1-асар, 13-саҳифа (1.13)
Эртаси куни ҳаммаларини ҳовлининг орқа тарафидаги бошқа бино ичига олиб киришди. Бу жой ҳам жуда катта экан. Йўлакларнинг охири кўринмайди. Сержант уларни аудиторияга бошлаб парталарга ўтқазди. Аудиториянинг мактаблардаги синф хоналардан фарқи деярли йўқ эди. Ёзув тахтаси, ўртада муаллим учун ажратилган стол-стул.
Бугунги муаллим ёши олтмишларга бориб қолган, калбош, истарали бир эркак экан.
Салом-аликдан сўнг мақсадини маълум қилди:
- Мен сизларга бугундан бошлаб чўнтаккезарлик фанидан дарс бераман.
Курсантлар гурр этиб кулиб юборишди.
- Ҳа-а, ҳозир куляпсан ҳамманг! - муаллим жаҳли чиқиб, қўлидаги таёқчани столга урди. - Аммо машғулотлар давомида кулишга вақтинг қолмайди. Бу касб сенларнинг келгуси хизматингда асқотади, аҳмоқлар! Агар чўнтаккесарликни профессионал даражада эгаллаб олмайдиган бўлсанг, юз фоиз кафолат бериб айтаманки, хизмат пайтида итдай ўлиб кетасан. Шундай экан, тилингни тийиб менга қулоқ сол!
- Ўзи бизнинг хизматимиз нимадан иборат бўлади? - орқароқда ўтирган курсантлардан бири муаллимнинг очиқ кўнгил эканини пайқаб савол ташлади.
- Бунинг сенга аҳамияти йўқ. Хизматни бошлаганингда билиб олаверасан. Ҳозирча дарсларни қойиллат!
Муаллим бир соат давомида чўнтаккесарликнинг сирлари ҳақида гапирди.
Иккинчи соат эса амалий машғулотлардан иборат эди.
- Қани, олдимга кел! - буюрди у олдинги партада ўтирган Мадалини қошига чорлаб. - Қўрқма, чиқавер.
Мадали секин муаллимнинг қаршисига чиқди.
- Қани, бармоқларингни кўрсат-чи! Оббо, йўғонлигини қара! Сен ҳали мана шу беўхшов бармоқларинг билан ўғирлик қилмоқчимисан? Йўқ, бунақаси кетмайди. Ҳақиқий чўнтаккесарнинг бармоқлари қизларникидан ҳам ингичкароқ, нозикроқ, узунроқ бўлиши лозим. Ўшанда бировнинг чўнтагини бемалол титкилай оласан. Кейинги дарсдан бошлаб бармоқларни ингичкалаштириш билан шуғулланмасак бўлмайдиганга ўхшайди.
Курсантларга бу дарс жуда ёқиб тушди. Айниқса, Мадали болалигида ўғрилар ҳақидаги турли афсонавий ҳикояларни кўп эшитган, ўзи ҳам ўшаларга ўхшаб уста ўғри бўлишни хаёл қилиб кўрганди.
* * *
Каналга уланиш 👇
@akbarugli_aziz