مقدمه
شو وحدك جاي. من يم الماي. اسأل يحسين
وين الوفاي
**
شو راجع ومحني الضهر. والدمعه غارك بيها
شو تلتفت للمشرعه. شمضيع انت اعليها
ايدك يخويه عله الضهر. يابو علي مخليها
كلمة وداع وي الگمر. ياخويه لا تحچيها

گال الها وصاح. يازينب راح. خليته اهناك
وجروحه هواي
**
طايح لگيته عله النهر. ينزف عاالمسنايه
ورايته چانت في الچ. طاحت هذيچ الرايه
اسمع احچايه ويختنگ. تجزيني چم احچايه
گالالي خبرها الگمر. يسلم عليچ هوايه

منچ خجلان. ويتعذر چان گال ابقه اهنا
ومارد وياي
**
وديني يم المشرعه. خليني اشوفه وارجع
عباس اخوي وكافلي. المثله ما يتودع!!!
بلكت الحگ بيه نفس. ومن عنده كلمات اسمع
باالخيمه مو كافي البچي. گباله بواچي ارد اشبع

ارد احچي وياه. وشبگ فوگاه. بعدك شيصر
سولفلي بهاي
**
انه اخته من حگ الاخت. تمشي لخوها تودعه
عشرتنه راحت للأبد. ذاك الوكت شيرجعه
راحت ليالينه بعد. ارد امشي يمه وانعه
وبلكنه يسمعني ويفز. يمسح بديه الدمعه

يمسح ياعين. ماضل چفين. ضلن عاالگاع
ياضي عيناي
**
من بعد عباس البطل. راح العمر وسنيني
من شفت طيحت خيمته. هاالموقف يبچيني
ساعه وعدوه بكل قصد من يمه و يمشيني
ياهوه ذاك العاالنهر. يازينب يحاچيني

وانه عله النوگ. گلبي المحروگ. اتلفت ليه
وندب رجواي

سعد العبودي