصة ثانية يكدر يصلح بيها خطأه الجبير

علي بيرهوف ،

مو كل موضوع لازم الك رأي وتحجي بي
عادي كلش تسد حلكك وتسكت .