القصيدة : باچر عيد
الرادود : محمد الجنامي
الشاعر : وسام الشويلي
🍂🍂
باچر عيد عند الناس وشلون ؟!
يعيّد مَن دفن بالگبر عيده //2

وحنّه باچر إيخلّون بالإيد
والمفارگ حبيبه دمع بيده

يكتبون التهاني بصور أفراح``3
وآنه اكتب عله الراحوا قصيدة

الوادم عيدك مبارك يگولون
بصباح العيد وأيامك سعيده

وآنه أعله المگابر گلبي ملهوف
شسوي والنجف صارت بعيده

الدافنله ورد يتنشگ جروح
ويلزم ظهره المفارگ عضيده

وأتعذر وأگله للعيد ياعيد
اخذ منّي الگبر وين الأريده

ماناسيها زينب لكن اهواي//2
ابهيچ أيام احسنها وحيده

وتاخذني دمعتي الگبل عاشور
وأصيح إيعينچ الله ياحميده

وأفك عين الگلب وأنظر للحسين
يبچي والسهم ذابح وليده//2

وأرد والتفت والگاه عالگاع
على صدره الشمر ويحز وريده//2

وأصيح ابحرگتي اگعد يعباس
اخوك حسين يوميلك بإيده//2

وعله نوگ السبي ياخذني الإحساس
وأمشي وي الظعن لچن ابهيده//2

وأطيح إمن السياط الفوگ الأطفال
ومثلهم دمعتي تارسه البيده

وأوصل للخرابه امهدم الحيل
ويصير الليل والونّه شديده

وأصرخ وي رقية بويه يحسين
ويسمعني يزيد وكل عبيده//2

وأحس راس ابطشت ينجاب وشلون
رقيه تعاين الگطعة وريده//2

حضنت راسه ماعنده حضن چان
والجمّال بالطف گاطع إيده

يتيمه والطشت صار إلها تابوت
زغيره والجروٓح شگد عنيده

شهيد حسين مات بيوم عاشور
ورقيه بفرگته ماتت شهيدة
~~~~~~~~
✏Bk_Mj
~~~~~~~~