ҚАСҚЫРЛАР УЛЫР.

Қыял теңизимде кеўил тоғайы,
Бир әжеп сезимлер қыйнар удайы.
Тилинде, кеўлинде жалғыз қудайы,
Қалың тоғайыма келесең бе, айт?

Қуяш нурларын да көре алмайсаң,
Шырмаўық шырмалып жүре алмайсаң,
Қыялың изине ере алмайсаң,
Бул тоғай сырларын билесең бе, айт?

Кеўил әндийшели, кеўил түнлери,
Қулазып айныйды усы күнлери,
Азайып кеткендей шадлы демлери,
Кеўил былғасығын сезесең бе, айт?

Кеўил тоғайымда қасқырлар улыр,
Тоңлаған қыяллар қалайша жылыр,
Тырмалап, қаңсылап етимди сылыр,
Мениң бул ҳалымды көресең бе, айт?

Қалың тоғайларда адасып кеттим,
Омбалап, сүрнигип қайларға жеттим,
Қурынып, көз жумып жыллардан өттим,
Мениң тоғайыма киресең бе, айт?

Шеңгеллер тырмалар тула бойымды,
Байыўлы, Үкилер бузар ойымды,
Тоғайлық көрсетпес толы айымды,
Кеўилим тикенлерин тересең бе, айт?

Сағаллар улысар жаным үркитип,
Қорқыныш басады жүрек силкитип,
Жанымды қойғандай мәзи илгитип,
Сол тоғай ишинде жүресең бе, айт?

Қасқырлар жулмалар сорлы денемди,
Қышқырсам муң басар менсиз әлемди,
Өзиңе беремен топыр қәлемди,
Мени қосық қылып жазасаң ба, айт...?

2022-жыл. 25-июнь

Абат Крамов.
Каналымыз;, @Kramov_Abatbay_poeziya