عباس. عباس. عباس. عباس
**
شال الجود يريد الماي. كافل زينب والوفاي
والمشرعه اتعناهه
فارس متحدي العدوان،،سبعين الف والفرسان
بأصعب وضع خلاهه
انفاسه چن نسمة صيف،، يتنومس بچفه السيف
راعيه بيه يتباهه
من عنده محتار الجيش،، يلاگون ابو فاضل بيش
نجم الضهر راواهه
عباس عباس. عباس عباس
**
چنه علي داحي الباب، وروس سواهه اگراب
ورواح ضلت تطلع
وينه اليلاگيني يصيح، وصفوف گدامه اتطيح
والسيفه ضلت ترگع
ياكل رگبها البتار. مثل الحطب وي النار
لايقنع ولا يشبع
حتى الهوى باالطف راح،، وين الزلم لمن صاح
الماسمع خل يسمع
عباس. عباس. عباس. عباس
**
جوده بأيده ويحاچيه. غصبن عليكم امليه
فنه الوگف گدامي
ماخذ عهد اله اوفيه. ومزامط امزامط بيه
بالماي ارد لخيامي
مو مره ارجع مرات. والنهر باالخيمه يبات
مايبقه واحد ضامي
ذاك النهر يرجف گام،، مايدري عباس اشظام
خله المعسكر دامي
عباس عباس. عباس. عباس
**
دخلها عباس انذار، شي سفراهم للنار
والرايه هوس بيها
راعي الهمم راعي الباس. منه الكتايب عباس
صار الرعب غاطيها
الچانو يگولون اسباع، بيهم ترس هاي الگاع
وبفرسه داس عليها
كل درب خلاه مسدود،، حتى الهوه ماموجود
يخبطها ويصفيها
عباس. عباس. عباس. عباس
**-
كل الطرق خوف وموت،، والحومه خرسه بلاصوت
واليحچي ياخذ راسه
من يم الخيام حسين،، ينظر عضيده باالعين
ويتفاخر بعباسه
موبس سحگ عاالهامات. گدامه طاحت رايات
حتى علمهم داسه
بچفوفه لمن جاساه،، ماي وتبخر حساه
من حر هذيچ انفاسه
عباس. عباس عباس. عباس

سعد العبودي