قصائد عباس أديب المالكي

ملجومه روحي وعيني اعله الدرب
وبيباني خضرن من دمعي اليصب
وتاني روحي طارش ضعنهم
ألــم هــجـرهم يـاكـــل بـالكـلـب

المتعوده اعليهم كل عمري
امن عيوني انشالو فد شيله
وجرحو عيني بجرح الفركه
وگلبي ابلا حيل انهد حيله
صبح وليل ابدار حسيني
متعصبة بحزني وأدعيله

بجمرة الفركة والخوف اهل دمعاتي
وادعي ياربي احفظ ضعن ساداتي
من العطش والذبح واليسر جلماتي

ياربي ريته ابسلامة
ضعن الكرم والشهامة
ومامونة أهله وخيامة ،، يا اللهي
،،،،،،،،،،،،،،،،
أم الــبنــيــن الـمـا همني الــبنــيــن
همني وحنيني وفكري اويه الحسين
حرت بزماني بسيد زماني
كــد مــا اتـانيه مــا ضـلتلي عــين

الحدمن تبقه الروح اتاني
الحدمن گلبي اتضل وناته
يحسين الجلمة الماطاحت
امن الساني ونُدباتي الذاته
ياهو اليرحم گلب اتعود
بعيونك يسرن نبضاته

ماردتها الديار الخلت من عينك
يالخذت مني كلشي وتركت الـ(وينك)
اشيسوه حَينه الفكد نعمته بجفينك

مكسوره بيك الخواطر
ياجمرة وسط المشاعر
محروس من يوم عاشر ،، واحسيناه
،،،،،،،،،،
مابين لحظه ولحظه گلبي انعصر
وبروحي ما أعرف شنو الي انكسر
هاليوم روحي مشؤومه منه
عاشر محرم ويلي عالدنيا مَر

بس لا يتحقق البالي
وعطشان حسين اويه اعيالة
وبس لا طاح اليحمي خيامه
وخدر اخته ابعازة كفالة
سَهل يا رب أمر التنشد
عن محبوبك گلي بحالة

حسبة تاخذني وتردني حسبة ولوعة
دوون الايام أصبح عليه مفجوعة
احساسي بلغني حافر دنه اعله ظلوعة

وبلا توقف دمعتي
تجري ولهب من حسرتي
والكون ضج ابنضرتي ،، واحسيناه
،،،،،،،،،،
يا ربي سترك ليش تبچي السمه
وكل حجر شفته ليش جوا دمه
وليش الظلام احتل المدينة
وبگلبي صارت صرخة فاطمة

صرخة المولاتي الي بگلبي
الغيرت حالي وغيرت لونة
عطشان ومذبوح اوليدي
وردو بالخيل ايسحكونة
راح حسينج ياروحي المن
متصبرة ومتشردة ضعونة

ألمن اصبرها روحي ودرت محبوبها
منذبح ضامي والجثة سلبو ثوبها
ودروب تمشي الضعينه فلاهي دروبها

ريت انه ويه العقيلة
امن التله اطيح واجيلة
والطم عليه وأبجيلة ،، واحسيناه
،،،،،،،،،،

يا دهر يالجارح دليلي
لا حيل ضل وأمشي اعلى حيلي
وحيلي من اديه سلبته الكاع

ألكلشي مخلوق اعلى موده
الوحده بقى وعبرو حدوده
وكدره ومقامه يا دهر ضاع

يادهر گلي الحيدر شضام
عَيشته بـ اهات الليالي
منه خذيت الـ ألهه موجود
وبغاليه صوبت غالي
الماطاحن دموعه الا لـ لله
حالي بقى يبچي اعلى حالي

مني خذيت يادهري
كلشي جميل من عمري
فاطمة راحت مني
وصبري جزع من صبري
،،،،،،،،،،
يا دهر هم أذيت مثلي
وهم صوبت خل مثل خلي
حامل تطيح ابردمة الباب

من طاحت الزهره وجنيني
وعيونها صارت بعيني
وحتارت بصبري وبالحجاب

يادهر هم مر بيك فد يوم
أنولت حرمه يم وليها
اولا تكدر اتفزعه ويسل سيف
والكوم ملتمه عليها
اهنا مات حيل جفوفي لمن
للخادمة رفعت أديها

اهنا علي فاضت عينه
اكبال العدو جفينه
ترجف قهر ويشاهد
ما أله ناس تعينه
،،،،،،،،،
يادهر ماخذ مني اهواي
أنسي وفرحتي ونضر عيناي
وبملحك اتصب فوك الجروح

ماخذ وطن ساتر دمعتي
وخانكني يادهري بغربتي
انه العشت بس عشت مذبوح

يادهر من كد غدرك وياي
خليتني اتمنى منيتي
الما ينعد امن الزلم ياحيف
يتجاسر ويجرح حميتي
وحباله تلتف فوك الجفوف
تماده سوطه على ام بيتي

عيالي اصدها بعيني
تبجي وانه امكيديني
المحد لوا جف حيدر
الما ينحسب يلويني
،،،،،،،،،،،
يادهري ايامك عجيبه
شايف بشر عنده مصيبه
وبمصابه محد لفه ايعزيه

لا اهل وكفتلي ولا اخوان
انه ودمعتي وبير الاحزان
ويايومي مدري اشلون اعديه

يادهري ماكو مثلي مظلوم
وهمومه حرمته منامه
انه اليسلم على بشر بس
ماكو بشر ردت سلامه
وماكو اليصبره ويجلي الهموم
وبالبير ضل يدفن كلامه

حزني طفاهه الواني
تبجي عليه احزاني
مو بيتي روحي انهجرت
يا موتي جا شمتاني
،،،،،،،،،،

مالي وقفت على القبور مسلماً
قبر الحبيب فلم يرد جوابي
أحبيب مالك لا ترد جوابنا
أنسيت بعدي خلة الاحبابي

رحمي غريب ومنكسر يا جوهرت روحي
سمعيني صوتج فاطمة وكطعي دمه جروحي
نوحي التسكنينه قبل هسه انفضح نوحي

يا انيست علي في غربته
من مشيتي ولته حسرته
كومي مسحي دمعته الجرية
اخلافج اتنومه حيدر دمعته
،،،،،،،،
نفسي على زفراتها محبوسةً
ياليتها خرجت مع الزفراتي
لاخير بعدكِ بالحياة وأنما
أبكي مخافةَ ان تطول حياتي

علة وجودي فاطمة وحيلي وقوا ايديني
ابلا فاطمة اللحظة التمر صعبة على سنيني
ياضوه عيني وموتج الطفه ضوه عيني

مو علي الي تعرفينه صاير
يمشي بدموعه دلاله حاير
شنسه منج يزهرة حياتي
افراكج الما يخليني اكابر
،،،،،،،،،،،،،،،
كنا كزوج حمامةً في أيكة
متمتعين بصحةً وشبابي
دخل الزمان بنا وفرق بيننا
إن الزمان مفرقُ الاحبابي

كسرو ضلع منج وأنه كسرو أمل عمري
ياصبر لي هَدي علي وانه ادفنت صبري
اليكسر ضياغم بالحرب موتج كسر ضهري

الـ بالحرب أصلب امن الحديدي
اخلافج امن القهر ترجف ايدي
صايم بحزني راح ابقى دونج
عيدي انتي ومشى امن ايدي عيدي
،،،،،،،،،

يا غريبة
اخذي بيه الوين ماعند الله غربه
غربه تنطيني رضاكم
اخذي بيه الوين ماعند الله دمعه
حتى اصيرن انه ذاك الوين مايكعد بجاكم
انت عش بيت النبوه
وانه طير وريشي جرحي
وجنحي دمعات انكساري
كسري جنحي لو طرت انه بسمه ماهي سماكم
واخذي ريتي بعيد عني
لو نوت متشم هواكم

بحبكم انه وهم اضيعن مدري وين
وين اصير انه بلاكم؟
وين اصيرن
وانه عشت بدنيا تركض تحضن اليترك حضنكم
وين اصيرن
من يرحب بيه حزن التايهات ومني يتبره حزنكم
وين اصيرن
لو ابليس بضعنه ياخذني وينسيني ضعنكم
ويخترق عشكي الحقيقي لحد مايصبح موزَيف
دخيلج انه من نزيف الجرح لو جف
دخيلج من دموع تنشف

العين جمارتها دمعه
ومن تطيح الغيركم تذبح طعمها
الحسره كتله امن المشاعر
الما نهدت ليكم تموت ابألمها
الجرح ورده
ومن تشموها يفوح بعطر نزفه
غيركم يكتل عطرها من يشمها

الجرح صيته بنزيفه
ومن يقل صيته يموت
وانه صيتي حسين ضامي
وعايش بوجداني صوت
نيتي لو طلعتني من رحمة عيونه
شلون افوت
صفي يامولاتي نيتي
النيه خطره
لو تحشرك ويـ اصحاب الهدايه
لو تذبحك بالنهايه
مثل هوسه وتنذبح بيد السكوت


يامولاتي يافاطمه المعصومه

بوصلة گلبي خيامك ---- ياغريب الغاضرية
طفك العاش بضميري ---وناصب بروحي عزية
حروفك احبال بحياتي --- جتفت گلبي وأديه
احبالك اتجرني المحبتك--- وصرت اسير ابن الزجية

احبالك انطتني وجاهه
وضبت احبالك ثمينه
اليرخن من جفوف گلبه
هذا حتماً يرخه دينه

الضايك طعم عذابك
بروحه يشتري الغربه
واليعطش بشرابك
بدونه عيشته صعبه
ما اعظمَ مصابك
عند من عرف ربه
،،،،
الشرف والتطهير الله --- صاغه بسمك حتى اكوله
اطهر ابذكرك وابچي --- وينغفرلي بكل سهوله
ابچي والنيه غربتك --- وابچي كد مابيه ابچي
ومن تزيد الدمعة يعني --- زاد مقدار الرجوله

الزلمة لمن يبچي يعرف
شنو اليجرح گلب زلمة
من يطيح بجف عدوه
وياخذ اكبال اهله هدمة

تهظمني ياحبيبي
وانقهر انه القهرك
كل الجره اعله حالك
هذا ابد ماهو كدرك
يمعجب الملائك
من جراحك وصبرك
،،،،،،،،،،
انت سر حير ضميري --- ويسئل بدمعاتي حزني
وسئلتهن دمعه دمعه -- وماكو دمعة الجاوبتني
انت ميزان الوجود ومن طحت كلش تمايل
وانه مايل لجن انت --- بطيحتك من عدلتني

بيا بچي وطيحتك أوفي
الغيرت حالي وحياتي
تنذبح يحسين ضامي
وبالذبح يصبح نجاتي

غير انه ابچي لجلك
ابلا جزاء وعطيه
ليش امن اصبلي دمعه
تملي بالخير اديه ؟
وبجفوفي لازمه انت
وتركت جف رقية
،،،،،،،،،،

قرار المصير ،،، ليالي الضلع
سكوت الضمير ،، فلا بي نفع
لا ما اجامل بـ أي حرف
بهاي الليالي ينعرف
الكايل موالي وانه احب
ثابت يضل لو ينجرف
دليلك يصير ،، حطب لو دمع

قرر المصير واحكم على نفسك بقرار
امر بالنجات بس واحد فعلك اوي دار
لو تطفي نار لو شايل عليهه انته نار

بهل الليالي كلشي واضح
لو دليلك الهه جارح
لو گلب الك مسامح ،، للحركو دار

حدد انته اعرف امرك
بيا درب تكمله عمرك
لو عدوهه جهره سرك ،،لو صاحب ثار

يانُدبتي الوحيدة ،، يافاطمة الشهيدة
،،،،،،،،،،،،،،،،،،،،،،،،،،،،،،،،،،،،،،
احملت ياقرار ،،، اتبعت يا اصل
العشك اختبار ،،، نجاحه بفعل
مو جلمة ( ألحب) لا جهد
لو شوك زرعك لو ورد
لو جدمك يكمل الدرب
لو لا اقل نصه ويرد
وألك بختصار ،،، دليل العقل

كل بشر على نفسه بصيره والعالمة
اختبرهه روحك ويه رزية فاطمة
بفاطمة المصير لو سوء لو حسن خاتمة

مو عبث تره انخلقنه
المعرفتهم انوجدنه
وللجره عليهم احنه ،، نتأسى دموع

ألمن اعرف الي صاير
اليا سبب ولينه حاير
وعالحصل دليله صابر ،، صابر مفجوع
،،،،،،،،،،،،،،،،،،
أساس العطاء ،،، فياض الرحم
تزيلُ الجفاء ،،، تدوم النعم
أم الانوار الساطعه
ام النجوم الامعه
من الله حبهه منفرض
ولية أمره وذارعه
ابسجلهه اغنياء ،، لَونه خدم

وبسجلهه ريت اتسجل خدوم و وفي
ومالي بالحياة بس انه برضاهه اكتفي
الدمعه ما نشف عالحالي اتسجله موقفي

ما يهز عصف قراري
ورافع اللعن شعائري
وثار الزجية ثاري ،،، وگرب هاليوم

عالذي بعد أبوهه
ابلا حميه عذوبهه
وبطفلهه مرمروهه ،،، ميت مدموم
،،،،،،،،،،،،،،،،،،،،،،،،،،،،،،
على ام الحسين ،،، كلامي بشجن
اعله حبلُ المتين ،، دموعي جرن
الما رف اله جفن بحرب
من ايده حكه ينغصب
جرحو جرح غيره علي
وجرحو بعد جرح الگلب
بقه ابلا معين ،، غريب الوطن

الما لوو اله ذراع ومن أسمه ترتعب
بيته يحترك بجف ماله نسب ينسب
وطايح الحبيب بدمه ويرجف المحب

عالكسيره والحزينه
بغيضه ترتجف يمينه
ومالكه بشر تعينه ،، وتوكف وياه

الأرض ضاكت وسمائه
وقله تتبع ولائه
علي انجرح كبريائه ،، وعايش ع اه
،،،،،،،،،،،،،،،،،،،،،،،،،،،
دموع النحيب ،،، اعله خدي جرت
مواسي الغريب ،، بغريبه انقضت
عالماتت بلوعه وهظم
نواسي علي بدمعه ولطم
بت أحن مخلوق انخلق
من بعده أبد ما تنرحم
جرح ما يطيب ،،، على ام البخت

سيدة وجود اخره والدنيا ترتحل
بظلع منكسر والعين الحمره بالفعل
ومحد انشغل بيهه بس علي منشغل

الما تهنت بعمرهه
ماتت امن اثر كسرهه
وبالسر انحفر كبرهه ،، وتندفن ابليل

وياعلي وعظم مصابه
بموتتج بده اغترابه
فراكج الصبح عذابه ،، ومهدود الحيل
،،،،،،،،،،،،،،،،،،،،،،،،،

يكفال العقائل ياورث حيدر
يا نعمة الزهره وعين رحمتها
هنيال الرجوله التنكسر يمك
كلما تنكسر تزداد هيبتها
وهنيال العيون الضمت عيونك
التضم عينك شرار تصير دمعتها

ياگمرنه الماصح مثيله
روح اخو وحزامه ودليله
والهوا التشتمه العقيلة ،، عباس

يا فخر الاخيام وضواها
وانته نسمة حب ابهواها
والغضب الي حل من سماها ،، عباس

ريشاته اعله راسه هنه فقاره
فارس مثله ماكو عيونه بتاره
الغاره اهيه الترفع راس قائدها
وبسم عباسي ترفع راسها الغاره
،،،،،،،
يميزان الشجاعة الما طغه مره
يشراي الصعاب بضحكة سنونه
شكو حنيه من عباس مخلوقه
واصيار الغضب من برقت عيونه
اليلاكون المنيه وحارين صدور
من عرفو نزل رفضوا يلاكونه

يافحل ومبچي الفحوله
الاسمه صوله ونضراته صوله
الما تلمه عيون اعله طوله ،، عباس

شيطلع المدربه الصميدة
الحومه من جفوفه طريدة
سطرة الله المتجليه بيدة ،، عباس

الخف يمه انجرح واليثكل داسه
ويـ راس الكمر ياهو الحط راسه
الفارس لو سمع طب زود السادة
كبل اجدامه تشرد منه انفاسه
،،،،
الكمر ما تنحصي بالزلزله فنونه
يحير ما تلمهه اعقول اوصافه
لامن قبله لامن بعده اجه فارس
اشما شد الوطيس اتبسمن شفافه
المن يلگد مهرته أسرع امن النور
بحيث الجيش مات ومالحك شافه

اسرع امن الضي من يحارب
غصن ويطك بيده الكتايب
وشاربه شكد ذلهه الشوارب ،، عباس

دخيله يا ناموس الهواشم
السيفه نار ايلين الصوارم
المحد اندك بي بالملاحم ،، عباس

دگ طبل الحرب من اجدحت عينه
والضل واكف اكباله الله اليعينه
صوت اصوابه يوصل الاخر واحد
دخيله الما يثني اصواب جفينه
،،،،،،،،،،،،،،
الامربي علي من زغرة عالكلفه
متهز شعرة من اشواربه الحومة
الامرجف العظام ابلهب ذاك الكيض
وسن ابسن تطك ورواح مهزومة
حكهم ال هاشم بيه يفتخرون
الطف ابنضره منه غير ارسومة

مثله ياعم شيم عمامه
وتفتخر يم ذكره الامامه
هذا سر تكوينه الخيامه ،، عباس

الطف حنه اخواصرها ولواها
برمشه من عيونه كضاها
لولا امر الله جا محاها ،، عباس

كر بيها الصفوف ابشرده معروفه
حد ما وصل الميدان للكوفه
ما منطيها لحظه اتجر نفس منه
وبوجوه الضياغم خلد اجفوفه
،،،،،،،،

بيه صرخت شوگ تكتل
بيه عبرت بچي اتنز منها الثكالة
وبيه جرت ااااه منها الحزن يجفل

بروحي خنكة شهم
حكه انوخذ منه
وبيه ونت فاجده اوحيد الها
ومتانيته يجبل

شمس هجرك صاهرتني
برودت عيونك متى اعله الذايب اتحل
بروحي كل الحچي مطشر
وبس ضريحك يلم بيه الحچي ويعدل

ذالني افراكك مذله
واليحب
مصرع الشوك ايجبره عالذل

الشوك لو يعرف معانات اليصيبة
جا برا ذمته وكتل روحه
لأن ماضنه يحمل

اتعره گلبي وانفضح استرني بيك
ثوب ملكة الگلبي فصل

بيه ركضت ملكة افَحط جم غزاله
انت بس كلي تعال
يالرئفتك سبت گلبي
يالحنانك تارس عيون الغزال
مشهدك قمت جمالي
يالعبيرك فاق مرحلة الخيال

يامهيج گلبي هاج ايريد عطرك
الهوا بلا عطرك مصاب
وحنت دموعي تطيح بحضن بابك
الدمعة من اتحن تعيش اقسى عذاب
واصفن اعلى اسمك وموتن ملكة بيك
انه اخلافك
عايش بغربة سؤال ابلا جواب

روحي محتركة عليك ونارها حركت حمامي
الماي من غيرك حطب ويزيد ناري
شلون تطفى بغير مايك يا امامي

وكمت ويـ دخان روحي
ابعبره اسولف
يادخان الروح سافر
وحط رحالك يم حبيبي
وطوف يم ذيج المناير
ورفع جفوفك توَسل
كله عبدك ضال حاير

كله كلشي بروحه حنضل
كله كلشي ايطيح يمك
من ترزقه يصير زاير


ياعلي ابن موسى الرضا💔

يشرع الحب والانسانيه والاحسان
يحنيه الي ما تتخطى اي أنسان
صرت مولاي، ،،حزن رواي ،، وحيا للماي
حياة الكل عذب بس للأسف عطشان
،،،،،،،،،،،
من گلبي وبالي ،، غيرك ماكو غالي
يا مثل الـ إله الدنيا ماعرفت عظمتة
معشوك الجلاله ،، بحنيتة وكماله
ونعمة الله الحسين البشر لمهه بنعمتة

لكيته ،، حب مستفحل بجرحه وحزن كله عباده
لكيته ،، امن الاشي دمع يخلقلي شي ينطي الاراده
لكيته ،، گلب أبيض تلكاني وشبگ گلبي بسواده

يعيشك ياجمال وتحملك يا روح
يما مقسوم احبك وانته مامجروح
أحب ثنين ،، الجرح وحسين ،، يبيت العين
يستر الله السترنه وضل رمي وعريان
،،،،،،،،،،،
تصدم جاذبيته ،، الماضيعنه بيته
المدلي اعله بيته بدمعه الطيح الدلاله
حب غيرلي حالي ،، حزن زيد جمالي
مثل ما جرحه ودمومه بعد زيدت جماله

عجيبة ،، يتشوه جماله الينجرح تذبل صفاته
عجيبة ،، بس حسيني بجروحه وطغت اكثر حلاته
عجيبة ،، ضد كل القوانين وعكس كلشي بحياته

قوانينة عكس محبوبي گلبي ايذيع
يدلي الدنيا كلهه البالحسين ايضيع
غربته حياة ،، وذبحته نجاة ،، وصاله ممات
كمال الحب ممات بدربه هالعنوان
،،،،،،،،،،،،،
أسرني بحنانه ،، وأمني ابأمانه
عتق مني ضياعي ووضح الگلبي مصيره
هلكد مارحمني ،، أعصي وما عتقني
ماشايف مؤسر هالكثر راحم اسيره

خايف ،، گلبي يستغل هالرحمه ويضل بذنوبه
خايف ،، يلجئ مره ليك وما يحصل تالي توبه
خايف ،، وأنسى ضعونك وكل خيرك تصير العقوبة

دخيلك انه من نفسي وهوا اللذات
ودخيلك گلبي لو مو عالجرالك مات
انه البحماك ،، اخذني وياك ،، انه ابلياك
بروج الدنيا اضل طول العمر غركان
،،،،،،،،،
يالبيه أنت ساكن ،، وبـ أغلى الاماكن
بگلبي مسكنك لاكني ما راضي عليه
من كل گلبي اكلك ،، مولاي اعتذرلك
لم أحُسن ضيافك بالگلب يبن الزجية

حبيبي ،، ميليق الگلب بيك وخفت يشبه سهامك
حبيبي ،، أطهرنه شوكت دلالي ويليق بمقامك
حبيبي ،، أأعني بـ تأدية حقك بحق كسرت خيامك

دعيتك خالي ما املك سوه الدمعات
و ترد داعيك انت سيدي هيهات
الك مديت ،، جفوف وجيت ،، انوح البيت
الطاح اعله اهلك وضلوا بلا صيوان
،،،،،،،،،،،
بكل حالي وقصوره ،، بس گلبي وشعوره
الغيرك ما يميل وماجزع بس اعله حالك
من فرغت ضعونك ،، جرحوهن عيونك
ويلي بخطة الحومة فلا مسند بقالك

بجيتك ،، يالتستاهل اكثر من مناحتنة وبجينة
بجيتك ،، ضامي وما بقاك أحد يرد عن الضعينة
بجيتك ،، نايم عالترب عن اخته ماداراهه عينة

منو المثلك تحمل كل عذاب الصار
منو المثلك نضر اهله ابلهيب النار
عزيز الكوم ،، مابي يكوم ،، وخيول تحوم
ومن سيف الذبح اقوه سبي النسوان
،،،،،،،،،،،،،،،

ردن من سفرهن عاد
بس يا رده ردتهن
ردن مو مثلهن ليش
وأبد مو حاله حالتهن
ضعن مابي شبه بالراح
اولا بي صوت خوتهن
الهيبتهن ابو السجاد
اجن وبلاية هيبتهن
بضعن طلعن يهابه الريح
وكافل حيد يحرسهن
بكل رفت علم يندار
المحاملهن ويفكدهن
ياكبره الضعن من راح
ويا هيبة محاملهن
رجع ينعد ابنضرة عين
بضعن ملموم رجعتهن
ضعن خطواته بسم الله
ونوگ بغيره خطوتهن
رجع والتحدي بي اهات
وأبل تمشي اعله ونتهن
منهن كلشي ما معروف
اولا جن فاطمة امهن
محتركات خوه وجااه
ودمع ماشرح هظمتهن
راحن رافعات الراس
واجن محنية كامتهن
حناهن درب المعثرات
مشي الجتال تعبهن
رجعن والتميل اطيح
مامش حيل يسندهن
عطشانات ماي وراي
الما مكسوره جلمتهن
علويات مامونات
والله ابستره ساترهن
الما يعرفهن الضي دوم
الستر يتستر ابضلهن
كشف ضلهن نهار الشام
وفضح جوهرت دمعتهن
ارقام اعمار ضعن حسين
باب الساعة غيرهن
طفلهم صار شايب غاد
وحرم من فشلته سلهن
غريبات بسبي وديوان
وما تخلص مصيبتهن
ماتخلص ابطلعت روح
القيام الساعة غربتهن
ردن ضيم يشبك ضيم
ونواعي وأه مأكلهن

شما مرت سنين ،،
وشما اجن وشما راحن ابقى انه الحبيبي حزين
وأصرخ ياحسين ،،
ديني بيا حسين أنه اشوفه وكلمن هالخلك إله دين

بعمري وما ملكت بهاي
الدنيا ابقى انه وي مولاي
ومذبح عشكي يبقى الماي ،، يحسين

گلبي ومناجاته ونيته
ايضل بخدمته وتعزيته
وينحب عاليحركوا بيته ،، يحسين

ما ميل الغيرك لا والخيام ،، والحب حرام ،،
اذا من دونك
ومو فترة اوياك اعيشن حياة ،، يالعالفرات،،
بجيت عيونك

حبيبي ياحسين
،،،،،،،،،،،،
ميثاق الدموع ،،
من عيني أخذته الزهره ورزقتني اويه ذكره
خشوع
ورزقتني الخضوع ،،
المحبوبي وأسعى الخدماته وبمجلس عزائه جزوع

عمري بدونه مامحسوب
أيامي بخدمة المحبوب
ابنار الخدمة گلبي ايذوب ،، يحسين

تسوه الدنيا والمابيها
امن اخدمله ودموعي اجريها
وأذكر غربته وأنعيها ،، يحسين

اتلمنه ابلمت حروفك ياغريب ،، وبيك النصيب ،، تفيض جروحي
يالصوت امك يعلى بكل ضمير ،، بذاك الهجير ،، ايا مذبوحي
،،،،،
يالحبگ هـَواي ،،
يالي أنت انجمعت بروحي أنت جرحي وأنت دواي
واقع مو مُناي ،،
ماتبرد دمعتي عليك ويذبح گلبي طاري الماي

جروحك بالضمير اتخوض
امصابك عالگلب مفروض
بدونك أي دمع مرفوض ،، يحسين

يالوحدك بكيت اتحامي
مجروح وتصيح اخيامي
ضامي يابوالاكبر ضامي ،، يحسين

أبچيك انت الضامي المارووه ،، والتعبوه ،،بغدر عدوانه
يالطمة اتوفي وصار الي صار ،، بذبح الوقار، يشب صيوانه
،،،،،،،،
لخيامك أسير ،،
ألبين همها جوه عيوني بوجداني جمرها يغير
العكبك يا امير ،،
ماصح اليدافع عنها وعن البيها ماكو مجير

من ضهرك نطيته الخيمة
ارماد الخيمة عبه الهيمة
وعالعيلة الجمر ذب ضيمة ،، يحسين

احبال الدنيا ريت انكطعن
اولا خدر عفافك طلعن
بين اهل الردا من فرن ،، يحسين

طلعن بس ياطلعة امدللات ،، نار وحفات ،،
اعله كبر الصحره
من فرن عالدنيا اقرة السلام ،، المنوه شام ،، طلبهن قصره
،،،،،،،،،،،،،