#ليلة_مسلم "ع"
بين حميدة ومسلم "عليهما السلام"




اصبر شلون .. والعيون .. تسولفلك دمع
بنار الاشواگ .. والفراگ .. ذبت مثل الشمع
اغفه ويصحّيني
طيفك يناسيني



انت ذاك الچنت كل ذكرى سعيده
الما تأمّن ايدي إلّا بلمسة ايده
ما تفرّح گلبك اخباري الجديده
إقره .. حتى اسمي (وحيده) مو (حميده)

غربتي جفاك .. يويّاك .. اعيش اسعد بشر
والدرب ضاع .. على الگاع .. ولا منك اثر
باقي ويسلّيني
طيفك يناسيني



دمعي احمر .. راسي ابيض .. وآنه طفله
والموادع خطوة خطوة .. عِلّه عِلّه
بيدي اتلمّس ابگلبي .. ميته عدله ؟
والهوى امن الكوفه جاي .. اعليك اساله

ابرودة الصيف .. (هلا) الضيف .. أبويه يا هوه
الچان للروح .. دوه جروح .. واعز من الدوه
من عمره ينطيني
طيفك يناسيني



بويه والله الحچي مُر بغير (يابه)
ليش احس الكون سد بوجهي بابه
امشي وابچي .. الشافني ايگلي بغرابه
هو إنتي بنت مسلم لو سحابه

بدمعة العين .. صحت وين .. يگاطع بالگلب
ابين الأعراب .. عالتراب .. انام اعله الدرب
نار بشراييني
طيفك يناسيني



ليش عمي حسين يا بويه .. انظره
شما يصد للكوفه يلزم بيده ظهره
بلا حبال چفوفه بس مدري اشيجرّه
بويه كل ساعه وصفگ يمنه اعله يسره

مدري شيگول .. بقه ايجول .. وسط گلبه فطر
امن المهر طاح .. والصياح .. (حبل .. مسلم .. قصر)
چنّه يحاچيني
طيفك يناسيني



عمي اسأله عليك ويجاوبني سكته
وافتهم يا بويه كلشي من دمعته
بس اگولن مو ابوي الينسه بنته
حتى لو ميّت يفرّحني برجعته

والله هيهات .. واذا مات .. ولا أيّس ابد
هاشمي وگال .. على أيْ حال .. يوفّي بالوعد
ميّت يوفّيني
طيفك يناسيني



عمي اجاني .. وروحي حسّت بالهظيمه
من مسح عالراس بچفوفه الرحيمه
گمت احس الهوه يخنگني نسيمه
ليش من دون البنات آنه يتيمه

آخر الليل .. بلا حيل .. اگعّد إخوتي
ننعه المصاب .. عالتراب .. واصيح بدمعتي
يا ضيعة اسنيني
طيفك يناسيني

**

احمد هادي الشمري