سن سیز منه توی بزمیده ماتمدی گؤزومده
جنت اولا بو دونیا جهنمدی گؤزومده

فیکر ائتمه خیالین چیخا بیر لحظه یادیم‌دان
شکلین هارا گئتسن‌ده مجسمدی گؤزومده

سن سیز حیاتین یوخ منه بیر ذره صفاسی
سنلن یاشایش باشقا بیر عالمدی گوزومده

بیر دم‌ده حساب اولسا کئچن عمرومه آنجاق
سن‌لن گوزه‌لیم همدم اولان دمدی گؤزومده

سن‌سیز منه بیر گون یاشاماق سانکی مین ایلدی
نوح عؤمرو ائدم سنله یئنه کَمدی گؤزومده

دنیا اوزونون جاه و جلالی منه چاتسا
سن‌سیز او جلال و جبروت غمدی گوزومده

سن قنبری‌نین دردی بیر اولسا ائله‌دین مین!
شاهید بونا گؤز یاشلاری شبنمدی گؤزومده...!


#اکبر_قنبری
••••••❥🕊 ❥••••••

🦋 @Turk_Dunyase 🦋