Ye Yint Htet (#yyh)

Feb-16

ရွှေဘိုမြို့နယ်တွင် ​Local PDF အဖွဲ့တစ်ဖွဲ့က ကက်သလစ်ဘုန်းတော်ကြီးအား သတ်ဖြတ်မှုအပေါ် ကျူးလွန်သူများကို ထိုက်သင့်သောအရေးယူခြင်းနှင့် တရားမျှတမှုကို ဖေါ်ဆောင်ပေးရန် ကက်သလစ်ဆရာ​တော်ကြီးများအဖွဲ့ချုပ် ထုတ်ပြန်

စစ်ကိုင်းတိုင်း​ဒေသကြီး ရွှေဘိုမြို့နယ်တွင် ​ Local PDF အဖွဲ့တစ်ဖွဲ့က ကက်သလစ်ဘုန်း​တော်ကြီးအား သတ်ဖြတ်မှုအ​​ပေါ် ကျူးလွန်သူများကို ထိုက်သင့်သောအရေးယူခြင်းနှင့် တရားမျှတမှုကို ဖေါ်ဆောင်ပေးရန် မြန်မာနိုင်ငံလုံးဆိုင်ရာကက်သလစ်ဆရာ​တော်ကြီးများအဖွဲ့ချုပ် ဥက္ကဋ္ဌ ကာဒီနယ်ချားလ်စ်​မောင်ဘိုက ​​ဖေ​​ဖော်ဝါရီ ၁၅ ရက်တွင် ထုတ်ပြန်သည်။

မန္တလေး ကက်သလစ် ဂိုဏ်းချုပ်သာသနာမှ ဘုန်းတော်ကြီး Father Donald Martin ရဲနိုင်ဝင်း သည် ၂၀၂၅ ခုနှစ် ဖေဖော်ဝါရီ ၁၄ ရက် ညနေတွင် လက်နက်ကိုင်လူတစ်စု၏ ရက်စက်စွာ အသတ်ခံရကြောင်း ကြားသိခဲ့ရ​ကြောင်း၊ ထိုသတင်းကြောင့် လွန်စွာ အံ့ဩတုန်လှုပ် ခြင်းဖြင့် ကြေကွဲဝမ်းနည်းရ​ကြောင်း၊  ဤဆုံးရှုံးမှုအတွက် မန္တလေးဂိုဏ်းချုပ်ဆရာတော်ကြီး မာကုတင်ဝင်းနှင့်အတူ ဘုန်းတော်ကြီးများ၊ သူတော်စင်များ၊ ဘာသာဝင်ညီအစ်ကိုမောင်နှမများ၊ Father Donald Martin ရဲနိုင်ဝင်း၏ မိဘဆွေမျိုးများနှင့်ထပ်တူ မြန်မာနိုင်ငံတစ်ဝှမ်းလုံးရှိ ကက်သလစ်အသင်းတော်သည်လည်း ဝမ်းနည်းရပါသည်။ အသက်တာအားလုံးတို့၏ အရှင်သခင်ဖြစ်တော်မူသောအဖ ဘုရားသခင်သည် သင်တို့နှင့် ကျွန်ုပ်တို့၏ စိတ်နှလုံးများကို နှစ်သိမ့်ပေးတော်မူပါစေ​ကြောင်း ကာဒီနယ်ချားလ်စ်​မောင်ဘိုက ဆိုသည်။

ထိုသို့ Father Donald Martin ရဲနိုင်ဝင်းနှင့်အတူ အပြစ်မဲ့သူများစွာတို့၏ သွေးမြေကျကာ အသက်နှင့် ခန္ဓာပေးဆပ်ရခြင်းတို့သည် နိုင်ငံအနှံ့တွင်ဖြစ်ပွါး နေသောအကြမ်းဖက်မှုများ အဆုံးသတ်ရေး အတွက် ဆက်ကပ်ပူဇော်ခြင်းဖြစ်ပါစေ၊ ဤကဲ့သို့ တွေ့ကြုံရသော စိတ်နှလုံးကြေကွဲဖွယ်ရာများမှ သင်ခန်းစာ ယူလျက် ညီအစ်ကိုမောင်နှမစိတ်ထားများ ရှင်သန်နိုးကြားလာပြီး အကြမ်းဖက် မှုများကို ရပ်တန့်ကြပါရန် အလေးအနက် မေတ္တာရပ်ခံအပ်​ကြောင်း ကာဒီနယ်ချားလ်စ် ​မောင်ဘိုက ထုတ်ပြန်သည်။

Father Donald Martin ရဲနိုင်ဝင်း အပေါ်ကျူးလွန်ခဲ့သော မတရားမှုသည် အလွယ်တကူ မေ့ပျောက်သင့်သောအရာတစ်ခုမဟုတ်သဖြင့် နောက်နောင် ဤကဲ့သို့အမှုမျိုး ထပ်မံမဖြစ် စေရေးအတွက် တာဝန်ယူမှုပြည့်ဝစွာဖြင့် ကျူးလွန်သူတို့အား ထိုက်သင့်သောအရေးယူခြင်းနှင့် တရားမျှတမှုကို ဖေါ်ဆောင်ပေးကြပါရန် တာဝန်ရှိသူတို့အား တိုက်တွန်း​ကြောင်း ကာဒီနယ်ချားလ်စ်​မောင်ဘိုက ​တောင်းဆိုထားသည်။

ရွှေဘိုမြို့နယ်၊ ကန်ကြီးတောကျေးရွာတွင် မန္တလေး ကက်သလစ် ဂိုဏ်းချုပ်သာသနာမှ ဘုန်းတော်ကြီး Father Donald Martin ရဲနိုင်ဝင်းအား ​ဒေသကာကွယ်အဖွဲ့ဝင် ၁၀ ဦးက ဓါးဖြင့်ခုတ်သတ်ခဲ့ခြင်းဖြစ်ပြီး ၎င်းတို့ကို ​ရွှေဘိုခရိုင် PDF တပ်ရင်း ၅ က ဖမ်းဆီးစစ်​ဆေး​နေသည်ဟု ​​ဒေသတွင်း အွန်လိုင်းမီဒီယာအချို့တွင် ​ဖော်ပြထားသည်ကို ​တွေ့ရသည်။

▪️၂၀၂၄ ခုနှစ် ဇွန်လအထိစာရင်းများအရ ပဋိပက္ခဖြစ်စဉ်အတွင်း သံဃာ အပါး  ၁၀၀ ကျော် ပျံလွန်​တော်မူကာနှင့် သင်းအုပ်ဆရာတစ်ဦး ​သေဆုံးခဲ့ပြီး နှစ်ဖက်အပြန်အလှန်ပစ်ခတ်မှုများနှင့် တိုက်ပွဲများကြောင့် ပျံလွန်တော်မူခဲ့သည့် ရဟန်းသံဃာဦးရေသည် ရာခိုင်နှုန်းအားဖြင့် အနည်းငယ်မျှသာရှိပြီး ရာခိုင်နှုန်း ၉၀ ကျော်မှာမူ အမျိုးမျိုးသောစွပ်စွဲချက်များဖြင့် PDF များ၏ သတ်ဖြတ်မှုများကြောင့် ပျံလွန်တော်မူခဲ့ခြင်းဖြစ်သည်။

▪️PDF အဖွဲ့များ၏ သတ်ဖြတ်တိုက်ခိုက်မှုကြောင့် ဗုဒ္ဓဘာသာ ရဟန်းသံဃာ အပါး ၁၀၀ ​ကျော်၊ သီလရှင်နှစ်ပါးပျံလွန်တော်မူထားသည်။

▪️၂၀၂၁ ခုနှစ် ဖေဖော်ဝါရီ ၁ ရက်နောက်ပိုင်း ပဋိပက္ခများအတွင်း နှစ်ဖက်စာရင်းများအရ ပျံလွန်တော်မူခဲ့သည့် သာသနာ့ တာဝန်ထမ်းဆောင်နေကြသော သံဃာတော်အပါး ၁၀၀ ​ကျော်အပါအဝင် အရပ်သားသေဆုံးမှုသည် တစ်သောင်းကျော်ထိရှိပြီဖြစ်ကြောင်းသိရသည်။

■ news-eleven