أحد الأخوان رفيق اخي في السجن طلب مني قصيدة على فراق ابنائه فكانت 👇
المفارك أحبابه اتضيك بعيونه
شلون أن جان ولده الي يودعونه
_____
عين الناس ماترضه اعله من عدها
واحد يصبح احسن منها يبعدها
فقط بس الابو واليعد والدها
اذا بزرته تغلبه تضحك اسنونه
شلون أن جان ولده الي يودعونه
_____
الابو خيمة البيت ولو مشه يحسب
حال عياله شنهو ويبقه مترقب
الابو جلماته حلوه حتى من يعتب
كل احساس ضنه مايخيبونه
شلون أن جان ولده الي يودعونه
_____
وداع وصار هاي ايام زنزانه
يبث همومه لله ويرفع أحزانه
مو وحشة المحجر عاجده السانه
على فراك الولد يلتهب جانونه
شلون أن جان ولده الي يودعونه
______
كبل من جنت اسافر لو كصدت اطرش
بكلبي تضل مناجل بالنياط تحش
هسه شلون حالي والايام تغش
دارت وأنه وحدي وبالي مغبونه
شلون أن جان ولده الي يودعونه
____
ملكاكم هلا والبسمه والشبكه
يبويه الدنيا صارت من صدك ضنكه
زادي وملبسي ولمتنه والضحكه
ماعون الحبس مو مثل ماعونه
شلون أن جان ولده الي يودعونه
_______
يبويه أن شاءالله تفرج وشوفنكم
وفك بيبان كلبي بوسطه اظمنكم
واجي بلهفة مفارك من ابوسنكم
احس من ابتعدتوا روحي مسجونه
شلون أن جان ولده الي يودعونه
______
علي الزهيري القيسي العبسي
فرج الله عنهم
بجاه الحسين عليه السلام