غزل

د احساس د بغاوت هڅې څپاندې
پرې تړلې مې د غوڅې مینې مراندې

د شاهانو په دربار کې هم ملنګ یم!
خو ساتلې مې دي هیلې لالهاندې!

یه حاکمه لا هم نه یې توانېدلی!
هدف مخکې دی یو دوۀ قدمه وړاندې!

د جنون پېټی په غبرګو اوږو بار وړم!
خلک وایې عجیبه کارنامې کاندې!

غبرګې لپې مې کچکول درته نیولي!
خدایه وکړې پېرزوینې په ما باندې!

دې کمال ته دې حیران دیران یم پاتې!
له زړۀ وینې څڅوې خو په خولۀ خاندې!

رنځ د زړۀ باندې دې هجــــر مبتلاء کړ!
خوار منصور ملنګ تر اوسه وهي ساندې!

منصور ملنګ