الشاعر حسين الخرساني

يا عباس خويه
يالحمـّاي خويه
ياعيني ـ حاچيني
ورف ياخوي بلواي


جيت وجاي ويـّاي
همـّي وضيم دنياي
كل همي ـ يادمي
انته وموش هالماي


دمعي يسيل مجبور
جيت وضهري مكسور
بدمعاتي ـ شمـّاتي
گالو فاگد الراي


أجرّاً بالجدم جـَر
أگوم وأرجع اعـثر
وجروحي ـ لبروحي
صاحت آه بلواي


اصيحاً آه وانحب
بيهه شلون زينب
ما گلهه ـ لو گلهه
فگْـدت حيد حـَمـّاي


إنهض ياضوه العين
گوم اتلگّه لحـسين
فاگد حيل ـ كِلّه يميل
جـَيـّت منهظم جاي


جودك هذا ولواك
خوي وهاي يمناك
بصرخه ابچيك ـ حيل انعيك
ما وِن ليك بهداي
ـــــــــــــــــــــــــــــــــــــــــــــــــــــــــ
للشاعر حسين الخرساني
الجمعه ٢٠١٩/٩/٦
مـحـرم الحرام ١٤٤١

رايح يا محـَنـَّتنه
وماخذ هالگلب بجفاك

يالروحي بوسط روحك
گلي بيا طريقه انساك

من تشتاك الك روحي
من ادورك بويه وين الگاك

لا تـقـبل تـضل يـمـي
ولا تقبل اروح اوياك
ــــــــــــــــــــــــــــــــــــــــــــــــــــــــــ
سكّت وماردت احچي
ومسحت دموعي بيديه

ماردت اجرح احساسك
واگلك ابقى ما بيـّه

بس شفت الضعن حمـّل
چم ابنيـّه وبنيـّه

حچيت وگتلك امشي اوياك
يـبويه غـصبن اعليه
ــــــــــــــــــــــــــــــــــــــــــــــــــــــــــ
كلهم أهلي ماخذهم
وآنه الوحدي شفتوني

بحضن عمتي يبويه حسين
مو عالناگه خلوني

آنه ودمعي والحيطان
يهونلكم تعوفوني

حتى من ابچي ماكو چفوف
منكم تمسح اعيوني
ــــــــــــــــــــــــــــــــــــــــــــــــــــــــــ
وداعك مو سهل يذبح
أرحـَم من حمل نعشي

من شفتك تريد تروح
صفنت ووگّفت رمشي

شگد صعبه من اشوف اهلي
يحـَملون وخلص كلشي

والكاتلني يابويه
محد گلي يلّا امشي
ــــــــــــــــــــــــــــــــــــــــــــــــــــــــــ
ضعنكم مامشه ودمعي
وشـَّل من كثر سيله

إذا تمشون چا گلي
شيضل بحال العليله

الأكبر جاسم وعباس
ياهو المنهم ابچيله

لا عبدالله لا سكنه
تصـّور وحـْشتي الليله
ــــــــــــــــــــــــــــــــــــــــــــــــــــــــــ
للشاعر حسين الخرساني
الأثنـين ٢٠١٩/٩/٢
محرم الحرام ١٤٤١

كَسرت ضهر اخيمـنه بهايه
زينب زينب خويه الرايه

طاحت ويّ گطع الچفين
اتعنـّالچ مكسور حسين

كَسرت ضهر اخيمنه بهايه
ـــــــــــــــــــــــــــــــــــــــــــــــــــــــــــ
آه يمّ الحزن گلبچ
بحالي يختي اضن يدري
من شفتيني جيت انحب
ومبيـّن عليّ كَسري
وصـْلَت للجدم خويه
ترى دمعاتي التجري
حزامي چان ابو فاضل
حـَلّو وانكسر ضهري

لتسأليني الكافل وينه
غمـّض عينه ونبله بعينه

دم بعين ونبله بعين
اتعنـّالچ مكسور حسين

كَسرت ضهر اخيمـنه بهايه
ـــــــــــــــــــــــــــــــــــــــــــــــــــــــــــ
جيتچ حالي متغيـّر
بيا ونـّه ابچي ياعبره
مو حسره اجذب العباس
لا آنه الصرت حسره
أحسـّنـهه رمح بيـّه
من الشامت النضره
مو حگي امشي بالگوه
لخونه ناحت الزهره

أبچي وأسمع چم حچايه
يـُمـّه اوليدي وتبچي ويايه

شسوه بحالك آه يالبين
اتعنـّالچ مكسور حسين

كَسرت ضهر اخيمـنه بهايه
ـــــــــــــــــــــــــــــــــــــــــــــــــــــــــــ
راح الخـَلّه يازينب
بگلوب العده خوفه
وعيونچ بعد هيهات
گمرنه تكدر تشوفه
يـَمه ومن ذكرت اسمچ
الوحـَدهن رجفن جفوفه
ولو ما إنتي وعيالي
أضل يـَمه وفلا عوفه

موتي اتمنـّيته اعله يمينه
بس همـّي انتي وحال سكينه

والسألن حاميهن وين
اتعنـّالچ مكسور حسين

كَسرت ضهر اخيمـنه بهايه
ـــــــــــــــــــــــــــــــــــــــــــــــــــــــــــ
عنـّي وآنه صرت وحيد
ياهو اليدفع العايل
دم الغيره ياخويه
شفته اعله النهر سايل
حگي لو إجيت امشي
يخويه بمشية المايل
ياحيل اليضل عنده
اليفگد مثل ابو فاضل

شما ارد امشي بطولي وحيلي
ينزل ضهري يبيـّن ميلي

المثلي الحيل يجيبه منين
اتعنـّالچ مكسور حسين

كَسرت ضهر اخيمـنه بهايه
ـــــــــــــــــــــــــــــــــــــــــــــــــــــــــــ
آه يمّ المصايب آه
بعد ساعاتي معدوده
أحسـّن كلشي بيـّه ايصيح
شخلّه بحالي عاموده
زادت لوعة الرضعان
وهاي ايتام ممروده
تدرين السبب شنهو
ابو فاضل فرغ جوده

لتـّاني وماتاني وياها
راح الچان يروّي ضماها

فاگد ضامي بهالحالين
اتعنـّالچ مكسور حسين

كَسرت ضهر اخيمـنه بهايه
ـــــــــــــــــــــــــــــــــــــــــــــــــــــــــــ
للشاعر حسين الخرساني
الجمعه٢٠١٩/٨/٣٠
مـحـرم الحرام١٤٤١

لبو اليمه حـُبي وغرامي
لبو اليمه صمتي وكلامي

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
العشك ابو اليمه ـ بالگلب جمره
وعن وهج حـُبه ـ تسولف الفطره
من طرف عينه ـ حصـّلت نضره
وهوَّ خلّاني ـ ألطم وأقره

عفت كلشي وعفت الملامه
وصرت أسمع جرحه وكلامه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
ياهو من ذنبي ـ الحـُبه جاباني
هوَّ بس واحد ـ ما إله ثاني
بيش جازيته ـ وشوف شنطاني
خادم الزهره ـ يكفي سمـّاني

أَخـَذ روحي وگلبي وذنوبه
وستـَر حالي وضمهن بثوبه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
واضح ومكشوف ـ حـُب ابو سكينه
وعلّة الـعـافـه ــ بـگـلبه مـو عينه
حـُب جرح ماطاب ـ بيني وبينه
لـو يـصـح مـثـله ـ بـلّا چا وينه

الـعرف حـُبه ولذّته وخيره
ابـّاله بس هوَّ وينحذف غيره

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
إلّـي يـسـألنـي ـ ورايد العله
عنه راح اسكت ـ وصفْـنتـّي تگله
العنده مثل حسين ـ بغيره چا شلّه
أمـشي ما أمـشي ـ گلبي يوصلّه

الــذي يـحبـه ينچوي بناره
صفْـنته تسولف عشگه واسراره

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
آنه حالي حال ـ كلشي مل منـّي
غير ابو السجاد ـ ياهو يقبلني
شما أَزل وابعـد ـ ايده تاخذني
ومن هوى الدنيه ـ الخدمته يجرني

گبله يا وادم منهو سوّاها
روحه وجروحه الشِيعتـّه انطاها

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
إسمه من ينگال ـ يستلذ سـَمـعي
وگلبي من وحده ـ يلطم بضلعي
شلون مـا أبـچـي ـ من اسمع الينعي
هـوَّ صـَب دمـه ـ وآنه بس دمعي

أَترك امصابه وانسه يردوني
وآنه من دونه شلّي بعيوني

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــ
للشاعر حسين الخرساني
الثلاثاء٢٠١٩/٨/٢٧
مـحـرم الحرام١٤٤١

يبو محمد كربلا هاي
وأنا تمنيت حاضر اوياي

تعال اسمع ونينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
يبو محمد يخويه الكربلا تعنيت
وصلت الها وذكرت مروتك وحنيت
صحت يمي اخوي وهيبتي ياريت
وأنا وانته وگمرنه نلتم تمنيت

وحقيقه يصير   هذا الاحساس
الحسن يمي ويمي عباس

وتحيطون الضعينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
من اگولن كون انه ادري ماتصير الكون
واون وشوگي يصبح بس دموع عيون
صرت عين المصايب حاوطني جفون
إذا مو انته يمي گلي بيش تهون

تعال وشوف همي اهواي
يريت اسمع أخيـّك جاي

صدك هيچ وتجينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
إلك هزتني روحي ياعجيد الراي
مو بس آنه زينب رادتك وياي
يالبجيتك تطفـّي التستعر بحشاي
العطش ماشوفه خويه وانته اشوفك ماي

شحلاها ولو انته موجود
جروحي البـالدليل تهود

تسر حالي وتعينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
وحك چبدك هذاك الماگطع نزفه
بعدها جروحي تنزف لاتضن تشفه
ترى وليدك يتاني وحنته بچفه
تمنيتك تجيله وبيدك تزفه

كسر گلبي بيده شمعه
صحت وجري دمعه دمعه

الزمان شسوه بينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
غريبه الغاضريه وبيها اخوك حسين
صرت بيها غريب بعيني لاح البين
تمنيتك تجيني وصرت أدير العين
گبل لا من اخونه تنگطع چفين

ردت خويه المضى تعوده
كبل لايخله البجوده

گبل ماتطفى عينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
يالبوكت الشدايد عين إلك متنام
يالمفرق الكتايب بس تحل الـثام
صبح كل همي زينب وهي عدها أيتام
يخويه افزع گبل لا تحترگلي خيام

يخي ريتك تجي تحامي
گبل حرگت خيم ضامي

النضر صوب المدينه
إلك گلبي وحنينه

حاضر اوياي
ــــــــــــــــــــــــــــــــــــــــــــــــــــــــ
للشاعر حسين الخرساني
الثلاثاء٢٠١٩/٨/٢٦
مـحـرم الحرام١٤٤١

تحت خيمة عزائك
يجايبني بدُعائك

تضل حسراتي الك والغربتـّك وخيامك
نحيبي العيلتـّك وجروحك وأيتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
أنا عبدك ـ يبو سكينه
يالمبچـّي الصحاري والهوى والماي

على دربك ـ اريد ابقى
فلا زل وابتعد وادري الدروب هواي

وهي الدنيا ـ محل غربه
واشوف السلوه بس دمعاتي يامولاي

گلتهه وما ـ أبدّلها
گبل واليوم أضل يحسين الك منواي

تضل عبره بحياتي
وبعد ساعة مماتي

شحلاها ويمي تحضر وارتمي على جدامك
نحيبي العيلتك وجروحك وأيتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
الحمد لله ـ وإلك شكراً
بكثر دمع البچولك حـُب يعالي الشان

جبتني اسمع ـ حچي جروحك
وعفت كل المحاچي اويه الزمان الچان

شريد أكثر ـ وأنا الاحقر

واخدمك يامليك على الإنس والجان

لچن بيـّه ـ جرح يسأل
ليش انته الحـُسين وتنذبح عطشان

يضل بسمك كلامي
جرح يصرخ يضامي

بلا قيمه الكلام الما يمر بآلامك
نحيبي العيلتك وجروحك وأيتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
أنا الخادم ـ وهو الخادم
شما گله اليخدمه يردله خادم صار

وأنا وأهلي ـ إلك صرنه
على حـُبك يبو اليمه وربينه زغار

بعد شَـگـطع ـ دمع عيني
ومصابك بيـّه عايش جمره ليل انهار

عمت عيني ـ يغاطيني
بحنانك وأهلك ابـّيـن الذبح والنار

وعجب دمك تجارى
يلمدلّي الحيارى

إنخلق حزن الوجود الكربلا وأيامك
نحيببي العيلتك وجروحك وأيتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
بلا معنى ـ العمر يصبح
إذا ماينگضي على مصابك بلوعات

وإذا ما تجري ـ الك إلمن
هضيمه ادري على غيرك تنزل الدمعات

وإلك بالطف ـ يتامى شگد
اويه كل كلمه الحچوها تطلع الحسرات

أعيش شلون ـ أنا براحه
وزينب واليتامه بنص خرابه تبات

الإلك گلبه وحنينه
عمر يبچي الضعينه

وكسِر ضهر الخيام وضهرك على حزامك
نحيبي العيلتك وجروحك وايتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
الزمن عثره ـ ويريد اعثر
وأموتاً روح اريد ولا اموت احساس

على دربك ـ أضل ثابت
بنضرتك ياحـُسين ونضره من عباس

يلوموني ـ وانا امخيـّر
بين أبچي بعزاك وبين ارضّـي الناس

وعفت كل الحچي بضهري
ولجدام اليخدمك جيت ادنك الراس

وصدح گلبي بقراره
الدمع تاج الغياره

شرف عالي وعظيم ونالتـّه خدّامك
نحيبي العيلتك وجروحك وأيتامك

تحت خيمة عزائك
ـــــــــــــــــــــــــــــــــــــــــــــــــــــــــــــــــ
للشاعر حسين الخرساني
الخميس15/8/2019
مـحـرم الحرام 1441

من الدمع نبعث رساله للحجر دلّاله
الباع دينه بدنيا غيره ومابقاله اوشاله
الزهره من يجبل محرم بس تشوف هلاله
اتصيح وين اهل البواچي حسين محد شاله

اليحب ـ مايعوف أحزانه
اليحب ـ واللطم عنوانه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
إحنه علـمتنه الرباب ومنهه اخذنه السيره
شلون نجزع عالغريب وماتمرنه الحيره
للي يتفلسف علينه ومعجب بتفسيره
الغيره ذمه ونبع صافي مو دراسه الغيره

ترى ـ شاري عشگه ودينه
ترى ـ اليلطم اعله حسينه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
من گلب ينبض حـُسين وعايش اويه احزانه
لليذم أهل العزيـّه وعلّـته بوجدانه
الله من فاضل الطينه وللبچي سوّانه
هذا فصلاً للخطاب وخل يكض السانه

الدمع ـ هيَّ هاي الغايه
الدمع ـ شنسوه دون قرايه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
مايغيـّرنه الزمان شما تدور ادواره
حسين ناحتله العوالم والعرش واسراره
شلنه بالماعنده دمعه وملتهي بأعذاره
يريدنه انبدل جرحنه بمنهجه وافكاره

الوفي ـ مايعوف جروحه
الوفي ـ بكربلا يشد روحه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
خلي يحچي الماله قيمه وخل يوجه سهامه
يگول هذا شلون يبچي وليش طابر هامه
يروح هو وعلمه فدوه الخطوه من جدامه
حسين راعي الهالشعائر وأعرف بخدامه

طبع ـ المو طف بموضوعه
طبع ـ ما يحس باللوعه

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
كربلا الها حراره بكل گلب حس بيها
وبـَينت بهاي الشعائر بعد من يمحيها
هاي ضجه ونار فتنه والفشل تاليها
الدمعه لتطفـّي جهنم هاي ماتطفيها

البچي ـ هايه من أسراره
البچي ـ بي محنـّه وشاره

حـُسين حـُسين حـُسين حـُسين
ــــــــــــــــــــــــــــــــــــــــــــــــــــــــــــــــــ
للشاعر حسين الخرساني
الخميس15/8/2019
مـحـرم الحرام 1441

إلك مديت ايديه
ودرت عينك عليه 
درت عينك عليه

يسر الخالق وسيد العوالم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
جرت شكراً دموعي الگلبك وحنيته
طريقك موسهل وبفضلك آنه مشيته
شگلك وانته گلبي مغرمك سويته
واذا عوفه ويه غيرك يلتهي ذليته

إلك حــُب البدايه
وإلك حــُب النهايه 
إلك حــُب النهايه

أريد اوياك  أضل عالدمعه دايم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
إلك بس بالبواچي كون اگضـّي سنيني
سوالف عيني بسمك وانته تفهم عيني
چنت حاير واريداً واحد يدليني
وبعت روحي ولگيتك سيدي شاريني

حسين فدوه الحنانك
حسين عشت بأمانك
حسين عشت بأمانك

أنا العبد الذليل وانته راحم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
إلك مديت اديـّه وروحي يابو الشيمه
العطش كاتلهه وهيه متانيه اتمر غيمه
جبتني انته برحمتك حسستني بقيمه
وگلت للخدمه ادخل جوه هاي الخيمه

أدخلت خيمة خدمتك
وشفت لذة نعمتك
شفت لذة نعمتك

چنت ياسيدي بهالنعمه حالم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
درت كل الدروب وحگ عطاشه اخيامك
اتبعت خطوة هـَواي وضيـّـعيت اجدامك
وعطف گلبك عليه ومن سمعت آلامك
صرت ناحب عليك وخادم الخدامك

طحت عبره على بابك
وصحت يذبح مصابك
صحت يذبح مصابك

يغاطيني بعطائك والمكارم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
جبتني وآنه آنه ولن وگفت ابابك
وتذل كل هامه لو ما سجدت على اعتابك
يمن جدك بچاك وفاطمه واحبابك
شكبرها ولن اصيراً لاطم على مصابك

بچت وجسمك تضمـّه
شحچت بس يمه يمه
شحچت بس يمه يمه

يعطشان وفجع گلب امه فاطم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
اموت ارحملي يومك لو نسيت أحزانه
وأنا وروحي ودموعي الباري الك سوانه
الدمع إلمن أريده وعيلتك حيرانه
ورقيه الله أكبر تصرخ وعطشانه

ضمه فتكم يضامي
ودمه وعبد الله دامي
ودمه وعبدالله دامي

الهظم حتى الرضيع بدمه نايم
شكبرها ولليخدموك آنه خادم

إلك مديت ايديه
ـــــــــــــــــــــــــــــــــــــــــــــــــــــــــ
للشاعر حسين الخرساني
محرم 1441

سلام على الحسين ودم اصاويبه
سلام على الجروح المالهن طيبه
سلام على الدموع البلن الشيبه
سلام على الغريب الماطفت ناره

هيج من ادخلتلك سرحت أفكاري
جن تكلي سولف عن حرك داري
وبديت انحب يلنك عالترب عاري
دامي وعيلتك بالنار محتاره

اسلم والدموع اتسلم ويايه
ردت احجيلك ومخنوك من هايه
النهر شنهو ويعز عليكم بمايه
ومايسكيك كطره وانته فجاره

مو مالت حجي وبالحضره احجيلك
اذا حتى السلام وياي يبجيلك
الجوارح والهوى وكل خطوه تمشيلك
تنحب عالمصاب الصار واخباره

كبل كلبي أدخلت من بابك أحزانه
يالعطشان الك هالروح عطشانه
انا السلم عليك بروحه  والسانه
سلام المنهظم يالتعرف أسراره

سلام على العيون العالحرم دارت
سلام عليهه لمن ذبلت وغارت
سلام على الخدود العالترب صارت
سلام على الدمه اليم زينب اتجاره

عنك من مشيت ترادت الحاله
احس بالروح ضلت بس الوشاله
صحت  عليك تبقى دموعي هماله
لو مو هالزمن تتغير ادواره
ــــــــــــــــــــــــــــــــــــــــــــــــــــــ
للشاعر حسين الخرساني

6/5/2019 الاثنين

يولياني يولياني ــــ راح امشي يولياني

وبعد ماظن تصح شوفه
وعليّ تتفرج الكوفه

والشامت تلگاني ــــ يولياني يولياني
ــــــــــــــــــــــــــــــــــــــــــــــــــــــــــ
راح امشي يولياني
ولتگولون عفتينه
يخوتي ما يخيرونه
تری المشدوده إيدينه
يردوني اليزيد امشي
واتوسط ملاعينه
يا ولياني إدعولي
بلچي تقل دواوينه

بلچن تعمه عين ايزيد
وبلچن ما يسوي عيد

وما يضحك عله احزاني
والشامت تلگاني
ـــــــــــــــــــــــــــــــــــــــــــــ
الحادي ما يخاف الله
ومشت ويّاه زينبكم
خلّه اجروح فوك اجروح
من مرني بمصارعكم
اشظنكم ما أذب روحي
لوما احبال عيلتكم
لذالك آنه مجبوره
من عالناگه اودعكم

ونفرض طاحت اضعوني
ترَكبوها وترَكبوني

حاچوني يخوّاني
والشامت تلگاني
ـــــــــــــــــــــــــــــــــــــــــــــ
مشت نوك اليسر والروح
شاغت وانخطف لوني
مدري اليا بلد هالناس
نـيّـتهم يودّوني
شنوحن شبچي واسألمن
ومن الچلمه منعوني
صرت احسب أَنه وروحي
چم مجلس يدخلوني

وچم ساعه يوگفوني
وچم چلمه يسمعوني

وگلمن هاذه أذاني
والشامت تلگاني
ـــــــــــــــــــــــــــــــــــــــــــــ
اشگد ابچيت عالناگه
حته احمر بياض العين
چم شامت صرخ زينب
أهلچ والگمر چا وين
رقيه تصيح ياعمه
اليسر والضيم اجانه منين
يعمه وصعبه اشوفنهه
نمشي وما نگل لحسين

أدري اجوابچ امسافر
خن تاني الفجر باچر

گلبي اتعوّد ايتاني
والشامت تلگاني
ـــــــــــــــــــــــــــــــــــــــــــــ
بس ظهريه عفتوني
شفت الموت انه بعيني
من طفكم لحد الشام
چا دهري اشيراويني
بكل هاي المسافه انشاف
وآنه النظره تچويني
بيّه شلون واعداكم
تصابحني وتمسّيني

چنت بخدري معروفه
هسه الناگه مكشوفه

ونكرو هيبتي وشاني
والشامت تلگاني
ـــــــــــــــــــــــــــــــــــــــــــــ
للشاعر حسين الخرساني

الدنيا تمشي
وأنه امشي
ومايضل بهاي كلشي
لازم تصير النهايه
وينطبك رمشي على رمشي
وانا ماخايف
اموت بكاع غربه
وغربه اليشيلون نعشي
ريت ماينشال نعشي
وانا ياهو
انا حيل زغير وازغر
حسين سر الكل فضيله
وضل ثلت تيام
مرمي على الترايب
وعيلته تلمهه الخرايب
والمصايب
منين ماتندار زينب
دارت وياها المصايب
ومن بعد هاي النوايب
شلون احسب
بأرض غربه
غمضن عيناي لو ما غمضن
ريت اموت وأنه وحدي
وريت لا لفني الجفن
حسين بعده يفور دمه
وجبرو اهله
ولليسر شال الضعن
كون هاي اللوعه تشتد
للمنيه
وبالمنازع
كون اردد ياسبيه
أه ليش حسين خده
على الوطيه
حتى يذبل كلشي بيه
يعني احس بكلبي يصرخ
ذاب هرشي
وهيج امشي

مشاركة الشاعر حسين الخرساني

في

تشييع مولاتي الزهراء عليها السلام

#موكب_اميرة_الحزن_زينب_س

🔹🔹الــمـلا عادل العيداني🔹🔹

🔹🔹الملا عمار جواد العبادي🔹🔹