Bek's Blog

Mahallamizdagi novvoyxona narxni oshirish uchun zo‘r texnikadan foydalanadi. Qoyil qolaman :)

Odamlar eng ko‘p navbatda turadigan va 4 ta novvoyxonadan eng avval sotib bo‘ladigani ham shunisi. Demak, yaxshiroq non qilishadi va savdolari ham zo‘r.

Har safar narxni oshirmoqchi bo‘lishsa, ikkinchi variant sifatida qimmatroq narxda, yanada mazaliroq non taklif qilishni boshlashadi. Shunda eski narxdagisi ham o‘zgarishsiz sotilaveradi.

1-2 oyda ko‘pchilik yaxshiroq nonni xarid qilishga o‘tadi. Yarim yillardan so‘ng esa, eski narxdagi nonni sotuvdan chiqarishadi va faqat yangi narxdagisini sotishadi.

Menimcha, qimmatroq non sotilishiga qarab, qancha vaqtdan keyin eski narxdagisini sotuvdan olish va masalliq xarajatlarini kamaytishni ham o‘ylab ko‘rishsa kerak.

Qoyil qoladiganim, shunchaki bugundan non 500 so‘m qimmat bo‘ladi, deyishmaydi. Variant berishadi, yaxshirog‘iga o‘rgatishadi va keyin qimmatroq narxni ushlab qolishadi.

Agar to‘satdan narxni oshirishsa, kim uchundir qimmatlik qilib, qo‘shni novvoydan non olib ko‘rishi va qaytmasligi mumkindir. Yana boshqa sabablar bordir.

O‘zimizning marketing 🤘

Hamma dasturchi bo‘lib ketsa, keyin ish topiladimi o‘zi, deb ko‘pchilik so‘raydi.

Ish topilmasligi mumkin, lekin har bir kishi dasturlash nima ekanligi haqida qisman bo‘lsa ham tushunchaga ega bo‘lishi kerak, menimcha. Qancha ko‘p bo‘lsa, shuncha yaxshi.

Chunki, keyingi hayotimiz baribir elektronika ichida o‘tadi. Dasturlash esa har bir kasb ichiga kirib boradi. Bu xuddi ob-havo haqida gaplashishga o‘xshab qoladi.

Tasavvur qiling, hozir siz issiq yoki sovuq, yomg‘ir yoki qor, qiyinroq terminlardan esa Selsiy va namlik darajasi haqida bilmasangiz, ob-havo haqida boshqalar bilan muloqot qila olmaysiz-ku.

Dasturlash ham hayotimizda shunday odatiy muloqot vositasidek bo‘lib qoladi. Kodlar qanday ishlashini tushunmasangiz, kasbingizni ham to‘liq tushuna olmaysiz.

Shuning uchun, biror dasturlash tilini o‘rganib qo‘ygan foydali. Hozir 2-3 oyda buni o‘rgatishyapti. Professional bo‘lishni xohlasangiz, yillab shug‘ullanasiz.

Lekin 2-3 oy internetdan bo‘lsa ham, dasturlash tillari haqidagi darslarni ko‘rib qo‘ygan ma’qul yoki yaxshirog‘i biror kursda qatnashish kerak. Shu vaqt davomida dasturchi bo‘lishni xohlaysizmi, yo‘qmi aniqlab ham olasiz.

Chunki, dasturchilikka o‘qiganlarning ham juda ko‘pchiligi kod yozgisi kelmaydi. Ya’ni hamma ham dasturchi bo‘la olmaydi, majburlab shu kasbni tanlash ham yaxshi emas.

Qisqacha aytsam, 2-3 oy dasturlash darslarida o‘qib ko‘ring. Sizga yoqsa, pul keltirmasa ham davom ettirasiz. Professional bo‘lganingizda esa, pul sizni izlaydi ;)

@trolluz Alisher degan odam bilan janjal qilyaptiku, yozishmalarini ham chiqaribdi.

Shunda eng zo‘r joyi: Xitoyda o‘qiydigan bola pandemiya sabab Uzbga qaytgani, lekin vaqtincha Turkiyaga ketib, ishlab, onlayn o‘qiyotgani bo‘lsa kerak a?)

O‘sha bolaga havas qildim, oson ekanda, tavakkal xohlagan joyiga yashagani ketvorish. Maniyam shunaqa qigim kep ketti :D

Facebook o‘lyapti, menimcha...

Facebook'ga odam faqat “privichka” bo‘lib qolgani uchun kiradi, shekilli. Kontent qiziq emas, o‘ziga jalb qilmaydigan bo‘lib qolgan. Texnik tomondan ham noqulay - juda sekin ishlaydi, funksiyalari ham bir-klikli emas, bir xil kontentni qayta-qayta ko‘rsataveradi.

Instagram'da qiziqroq qayta. Follow/Unfollow qilib yuborish ham oson va Facebook'ga nisbatan funksiyalari tezroq ishlaydi. User Interface ham ancha qulay.

Telegram esa avvalo muloqot uchun bizda birinchi o‘ringa chiqib oldi. Kontent masalasida ham faqat o‘zimizga kerakli kanal, guruh, botlarga a’zo bo‘lib qo‘yishimiz mumkin. Interfeys, funksiyalari qulayligi, tezligi bo‘yicha esa Facebook va Instagram'dan o‘n martalab yaxshi.

TikTok'da ham zo‘r kontent ko‘p. Soatlab YouTube'da video ko‘rish qiziq emas bo‘lganda, shundoq ham informatsiya, foydali ma’lumotlar ko‘p zamonda, chalg‘ish uchun TikTok'ni bir sayr qilib chiqish qulay. Yoqimsiz kontent ko‘pligi ham bor gap, lekin yaxshi kontent ham bor va ko‘paymoqda. Menimcha, baribir Facebook o‘rnini TikTok egallab oladi.

Facebook har doim o‘zini almashtirib bo‘lmasdek, ko‘rsatgan. Lekin yangi avlod - hozirda 22 yoshdan kichiklar uchun Facebook umuman qiziq emasdek, menimcha foydalanishmaydi ham. Keyingi 5 yilda “eski Odnoklassniki” bo‘lib, faqat qariyalar qolsa kerak Facebook'da :)

Va nihoyat, Telegram 2021-yildan reklama kabinetini ishga tushirmoqchi.

Lekin hali u qanday ishlashi haqida ma'lumot yo‘q. Hozircha, anig‘i shuki - reklamalar bosh sahifada, shaxsiy chatlarda ko‘rinmaydi.

Durovning yozishicha, kanallar adminlari shundoq ham reklama chiqarib pul ishlayapti, Telegram esa endi rasmiy, yaxshiroq imkoniyatli reklama kabineti taklif qilarkan.

Menimcha, shu kabinetda istalgan odam reklama sotib oladi va Telegram uni kanallarda o‘zi ko‘rsatadi. Bunda reklama shu tizimga a'zo bo‘lgan kanallarda ko‘rsatilsa kerak.

Qiziq, qanday bo‘larkan bu monetizatsiya usuli. Men yaxshiroq usul kutgandim. Yoki Telegram nima qilmoqchiligiga hali tushunmadim :)

+ Telegram qandaydir pulli funksiyalar ham taklif qilmoqchi. Menimcha, onlayn ta'lim uchun nimadirlar berilsa kerak boshida. Chunki yaqindagina guruhlarda vebinar qilish uchun ovozli chatlar funksiyasini chiqargandi. Balki hatto Zoom o‘rnini ham egallar.

Telegram juda aqlli kompaniya. Ko‘p foydali yechimlar bera oladi, deb o‘ylayman.