أبوفاضل مَندري شگد هويناك
تره حقنه نِهيم وبيك ننغَر ..
يامولاي غيره وتمشي عالگاع
بشخصيتك لغز صَعب ايتفَسَّر ..
بحيث العلگمي ماچان بيه لون
يزرَگ من يشوفك يَمّه تفتَر ..
إذا هوّ القيادي الداحر جيوش
من يوگف گبالك وجهه يصفَر ..
گبلَك ياهو يدري الموت بيه لون
عله إيدَك اكتشفَو لونه أحمر ..
من تهجم مَتعرُف زيد واعبيد
بهجومك تحرگ اليابس والاخضَر ..
يدوس ببَطن لبوة بعتمة الليل
ومَيجيسه رعب مالك الأشتَر ..
خزَرته وصار وجهه ايشَمُر الوان
تورَّط چي حچه وجاك وتعَذّر ..
أحّر امن الجمر راسك يَمولاي
الجمر يخمد يشوفك يرِد يحتَر ..
من تِطّالَب اتهز السماوات
لأن بطلابتَك حته الله يحضَر ..
عزرائيل يوگف راسه بالغيم
يوگف يمّك ايحس روحه أگصَر ..
يجي كاشخ عدوّك لابس اشكال
سيفه ودرعه هندامه وامعَتبَر ..
يسمع صوتَك ايطِس گلبه بالگاع
أوّل مالدرع يبدي ايتفَطّر ..
يحتار اشيسَوي ايخاف وايريد
ينقذ روحه يلبَس شيله يضطّر ..
يظَل يلمَح خيالك وين مَيروح
من أوّل لآخرت المعسكَر ..
اربات ام البنين وعلي الكرّار
شتطلَع؟؟ لومغامر لو غَضَنفَر ..

الشاعر علي الرسل الجابري