الخادم علي هادي الخزعلي

نزلولي راس الغالي … خلوني اعلگة ابالي
ما ميته وامشي اويه الراس .. بس الرمح چتالي
============
ما جاسكم مرة التعب ... چا ما تهزكم رحمة
ما ينزل اشوية الرمح ... واگعد ازيحن دمة
امتعبين ابوي امن الشمس ..من الله كلش زحمة
ما افتهم معنى الرمح ... بس شكل ابوي افتهمة

ليش الرمل بجفونه .... ومتغيرات اعيونه
متغير وهم ينباس .. بس الرمح چتالي
===============
شيبك طلع اصدگ چذب .... اسود شعرهم جيلك
مو طاعن ابسن العمر .... طعنة ارماح ابحيلك
بوية الضعن كله متن .... ما تگعد انتچيلك
بس هي رجلك بالسحگ ... ما ظن اردود اتشيلك

تمشينه يا حيل الله .... لو حلفك بعبد الله
گلبي تجي عدة احساس .. بس الرمح چتالي
==============
ما نزلوك امن الرمح .... و آنه تهت بالوينك
ما تگدر اتكض الضعن .. ارموشك اصابع عينك
هزيت اديه المو مهد .... من گالوا امتعبينك
چا ما دروا كلشي انكسر… من سحگوا ابمتنينك

ادمومك ذبح تذبحني .. امسحها لو تمسحني
ما ارضة دمك ينداس .. بس الرمح چتالي
==================
يمرتل ايات الكهف .... راسك كهف وامجرّح
الدنية الغروب اگعد بعد ... نومك بعد ما يصلح
اصفن يالتنگط دمة .... نگعن اچتاف المذْبَح
فكيت ريج ايدي بحبل … كون الصبح لا صبّح

جر الحبل رض زندي ... والحبل چان بگدي
غثوني صح ذولة الناس .. بس الرمح چتالي
===============
بگلب اليتيم اشگد خلل .. وايسدة بس الوالد
والشيبة طفلة وتيهت .. تفتر ابراس الفاگد
ما غمضت من الحجر .. يوجع اعيونك گاعد
يالفتحت جفنك تعب .. حاچيني بوية شرايد

جازي العطش بشفافك .. يابوية عاش الشافك
حنيتلك والعباس .. بس الرمح چتالي
=============
بوية انعم الله اعله الحلم .... خلاهم اينزلونك
إشگد اطلبك چم حچي .. بس ما لگيت اعيونك
تدري الخرايب موش الي .. مگعادي چان امتونك
غربة وقصرهم مو عرف .... واسمعهم ايسبونك

بوية الطشت يخنگني .... ردتك تفز تشبگني
واشتمك بثلث انفاس ..… بس الرمح چتالي
===============
علي هادي الخزعلي

ما بين جراح الحجة عج وقرب محرم وكثرة الوباء


يا بوصالح دخيلك يا مولاي
يا بوصالح دخيلك يامولاي
================
الهّيج جرح گلبك نبلة النشاب؟
لو من شفت محبس لابسة السلاب
ياهو الشيباك وانت بعدك شاب
حبل ام الخدر لو حبل داحي الباب

يابوصالح دخيلك يامولاي
يا بوصالح دخيلك يامولاي
=================
بالك بي مخيم خانگة الدخان
وبي نبلة تنزز رگبة الرضعان
صدگ گالو تخوصر وايدة عالحيطان
شني من الذبح من الحرگ فحطان؟؟

يا بوصالح دخيلك يامولاي
يا بوصالح دخيلك يامولاي
================
دمعاتك تظل بس گلبك ايوشل
وحيد وياهو يم جرحك گعد وايشل
غميجة اجروحك وبذنوبنه انفشل
تعال اورد خدركم من ظهور البل

يا بوصالح دخيلك يا مولاي
يا بوصالح دخيلك يامولاي
================
رقية بموتها وتوجعها رجليها
ازغيرة والمصايب تردف اعليها
اشوكت يالمهدي تبچي لموت راعيها
يمعزوز ومته اتذل المبچيها

يا بوصالح دخيلك يامولاي
يا بوصالح دخيلك يامولاي
==================
اسولفلك جرح فطّر لهات اجبال
جرح بچّة سوة المكتول والكتال
طيحة جدك ورجله بثگل تنشال
لمن شاف زينب چاتفتها احبال

يا بوصالح دخيلك يامولاي
يابوصالح دخيلك يامولاي
=================
محرم جاي يالمهدي الحزم شدهن
وشبابيچ البلاوي ابدعوتك سدهن
المصايب كثرن وگمنة نعددهن
اليعطلن مجلسك مولاي بعدّهن

يا بوصالح دخيلك يامولاي
يابو صالح دخيلك يامولاي
===============
اجه شهر الحزن والمرض يمشي اوياه
الامر بيد ابو صالح هو يتبنّاه
شدة وكلشي يرجع رايح المجراه
تفرج عن گرب بس گولوا يا الله

يا بوصالح دخيلك يامولاي
يابو صالح دخيلك يامولاي
===============
علي هادي الخزعلي

ما اگدر اچذبة واقنع العين
بس هوه الخبر جاني امن الحسين
اه. اه. راح اخوي
اه .اه طاح اخوي
____
يبعد عيون گلبي ونسمة اهواي
فدوة اتروح لأيدك لذة الماي
يعافيتي الخذوها وطاح الفياي
شمالة النهر خوية ايفرگك وياي

ما اسمع صدگ من حلگك الصوت؟؟
يعني اليوم اثغب ثغبة الموت
اه. اه راح اخوي
اه اه طاح اخوي
__________
صدگ عباس ما اشوفك بالخيام
وعگب جيسة ادية اجيسك اسهام
يالتارسني ملگة بذيچ الايام
ما تشبگني ليش وگلبي محتام

مرات الحچي اليوجع يجي هواي
تره ايغث الزرع من يكثر الماي
اه . اه . طاح اخوي
اه .اه . راح اخوي
______
امّشي اعليك وين الدوم تنباس
طحت ابشاربك وبريشة الراس
الحرمة ابشارب الخيّر يعباس
اگعد يالبخت لا تفزع الناس

گوم الراية عرگت يم حچي الماي
احشم يا سلف ويردك احذاي
اه .اه .طاح اخوي
اه. اه. راح اخوي
_____
اجه امفرع اخوك ودمعة بالعين
وعايف عالنهر خاچيتة الحسين
كتلة ارباي وينه وتعب السنين
گلي ارباچ كاتلتة نبلتين

نبلة ابجربته ونبلة بالعيون
حدرهن زاهگ وشلته امن المتون
اه .اه. طاح اخوي
اه .اه. راح اخوي
_____
مختاضة يخوية وريجي ناشف
ليش اتعوف گلب اختك الخايف
يعباس الشمر ويريد حالف
علوية واطر درب الطوايف

آنه السادة اهلي يحبهم الله
مو مالت سبي امن السبي اسم الله
اه. اه. طاح اخوي
اه . اه. راح اخوي
______
جريب النهر بس يريد طارش
گلبي اويه الهظم والضيم عايش
ما وچد گمت وعيون مامش
عگب عيناك من الهوة استاحش

راحت كشخة الريشات ذنّك
مچانك فارغ وما ترد چنّك
اه .اه . طاح اخوي
اه . اه .راح اخوي
________
علي هادي الخزعلي

#استشهاد_مولاي_الصادق_ع

تعال… يا موت ارحم بعيوني
تعال… والطف مديور ابلوني
آنه الصادق ياموت
آنه الصادق يا موت
_____
عشت عالخيمة والصايح…… ابد لا تنشد اشلوني
تعال لروحي خل تموت… لا يخلص حچي اعيوني
تظل تتبدة يمي اهواي…… مواقف تشرب ابلوني
مداليل الله اذكرهن…… اطيح وتنچفي امتوني

خيام…… عايشهن كل ظهرية
خيام…… يدوَن فوگ العلوية
انه الصادق ياموت
انه الصادق ياموت
________
يفز بيه الوجع كترين…واظل ابچي اعله عبد الله
مثل ماي المطر من طاح… المطر لو طاح شينگلة
عوافي اينگط الزردوم…… مو دم تارس الرملة
السهم بالرگبة واگف طول… ورباب اتصيّح اسم الله
زغير… موش اگماط الدم لابس
زغير… ذبحوك وريجك يابس
آنه الصادق ياموت
آنه الصادق ياموت
____
ابصينية عرس جاسم… شمعة العافية انعلگت
ما عدها عرف بالنوم…. عيني ابدمعتي اتروت
اغمض تعرض بعيني….. زغيرة بحافر انسحگت
يموت الغاثتني هواي…. عِلاوينة ابجمر ركضت

حرام…… مانمشي بهاي العادة
حرام…… ماتطلع بت السادة
آنه الصادق ياموت
آنه الصادق ياموت
______
يموت الطف ندس شيبي… وگلبي ابعملتة اتوجر
مدري شمالة طف الموت… ماخذ وين المعتبر
مو يتطرز ابنبلات……….. للشم سوو المنحر
موش مراية صدر حسين…… ليش،بخيل يتكسر

خيول… ضايگ لچمتها ابگلبي
خيول… تعرض من امشي بدربي
آنه الصادق ياموت
آنه الصادق ياموت
______
كون اتچفن ابراية…… وعمود البيرغ اجنازة
أنه الشاربني حلگ الموت… آنه الذبحوا اعزازة
الخذوا عماتة مسبيات…… الدمع بخدودة يتوازة
الفاگد يرجع امبلل…… من عينة لطرف چازة

دموع… تسگي اولايات الغربة
دموع… للفاگد حلوة الثغبة
آنه الصادق ياموت
آنه الصادق يا موت
__________
علي هادي الخزعلي

يبني جاسم .. فكرت بالغَيبة
بگلبي احسه .. كبر غصن الشيبة
حنتك والياس والصينية
لو متت باچر يغثن بية
============
يأول شيبة جاست گلبي بالوينك
الشمس لچمة ضوة وجرحك روازينك
تَفوت لخيمة امك حنّي چفينك
ومنا للصبح خل عيني وي عينك

يابو الاعيون.. الوساع .. تعال اگعد
نفرش افراگ .. عله الكاع.. تعال اگعد

جيس ايدي .. تلگة رجفة فاگدة
يغضب الله .. لكسر فگد الوالدة
لهفتي المكسورة والحنيّة
لو متت باچر يغثن بيّة
=============
يعافيتي واصيحلك يعايفني
ألاحف وكتي بيك وظل يلاحفني
اريد اكتب رسالة بمحبرة جفني
حلف اگظي الرسالة وما محلفني

بعينك اليوم .. يجسام .. اريد احلف
بگلبي لك مگبرة احلام .. اريد احلف

يمة راسك .. اخذه يمي وجيبة
برگبتك گام ... الرمح ياخذ غيبة
امتانية اعيونك تمر اعليّة
لو متت باچر يغثن بيّة
=============
يفانوس السلف ما تطفه عالحيطان
يأية ايصير تابوتك جلد قران
ييوسف فوگ حزنك تنچفي القمصان
يراح تموت يالتگظي الگلب گظيان

يالجمالك .. حچي غروب .. عبر يوسف
اغيابك ايوگف الاگلوب .. مثل يوسف

استاهديتك .. نجمة تحچي اعيوني
وبرگبتك .. ذمّة حمل امتوني
راح الف احمولي بالخاچيّة
لو متت باچر يغثن بيّة
=============
اخمك ليش اخمك تبعد وتكثر
تجيب التايهين اهدومك العنبر
غصن زيتون وشصلبك تخر اخضر
تگص صبعك اخافن حنّتك خنجر

باچر اتموت .. يعريس .. عرس مامش
تطفة حرگة الفوانيس .. عرس مامش

اباب گلبي .. راح اظل امتانيَه
شرد اگلك .. انته روحي الثانيَه
اهدومك لريتي درب عوچيّة
لو متت باچر يغثن بيّة
==============
يواهس گنطرة وطفحت عله ارداني
شلب فگدك شرب صفنات گيعاني
صوانيّك خذت من لون بيباني
الشمع والياس واحد يحرگ الثاني

اخطيتي صارت .. بعد بيك .. يماي الله
نخلة عطشانه اجي اعليك .. يماي الله

اه يوكتي… احذر امن الحوبة
امن العفتها .. فاگدة ومتعوبة
الفاگدة العريس والمحنيّة
لو متت باچر يغثن بيّة
============
اسافرلك وطن واندارلك غربة
وابدّيلك گصص ملتهن التربة
واسيرلك گلايد عوزها الرگبة
الفاگد نقط ضعفة المگبرة وگلبة

الوحشة صعبة.. اعله الاحباب .. تصليها
اهدومك اِبنيّة اتراب .. تصليها

باچر اوگف .. بفخر احچي وهمة
هذا ابني .. الفده ابراسة العمة
واجي ابيّرغ ابيض امن النيّة
لو متت باچر يغثن بيّة
==============
علي هادي الخزعلي

اغفه يالكاروكك ايدي باچر ايچهبك ذبح
يالتعودت اعله حظني ايطلّع الروح الرمح
هاي ادية الربتك .. حرز شدها ابرگبتك
عبد يا بعد اليدمعن
============
اسم الله نام ولا تفز
راح اطرزلك حرز ...… من الارماح
باچر اگماطك نعش
باچر ايفحطك عطش….. اغفه وارتاح

انت أول رزق لله ويا عِطيّة شلون اردّك
الليلة من گد ما فگدتك ايدي سچتها اعله خدك
يا علگ شباچ روحي وين وبيا فضة اشدك
اوگف وارجع الولي وگمت انومنك واگعدك

يالمدلل وين اضمك والعطش عينه سهم
وين انومنك عوافي وما يلمنّك خيم
وكل براءة ضحكتك .. حرز شدها ابرگبتك
عبد يا بعد اليدمعن
===============
يابخت حچيي الخيم
يالخضارك بالعلم .. .. .. شفته منثور
روّح اعيوني السهر
وياخذك لمحة بصر .. .. .. مني عاشور

انت نورس شاطي روحي يالمحلّي رموش دربي
يابزر گعدة الخيمة ويا چبير ابعين گلبي
گرّبت ساعة ذبحتك راح اگل لعيوني صبي
تعبت ايدي ونزلتها امن الغروب اندعي لربي

امن التعب والخوف امك وگّفتها امشچلة
عبد نام وانت تضحك بچي باچر كربلة
يمة عدّل نومتك .. حرز شدها ابرگبتك
عبد يا بعد اليدمعن
==============
جزه افراگك عالگلب
وبالعمر يشرب شرب .. .. چنّة عطشان

يالتنشز بالذبح
كلش اثگيل الرمح .. .. وانت فحطان

يالسمارك طفّة ليلي اليوم يمعتبر اشطالع
تذب گلبك عله المامش چنك ابخور الجوامع
يا شتال لكلشي يابس يادليل لكلشي ضايع
دمك اينز اعله ايدي وانچفي ابخد الشرايع


يا ربة املوحة بزرتي حظني بغيابك مصخ
خشب كاروكك تفطر والسهم كلش كشخ
عيني خرزة ابجبهتك .. حرز شدها ابرگبتك
عبد يا بعد اليدمعن
=============
ها يواهسنه الامس
الك كل دورة شمس .. فدوة تندار

روحك اترف عالگبر
رفة اجناح النسر .. .. والذبح حار

ماكو غيمة وطف يعطّش حته بفراگك تذبّل
شامة بالتاريخ دمك شايخ وشامخ يسجّل
كل ملامح عرش الله اسم الله يم اذنك ترتّل
اخطوط كوفية رموشك وانت ناعم ريش بلبل

ياچبير بكلشي زاغر يا زغير المگبرة
ارجع ولملم ربابك عالگماط امطشرة
يمة تكتل حرگتك .. حرز شدها ابرگبتك
عبد يا بعد اليدمعن
===============
يَ ابيض بديرة كحل
اعيونك اكبار وشهل .. .. يحلى الاولاد

ردت تكبر يا نده
حتى لو شيبي بده .. .. بيدك انگاد

ردت اسولف عندي زلمة شاب توه وجاي يكبر
هوه افراگك خنگ حلمي والوكت عالفقرة يفتر
عبد ما يصلح تموت و طولك المفتون يزغر
بيدر لكلشي حمامة يبني ريجك شلب خضر

تنجرح مو اله نبلة بالگطن من تنگطف
يالحچوك بلون گلبي يا رسالة بلا ظرف
بالسهم ذب ذمتك .. حرز شدها ابرگتك
عبد يا بعد اليدمعن
=============
علي هادي الخزعلي

تم نشر قصائد الامام علي ع☝☝

يا علي .. رحمة الله عيونك
ياعلي .. رحمة الله عيونك
============
يالثخين افيايك وظلك خفيف
نشكر الله بحبتك حبة رغيف
علي بشباچك ضوه يمشّي الكفيف
والله لو بعدك عدل عرشك رصيف

ايدك خير .. تترسلها اولاية
مايدرون .. انت لله امراية
يا علي .. رحمة الله اعيونك
ياعلي . رحمة الله عيونك
===========
بس محمد والله فهموك انتصار
الباقي محد فاهمك حتى الكبار
علي تگلهم بالدرب منانه صار
محد يصدگك مثل حلم الزغار

هذا الكون .. رزن فوگ متونك
والمريّخ .. ازغر امن اعيونك
يا علي.. رحمة الله عيونك
يا علي .. رحمة الله عيونك
=============
اشكثر كتبوا بيك چم آيه وحديث
تره آدم بالصلب عدكم وريث
ذنبه يقوى المايحب حيدر خبيث
اقوى من الزخة نگّاط النثيث

الماشافاك .. بالكتاب اطروحه
ابّاقي الدين .. لا يتعب روحه

ياعلي .. رحمة الله عيونك
يا علي.. رحمة الله عيونك
===============
علي ابصحنك ينكسر حچيي الغرام
من اسلم ينچفي الحايط سلام
كلك اتنگط گطن لحية إمام
يا سمار ابگبتك حنطة حمام

چم قران .. واگف ابحيطانك
ايدك ذيچ .. طالعة ابيبانك
يا علي.. رحمة الله عيونك
ياعلي .. رحمة الله عيونك
==============
شكو هواي گبالك ايصبّح جِليل
الما جزيت اعليه دفو ايكتله الجحيل
علي ماعدنه وره متونك بديل
شكو حمول وتوجع انذبها بثجيل

يا بوحسين .. وارثين العادة
والكلفات .. اله بيهن سادة
ياعلي .. رحمة الله عيونك
ياعلي .. رحمة الله عيونك
================
علي گالو صايتك متروسه شگ
و مثل حَظنْ حسين هم حاظن الحگ
علي متواضع او عد الله انعشگ
هو چا ياهو الاجه وثوبه انلثگ

حارس دوم .. ما تحط متواضع
حتى تفوت .. ما گطعت الشارع

ياعلي .. رحمة الله عيونك
يا علي .. رحمة الله عيونك
=================
علي هادي الخزعلي

سيف الله انت و عالخلود امواضب
لمّن رجعت امدمم انت الغالب
براسك فتحة فقار
بالدم امساكك صار
ياحيدر .. ياحيدر
=============
غالبهم وزودك الك .. فُزتُ وربُ الكعبة
يالطيحتك طيحة افه .. ازغير وچبير اتشّيبة
محرابك اعيون الحسن .. ما تمشي اله تحبة
دمك فريضة حُب مشة .. چا اشكد انت امهذبة

أخلاقك الكاتل خجل من عدها
عفته مشة و بالمُثْلَى ردت تسدها
عقل الخلقين احتار
بالدم امساكك صار
ياحيدر .. ياحيدر
============
رادوا يطيحونك گبل .. بس فشلوا ابخطتهم
بس هسة سووها بغدر .. واعترفوا بغلطتهم
كرهوك ووجودك تره .. صاير ضعف نقطتهم
طبروك بمغاوه الفلس .. وصينيتك مكبرتهم

دومك حنين وما جزيته بسكته
حتى اليطبرك ناوي هم گعدتّه
رقة گلبك تنزار
بالدم امساكك صار
ياحيدر .. يا حيدر
==============
معروفة ما تقبل خطأ .. بالجنة سبعة بيبان
الباب الرئيسي ينحسب .. يا حيدرة راسك چان
امسمِمْ السيف بچم الف .... الأسمة عبد الرحمن
المفروض اسمة اعله الوجه..ينطبق عبد الشيطان

ثاني صرت بس انت اول معصوم
امن اهل النبي ايموت اعله دم ومسموم
كلّك حكمة واسرار
بالدم امساكك صار
يا حيدر .. يا حيدر
============
يا خير يمضحكْ الفلح .. زهگوا اعليك اسم الله
كل ما ثگل شوگ المطر .. تشرب الگاع ابثگله
ألكوفة عاگولة شته .. ما تهتم ابماي الله
لو بالصلاه ما تنذكر .. تمصخ وما تتصله

ملح الشهادة الثالثة المشيوله
المابيها اسمك دوم مامقبوله
همّ النكروك ازغار
بالدم امساكك صار
يا حيدر .. يا حيدر
===============
گوم اعله حيلك يا بخت .. تاهت الشارة بدونك
شمحلاك يومية ترد .. اشبيهن اليوم اعيونك
يالشايل السبعة رزن .. شنهي اربعه ايشيلونك
بالجاذبية ايحل خلل .. من ما تحركْ امتونك

أُم و ابو تحسبك يحيدر ناسك
وصلت طبرتك يا أفه لأم راسك
اوگف يالدمك حار
بالدم امساكك صار
ياحيدر .. ياحيدر
==================
حبيت تعرض للخلگ .. مشهد بشر متواضع
اختاريت دمك من يصب .. اله عله گاع الجامع
بتاريخ افعال البشر .. لاشايف اولا سامع
واحد يكّعد قاتله .. وبفعله ما متراجع

المفروض اخلاقك كتب تدّرَس
شنهو حدر صدرك گلب لو نورس
گلبك لؤلؤ محّار
بالدم امساكك صار
ياحيدر .. يا حيدر
===========
علي هادي الخزعلي

تم نشر قصائد الامام علي عليه السلام👆👆

مالت شبگة آنة وموش مال انعاف
بوية الفاتحة اتريدلها حيل اچتاف
بتك تدري بية
مو للطمة ادية
بوية الفاتحة اتريدلها حيل اچتاف
_____
ياكشخة محمد يا بو حچيي الزين
يبخت الكعبة اوگف وين رايح وين
اذا ابچي يبوية امنين اجيبن عيــن
مــن ياديرة اجاك وحصــلّاك البيــن

بوية امكيفة بيك وتدري احبنك
لو باگــوك مني امــنين اجــيبنك
يابو اعيوني حنيت
توجع خنگة البــيت
بوية الفاتحة تريدلها حيل اچتاف
____________
چنت ابرد واجيك اتلفني بالصاية
وحيل ارتاح يمـك ياعلــي اهواية
مو حلــوة يبــوية طيحتــك هاية
مــن توگف تــبيّن حلــوة الــمراية

گصر شوف اليوچدن والفراگ الطال
سود ايامي گلبن چــنها لون اعگــال
يا ملح المضايف
يلمسنعْ السوالف
بوية الفاتحة تريدلها حيل اچتاف
_______
مشيت اتصلي الله ايحب عبوديتك
وخبز للفقرة شايل جــوّة خاچيتك
ليــش اتبللــت بالطــبــرة حنــيتــك
ودم راســك يبويــة واصل لبيتــك

مامش لون بيك وخدرن امتونك
افة وانتَ ابو حسين الما يطيحونك
هذا الجاسك اشلون
ما لاحولك امتون
بوية الفاتحة تريدلها حيل اچتاف

_________
يلتنگط ترافة شو تنگّط دم
يبو الايتام عگبك كلها تيتم
تكيّف للطلابة وچنت تتحزم
وسفة وطيحاك السيف المسمم

يالتچهب الوادم بالهلا الترفة
يالمعزب تنام ونومتك كلفة
يا شيخ المعازيب
اليتامة تريدك اتطيب
بوية الفاتحة ترديلها حيل اچتاف
_____
اخذ العافية وكاسرها بجروحــك
وحفنة ماي خليني ابعطش روحك
شلــون وعوروك وانتَ شيــلوحك
ولاية حزن خضر نوحي يم نوحك

اوگف يا علي لا تغمض اعيونك
خرزة ابلاية محبس ابقة من دونك
بوية ودمعي چواك
حار وچنة ملگاك
بوية الفاتحة تريدلها حيل اچتاف
___________
علي هادي الخزعلي

تنگسملك ياعلي بهالليلة هامة
مثل ماتگسم خبزتك لليتامة
ينترس دم الضوة
وينكسر ظهر الهوة
______________
هالليلة مختلفة چنها
والگمر موش ابحظنها… الله يستَر

والضوه امزاعل گفاها
والظلمة تركض وراها… جايبة الشر

مابيها ريحة محنة
چي بيها كشخة اهلنة… راسة ينطر

امنهد صبح الله السمة ضيّج خلگها
واليتامة ابلا علي وفارغ حلگها
والدفو اخلافة انچوة
وينكسر ظهر الهوة
______
اسم الله يبونة اعله راسك
شلون النذل سيفة جاسك… يالترافة

چان النجم منة يخجل
وجهك علي ابدم تبلل… يا حسافة

يا وسفة حيلك تبريّد
غير انتَ هيبة محمد… بالكلافة

گوم واعدل طول ظهرك وانت سالم
يبو الوادم لو رحت ماتت الوادم
تموت وي روحك سوة
وينكسر ظهر الهوة
________
هالليلة باگت گمرنة
والفرگة شربت عمرنة… والسوالف

فقرتنة فرغت اديها
والديرة ماصخ حچيها…. عالشفايف

عايفنة موش اعله طبعك
يالما عفت مرة ربعك…… بالمواقف

إنچفينة اباب بيتك جينة ننشد
هو المضيع علي بمچانة يركد ؟؟؟
ألجرح بيت الدوة
وينكسر ظهر الهوة
______
گاع الله تفحط بأهلها
والدنية يثگل حملها… من تسافر

شمحلاها شبگة حنانك
بيت اليتامة مچانك… مو مگابر

يعطش محنة اليعوفك
بس لاصدگ مانشوفك… احنة باچر

يستلذ الخد اذا ضاگ النزيزة
الليل وحشة ويخنگ الدافن عزيزة
لو على الفرگة نوة
وينكسر ظهر الهوة
________
يابو الحسن اگعدلنّة
واعله العشگ سولفنّة… جينة يمك

ندعي ويسومر بچينة
والسمة اتبدت بدينة….. مثل دمك

اگعد يواهس حچينة
يا نسمة الله الحنينة… خل نشمك

كلة حزنان السلف واگف ابابك
يبو حظن الدافي گوم احظن احبابك
الحيل ورقة وانطوة
وينكسر ظهر الهوة
_________
علي هادي الخزعلي

علي اصل الثگل……يطبرونة غفل
حسافة ينگّل ……. اشمروها العگل
____
علي ما ينطبر لازم يشمونة
ويدنگون لحدر رجلة ويبوسونة
ويچلبون بخواچية ويحظنونة
علي ايگعدْ اليتيم اله عله امتونة

اليحب كل السلف…… يطيحونة وسف
عشگ راسة نزف……. الدمة ابعينة نشف
_______
سيف الله علي واشگد يحب الله
علي اتحظنة الامصلاية اذا صلّة
المغرب من تطيح الشمس بالغفلة
علي يوگف ابطولة ايصيّح اسم الله

السمة ابمتنة انتچت……… لمَن طاح البخت
المحنّة اتفرهدت………… . وعلى الگاع انچفت
______________
علي نچفي الدمع واجب على مودة
لأن طينتنة وي انفاسة معگودة
علي ابراسة انطبر والهامة ممرودة
ودم ابحاجبة ونازل عله ازنودة

گبل يوم انطبر……… وجرح راسة كبر
انثلم وجه الگمر…… الهوة ابريتة انكسر
____________
جرح راسة چبير ابوصلة ما ينظب
إذا يبعد علي والموت ليه يگرب
الدنية تموت شهگة والضحك يخرب
البيت اخلاف حيدر زحمة من ينطب

النفس ما ينشهگ.……… لأن فاگد عشگ
اليحبة من صدگ……… بعزائة يحترگ
_________
اليحبة يضوگ لازم لچمة الطبرة
اليحب حيدر صدگ هامتة متعورة
اليبس گلبة بچي خل يعصر الخضرة
دموع المن امخلي الفاگد الگمرة

صعد بينة الهظم……… الدمع ما ينفطم
نشد حيل اللطم……… ونكسّر چم عظم
____
علي هادي الخزعلي

اللهم صل على محمد وآل محمد

يابو صالح يا بو صالح .. يا بوصالح
__
يا حنين وادري گلبگ .. يعشگ الناس التحبك .. ماتجينة
كلها اجتنه وكلها راحت .. والمسافه بروحي صاحت .. ماتجينه
يا عرفنه وكلها غربة .. الما نسانه بساعه گلبة.. ماتجينه
ما خلت بيك السوالف.. تنشد اعليك الطوايف .. ما تجينه

يا بو صالح .. يا بو صالح .. يا بوصالح
___
الدنية مُرّة وانت برحي .. ينفتح كل ليلة جرحي .. ما تجينه
الدنيه هوسه وانت صنته .. تشرب امتاناتي سكته .. ما تجينه
الوادم اتروح بعشگها .. وروحي بصوّرك شبگها .. ماتجينه
ننچفي ونرجع نتاني .. وباگت اعيون الثواني .. ماتجينه

يا بو صالح .. يا بوصالح .. يا بوصالح
_____
نعتذر يوجع ذنبنه .. امأخرينك بس تحبنه .. ما تجينه
المايصلي وماله توبه .. چم سنه اتأخرك ذنوبة ..ما تجينه
يا شتال الله اعله گاعه .. خل نشوفك مرنه ساعه .. ما تجينه
كلها رجعت حتى يوسف .. مشتهي اعيونك تسولف . ما تجينه

يا بو صالح .. يا بو صالح .. يابو صالح
____
اعطف وسويها لله .. سيّر اعله الشيعه غفلة .. ما تجينه
شنهي وحدك هسه گاعد .. هم خذت بالغَيبة واحد .. ما تجينه
بيضة خل نحچيها لازم .. احنه وادم موش اوادم .. ما تجينة
الياخذ الغيبة ويلچمك .. طّول الغَيبة اعله حلمك.. ماتجينة

يا بو صالح .. يا بو صالح .. يا بوصالح
_______
يالكشختك بيها شارة .. يا بخت لمعة منارة .. ماتجينة
لمنه سامحنه نحلفك .. ندري تعبان ونكلفك .. ما تجينة
تعبيناك وندورّك .. حطنه حرّاس اعله ظهرك .. ما تجينة
شد مهرتك شد لثامك .. كلها صاحتلك عمامك .. ما تجينة

يا بو صالح .. يا بو صالح .. يا بو صالح
____
انت وينك خل نجيلك .. ولا مرة مسولفيلك .. ما تجينة
رد علينه نريد ننظب .. انت اقرب من الاقرب .. ماتجينة
ما عفتنه وعايفينك .. يهنيال الشايفينك .. ماتجينة
انت حاسبنه عيالك .. ما يشيل علينه بالك .. ماتجينة
______
علي هادي الخزعلي

يلماتجيني وخضرتلك يمتة
ألمح زراگ اعيونك الشايلتة

موعدنة مو أيام حاسبلة اعيون
خليني اشوفك لا يخلصن سكتة

يلبيضة،نيتك چنها ريشة عباس
ضگت انتظارك والتعب هم ضگتة

چم دوب اوخْرْ اجروحي وترد اردود
طاري الغياب ابروحي لو هيّستة

عالصبخة عيني لو بچت ترجع طين
دمعي الثگيل المانزل نزلتة

عايشلك واتنفسك .... موش تگول
هو آنه مخلوق اعله مودك انته

لاعافية الضلت بعد لا ظل لون
يلمهدي حتى الفرح هم زاعلتة

امتانيك حد ماصار اسمي امتانات
واباب شفتي الليل يخلص( يمتة)

وابگاع رمشي افرش الطيفك تسبيح
خاف اغفه چذبة ومن صدگ غافلتة

آنة الغريب الضايع الما موجود
ابلياك عمري امطشر ورهمتة

من نشدوا الماعرفوا انت ال بالروح
گلتلهم اليوم اعتذر ماشفتة

علي هادي الخزعلي