بـابـا 💜
معقولة الموت يحبك أكثر مني ، قدرت تمشيله بالسهوله هذي عجبك حضنه يعني ! ، عجبك التراب وهو عليك !، التراب مش مخليك تشوفني لما نزورك في القبر ، كل مرة نحاول إنحيه بإيدي من غير ما حد يحس بيآ علي أمل نوصلك ونمسك ، باهي يابوي حاول معاي حتى إنت ، معاش تقدر تطلع من القبر حتى لتحضني ! ، قداش ليا ماشفتش وجهك ياحبيبي ، بنتك كِبرِتْ وياريتها ما كبرت ، لما كنت صغيره كنت نقدر نزورك في القبر بس توا حتى قبرك منعوه عليا ، قالولي لا إنت توا كبيرة وزيارة المقابر حرام ، تعالالهم يابوي وقلهم مافيش حد عليه سلطه علي بنتي غيري ، توا إللي يجي يتحكم فيا وبحياتي يا بابا ، كنت قوتي وفجأة مشيت هكي ، إللي يجي ياخد فيا حصة وأني ساكته ، معاش نتكلم زي قبل وندافع علي حقي نشبح فيه يتاخد قدامي ونقعد ساكتة ، هذا لأن قبل مستقويه بيك ولكن توا شن !
من يلي في ظهري ، من يلي حاميني ، مني سندي !

إنت مشيت ورفعت معاك كل شئ للقبر ، حتى ضحكتي وفرحتي رفعتهم معاك ، غطيتهم بترابك

كنت نتخايل في هلبا ناس أن تموت وشن حتكون ردة فعلي ، بس صدقني عمري ماتخايلت موتك
_ هذاكا اليوم وهما يقولولي في خبر وفاتك وفي هذيكا الساعة بالزبط وقف الزمن عندي ومعاش يبي يتحرك لليوم هذا قاعده أني عالقه ، وقاعدة روحي معلقه عندك ...