يالنمت عالمشرعة والچفوف امگطعة
من يباريني يخوية ردلي عباس
*
نار شبو بالخيم رعبوهه الاطفال
خوية گالوهه علية الصعبة تنگال
عمري محد شاف مني حته الاخيال
شمر هسه بالضرب بمتوني ينهال

هسه امشي اوية الغرب طامة اهدومي الترب
هضمة ذاك اليوم خوية لا متنقاس
من يباريني يخوية ردلي عباس
*
وسفة رحت اميسرة و واعدني انتة
لو وصل واحد اضعوني ايموت سكتة
بروحتك والله يخوية المر جرعتة
ماحسبت المثلك ايهد هيچي اختة

اكفلت بعدك عايلة والمدامع هاملة
وانتة چنت ابروسهم ياخوية وهواس
من يباريني يخوية ردلي عباس
*
گلبي ضل عالمشرعة و روحي الجهالي
هاليتامة الأبد ما ضل الهه والي
ريت لو تنضر يبو الغيرة اعله حالي
بليلة ودعت الوفة وخدري ودلالي

بالعليل امدولبة وبالنساء امطالبة
متني زورگ والعباية ابلؤم تنداس
من يباريني يخوية ردلي عباس
*
تدري بختك تكره الليل وضلامة
روحي عگبك فرفحت مثل الحمامة
وذولة ابد ياخوية ماعدهم شهامة
حايرة ابروحي اضل لو باليتامة

مشو اختك عالجمر منهم الفزعة انتظر
صحت بسمك ضحكو اعلي ذولة الارجاس
من يباريني يخوية ردلي عباس
*
موش الية الدنگة بس مجبورة ادنگ
راسك وراس الحسين اگبالي يمرگ
نار البگلبي يخوية النار تحرگ
ماكو گصة اتشوف حالي وعيب تعرگ

ناس ابد ما تستحي حرگو اخيام الوحي
وآنه گوه اشهگهه صرت اليوم الأنفاس
من يباريني يخوية ردلي عباس
*
للشاعر مصطفى النوري