🟥🟥🟥 🟨🟨🟨
Assalomu alaykum aziz yurtdoshlar, hamkasblar va qadrli talabalar!
Barchangizni kirib kelayotgan yangi 2023-yil “Insonga e’tibor va sifatli ta’lim yili” bilan samimiy muborakbod etib, sizlarga ulug‘ boylik bo‘lgan oilaviy baxt va salomatlik tilayman.
Azaldan yangi yil arafasida o‘tib borayotgan yilni sarhisob qilib, yangi yil uchun yangi rejalar, yangi maqsadlar qo‘yiladi. Yakuniga yetayotgan 2022-yilni sarhisob qilar ekanmiz, ushbu yil biz uchun juda omadli va quvonchli voqealarga boy bo‘ldi. 2022-yilda barcha sohalarda bo‘lgani kabi oliy ta’lim tizimida ham ko‘plab o‘zgarishlar, ulkan muvafaqqiyatlar yili bo‘ldi.
Ushbu yil institut jamoasi kengaydi, talabalar soni oshdi, yangi ta’lim yo‘nalishlari ochildi, institutimiz talabalari respublika va xalqaro tanlovlar, sport musobaqalari, intellektual o‘yinlarda ishtirok etib, yuqori o‘rinlarni egallab kelmoqdalar.
O‘ylaymanki, kirib kelayotgan 2023-yil bundan-da sermahsul bo’ladi, barcha sohalarda yangi marralarni zabt etishga imkon beradi. Kelgusi yilda ham bo‘lg‘usi mutaxassislar – bugungi talabalarni jamiyatimizga foydali, o’z sohasida yuksak bilim, ko’nikma va malakaga ega kadrlar etib tayyorlashdek sharafli va o’z navbatida mashaqqatli ishimiz bizga katta mas’uliyat yuklashini vijdonan his etmog‘imiz lozim.
Hurmatli professor-o‘qituvchilar va aziz talabalar! Mana, yana bir yilni tarix zarvaraqlariga muhrlab, yana bir yangi yilga ulkan orzu-umidlar, yuksak maqsadlar bilan dadil qadam tashlamoqdamiz. Mana shunday murodbaxsh damlarda barchangizga Yangi yil barchamizga baxt va omadlar, yuksak zafarlar yili bo‘lib kelishini, vatanimiz tinch bo‘lishini, xalqimizga ko‘pdan-ko‘p yaxshiliklar olib kelishini tilab qolaman. Go‘zal va betakror yurtimiz tinch-osoyishta, olijanob, bag‘rikeng xalqimiz hamisha omon bo‘lsin!
2023-yilning qadami qutlug‘ kelsin!
Yangi yil barchamizga muborak bo‘lsin!
Rasulov Baxtiyor Mahmudjonovich
Andijon davlat pedagogika instituti rektori
✅
@BaxtiyorRasulov
