إببدال النخل والبمبر ،
وأشجار النبگ ولیانه الچانت علینه بالشعر تسحر ...
أشوف بكل عجد مشتول جندي ولابس الأخضر .!!
أشوف جنود فوگ الجسر وبرُگبة الغياضي*
أشوف جنود وسط السوگ ،
یبیعون الرعب والخوف وکلمن یشتري يرد لهله مو راضي ...
أشوف الديره مو ديره صُفت مَخفر ،
تفگ واگف إهنا يسئلنه وين
انروح؟
بینه جروح لاتلچمهه وبخاصرة واحدنه ألف خَنجر ...
إهنا چانت بکل طَرّة فجر تگعد معیدیهّ ،
شمس وتبیع نعمه من السمه لکن بصینیّه...
الظَلام بَجیة المعيديّه راح بَمشيه يتعثر ،
تِضَوّي الغُبشه من حدر الغطه لو شرّگت صینیّة الگیمر ...
أشوف جنود بالشارع
بكل عجودنه ،
بأوّل الديره ،
بآخر الدیره !
چنهم خانگین أنفاس کل معبر ..
أشوف الينگل الخضره من البستان للدیره یَدورونه ،
المیسرَ یطِشّونه ،
چَن غیر الخضار ترَبّي البساتين،
چَن غیر المحبّه تربي البساتين ،
يدورونه ويضيج الخاطره النعناع ،
وتتگطّع الخوصه وینحب البربین ...

(*الغياضي منطقة في الفلاحیه)

للشاعر
#حسن_عاشور
سنة١٣٨٧ ش.م
@saLeh_al_naseri