قصيدة في رثاء فاطمة الزهراء عليها السلام
لسان حال أمير المؤمنين علي عليه السلام

يصـعـب غيــابـچ عليّة
مهضومه رحتي منديّة
يازهراء. يازهراء
...........

آنـه حيـدر فاطمــة المجروح گلبه
صعبه بغيابچ اعيش بداري صعبه
شلون حاله اليدفـن بچفّه اليحبّـه
حـالـة العـايـش عُمُر بـديـــار غربه
عـايـش قـهــر يالزچيّة
مهضومه رحتي منديّة
يازهراء. يازهراء
...........

فاطمة وعِشرِتنه مرّت چنها ليله
مو مثل باقي البشر چانت قليله
الله لا ينطي الحسد خِلّ وخليله
منهـو يسمعنـي بغيابچ وشتكيله
عشتي الحـزن والاذيّة
مهضومه رحتي منديّة
يازهراء. يازهراء
...........

چنّتي زهـرة دنيتي ونسمة صباحي
بغيـبـتـچ يافاطـمـة كســروا جناحي
مـن ألـم دنيـــاچ ياطَيبـه استــراحي
وانه اعيش الدنيه بهمومي وجراحي
حبـچ يظـل اصـله بيّة
مهضومه رحتي منديّة
يازهراء. يازهراء
............

لا تظنّيـن ابقـه مـرتــاح بحيــــاتي
انتي روحي ودنيتي وكل ذكرياتي
ادعـي الله يـعـجّـل عليّـة وفــــاتي
ما نسيتـــچ فاطـمـه حتى بصلاتي
لگبرچ اجي كل مسيّـة
مهضومه رحتي منديّة
يازهراء. يازهراء
.........

حيـدر الـكـرار عفتينــي ومشيتي
فـراگـچ شسوّه بعلي شو مادريتي
والله ما واحـــد تـأذّه بگـد اذيتــي
گمت كل لحظة التمر اطلب منيتي
احسـب گـمـت للمنيّــة
مهضومه رحتي منديّة
يا زهراء. يازهراء

سيد زيد الفحام
_______________________