تعال وغمضه رمشي . تعال اوشيله نعشي
بأنتظارك عالجمر. ما اريدك تعتذر
يابوفاظل. يابوفاظل

الغريب اعيونه تتلفت حسافه
عني ماصدك تمنعك اي مسافه
فاركت وي فركتك لون الترافه
من تجيني ينكسر ضهر الوسافه

ولو طيفك يجيني. عبر صبري حنيني
عالفراش واحتظر ما اريدك تعتذر
يابوفاظل. يابوفاظل
___________
عله الباب عيوني مشبوحه واناطر
ساحكه جرحي بجدم صبري وكابر
هذا ملك الموت اجه. ما بيه اصابر
واهلا اب ام الخدر صوت المقابر

تعال ابداعت امي. امن اشوفك انسه همي
اعليك دمعي والخدر. ما اريدك تعتذر
يابوفاظل. يابوفاظل
________________
نعشي مو اي واحد اليكدر يشيله
بس ابوفاظل كفو النعش العقيله
نعشي يحمل فاجعه كلش ثجيله
رايده اتراب الكبر. بيدك تهيله

اذا تحظر يغاتي. سهل يصبح مماتي
كسر كلبي ينجبر. ما اريدك تعتذر
يابوفاظل. يابوفاظل
_________________________
اني كل اغروب الك ابعث رساله
ويه نسمات الهوه. ودمعي يتلاله
مايجي العباس الج صوت ايتعاله
بلايه عين وكطعو ايمينه اوشماله

عله ريحة حناني. الكمر يعرف مكاني
صحت ودموعي حمر. ما اريدك تعتذر
يابوفاظل. يابوفاظل
_____________________________
يابوفاظل وارد اوصيك ابوصيه
اباب كبري تكتب. أبداعة رقيه
(اه يحسين اومصاب الغاظريه )
وارث اقراها الي وي كل مسيه

زيارة وارث اقره. الي وجروحي تبره
بيها ينزاح العسر. ما اريدك تعتذر
يابوفاظل. يابوفاظل
__________________________________
القصيده/ عله ريحة حناني
خادم زينب ع.
الشاعر الحسيني/ علي الاصبحي