የሥራ እና ክህሎት ሚኒስቴር minister of labor and skills

ክህሎት መር የሥራ ዕድል ፈጠራን በማጠናከር የዜጎችን ተጠቃሚነት የሚያሳድጉ ውጤታማ ተግባራት እየተከናወኑ ነው

ክህሎት መር የሥራ ዕድል ፈጠራን በማጠናከር የዜጎችን ተጠቃሚነት የሚያሳድጉ ውጤታማ ተግባራት እየተከናወኑ መሆኑን የሥራና ክህሎት ሚኒስትር ዴኤታ ሰለሞን ሶካ ገለጹ፡፡

የሥራና ክህሎት ሚኒስትር ዴኤታ ሰለሞን ሶካ ለኢዜአ እንደገለጹት፤ በለውጡ መንግሥት የተተገበሩ የሪፎርም ሥራዎች የወጣቶችን ኢኮኖሚና ማኅበራዊ ተጠቃሚነት የሚያጎለብቱ ተጨባጭ ውጤቶችን አስገኝተዋል።

ባለፉት 4 ዓመታት በተከናወኑ ዘርፈ-ብዙ የሪፎርም ሥራዎች ለ19 ነጥብ 5 ሚሊዮን ዜጎች የሥራ ዕድል መፈጠራቸውን ጠቁመው፣ ከዚህም መካከል 75 በመቶ በላይ የሚሆኑት ወጣቶች መሆናቸውን ተናግረዋል።

ለውጡ ካስገኛቸው ዋና ዋና ስኬቶች መካከል ወጣቶች ከተለመደው የቅጥር ሐሳብ ወጥተው ወደ ሥራ ፈጣሪነት እንዲሸጋገሩና ለሌሎች የሥራ ዕድል እንዲፈጥሩ ምቹ ሁኔታዎችን መፈጠራቸውን ለአብነት ጠቅሰዋል፡፡

በተጨማሪም የቤተሰብ የንግድ ሥራዎች እንዲስፋፉ በማድረግ ረገድ አበረታች ውጤቶች መገኘታቸውን አክለዋል፡፡

የዲጂታል ቴክኖሎጂዎች መስፋፋትና ለዘርፉ የተሰጠው ልዩ ትኩረት ለወጣቶች ዘመናዊ፣ ፈጣንና ምቹ የሥራ ዕድሎችን የፈጠረ ሲሆን፣ ይህም በዓለም አቀፍና በአህጉራዊ የዲጂታል የሥራ ገበያ ላይ የሀገሪቱንና የወጣቶቹን ተወዳዳሪነት ማሳደጉን አብራርተዋል።

የሴቶችና ማኅበራዊ ጉዳይ ሚኒስትር ዴኤታ ሙና አሕመድ በበኩላቸው፤ ከለውጡ በኋላ የወጣቶችን አቅም በማሳደግ ረገድ ሰፊ ስራዎች መሰራታቸውን ጠቅሰዋል፡፡

በዚህም ተስፋ ሰጪ፣ ዘላቂና ክህሎት መር የሥራ ዕድሎችን በተሻለ ሁኔታ ለመፍጠር ትልቅ አቅም መገንባቱን አብራርተዋል።

በመዲናዋ የሥራ ዕድል ተጠቃሚ ከሆኑት መካከል ወጣት ጋሻው ዓለሙ የመኪና ጎማና ባትሪዎችን መልሶ ጥቅም ላይ የማዋል ሥራ ላይ መሰማራቱን ጠቅሷል፡፡

የምናመርታቸው ምርቶች የአካባቢ ብክለትን ከመቀነስና ቆሻሻን ወደ ሀብት ከመቀየር ባለፈ፣ የውጭ ምንዛሬ ግኝትን የሚያሳድጉና ሰፊ የሥራ ዕድል የሚፈጥሩ ናቸው ብሏል።

በማኅበር በመደራጀት ከውጭ የሚገቡ ምርቶችን የሚተኩ የቤትና የቢሮ መገልገያ ቁሳቁሶችን እያመረቱ መሆናቸውን የተናገረው ደግሞ ወጣት አስቻለው ጌትዬ ነው፡፡

በቀጣይም የምርቶቻቸውን የገበያ ተደራሽነትና የሥራ ዕድሎችን ይበልጥ ለማስፋፋት እየሠሩ መሆናቸውን ተናግሯል። መረጃው የኢዜአ ነው።


ሰኔ 14/2018 ዓ.ም፤ የሥራና ክህሎት ሚኒስቴር

አካባቢያዊ ጸጋን መሰረት ያደረገው ቆላማ አካባቢዎች የሚገኙ ኢንተርፕራይዞችን ምርታማነትና ኑሮ የሚያሻሽል ሥራ !

​በኢትዮጵያ ቆላማ አካባቢዎች የሚገኙ ጥቃቅንና አነስተኛ ኢንተርፕራይዞችን (MSMEs) ብቁና ተወዳዳሪ ለማድረግ እንዲሁም የኅብረተሰቡን የኑሮ ደረጃ በዘላቂነት ለማሻሻል ያለመ የክህሎት ሥልጠና በአዳማ ፖሊ ቴክኒክ ኮሌጅ ተሰጥቷል።

በሥራና ክህሎት ሚኒስቴር አዘጋጅነትና በቆላማ አካባቢዎች የዘላቂ ኑሮ ማሻሻያ ፕሮጀክት (LLRP-II) ድጋፍ የተሰናዳው ይህ ሥልጠና፤ በወተት ሀብት ልማት፣ በዶሮ እርባታ እና በዕሴት ሰንሰለት (Value Chain) ላይ ያተኮረ የሥራ ዕድል ፈጠራን መሠረት ያደረገ ነው።

​በቆላማ አካባቢዎች ለሚገኙ የሥራ ዕድል ፈጠራ አስተባባሪዎች፣ ባለሙያዎችና ተጠቃሚ ኢንተርፕራይዞች የተሰጠው ይህ ሥልጠና ዋና ፋይዳው በቆላማ አካባቢዎች በስፋት የሚገኙትን የተፈጥሮና የእንስሳት ሀብት ጸጋዎች በዘፈቀደ ሳይሆን በእውቀትና በሳይንሳዊ መንገድ በማልማት ወደ ላቀ የኢኮኖሚ ጥቅም መቀየር ነው ተብሏል።
​
በአካባቢው ያሉ ኢንተርፕራይዞች ከለመዱት ባህላዊ የእንስሳት አያያዝና እንክብካቤ አሠራር ተላቀው፣ ምርትና ምርታማነትን በሚያሳድጉ ዘመናዊ የቴክኖሎጂና የአመራረት ስልቶች እንዲተኩ ትልቅ አቅም እንደሚፈጥርም ተጠቁሟል ።

በሥራና ክህሎት ሚኒስቴር የአቅም ግንባታ ዴስክ ኃላፊ አቶ መላኩ ወልደዮሐንስ እንደገለጹት፣ ይህ ስልጠና በቆላማ አካባቢዎች የሚገኙ ወጣቶችና ሴቶች በእንስሳት ሀብት ልማት ላይ በስፋት እንዲሳተፉ በማድረግ፣ የገቢ ምንጫቸውን እንዲያሳድጉና የኑሮ ደረጃቸውን በዘላቂነት እንዲያሻሽሉ ዕድል ይከፍታል።
​
አክለውም በተዘጋጁ ሞጁሎች የተሰጠው ይህ ስልጠና በቆላማ አካባቢዎች በወተት፣ በዶሮ እርባታና በማድለብ ዙሪያ ያሉ እንቅፋቶችን በመለየት ወደ መልካም አጋጣሚና ሰፊ የሥራ ዕድል መቀየር የሚያስችል መንገዶችን ማመላከቱን ገልፀዋል ።
​
በተጨማሪም በንድፈ-ሐሳብ ብቻ ሳይወሰን በተግባር የተደገፈ ስልጠና በመሆኑ፣ ሰልጣኞቹ ወደየክልሎቻቸው ሲመለሱ አዳዲስ ኢንተርፕራይዞችን በብቃት ለማደራጀት እንዲሁም ነባሮቹን ለመደገፍና ለማጠናከር የሚያስችል እውነተኛ አቅም እንደሚፈጥር ተናግረዋል።

ሰኔ 12/2018 ዓ.ም፤ የሥራና ክህሎት ሚኒስቴር

የጀርመን የልማት ትብብር ድርጅት (KFW) ልዑካን ቡድን በገዋኔ ግብርና ኮሌጅ የሥራ ጉብኝት አደረገ

በጉብኝቱም የኮሌጁን ሥልጠና በጥራትና በዲጂታላይዜሽን ለማገዝ የሚያስችል ከፍተኛ የድጋፍ ስምምነት ተደርሷል።

በዚህ ስምምነት ኮሌጁን ሙሉ በሙሉ በዘመናዊ የሶላር ኃይል አቅርቦት ለመገንባት ከ800 እስከ 1000 ሜትር ካሬ የሚሸፍን የሶላር ፓወር ተከላ እና አነስተኛና መካከለኛ የሶላር ውኃ መሳቢያ ፓምፖች እንዲገጠሙለት ተወስኗል።

በተጨማሪም ዘመናዊ ላብራቶሪዎች፣ ስማርት ክፍሎች፣ የዲጂታል ሥልጠና አቅሞች፣ የእርሻ ትራክተር  እንዲሁም ለተማሪዎች የመስክ ጉዞና ለተቋማዊ አገልግሎት የሚውሉ ተሽከርካሪዎች  የድጋፉ አካል መሆናቸው ተገልጿል።

በኮሌጁ ውስጥ የወተትና የወተት ተዋፅኦ ማቀናበሪያ፣ የአትክልትና ፍራፍሬ ማቀናበሪያ፣ የእንስሳት መኖ ማቀናበሪያ  የአግሮ-ፕሮሰሲንግ ኢንዱስትሪዎችን ለማቋቋም ስምምነት ላይ ተደርሷል።

እነዚህ በኢንዱስትሪ ደረጃ የሚቋቋሙ ማዕከላት ለተማሪዎች የተግባር መማሪያ ከመሆናቸውም በላይ፤ ለአካባቢው አርብቶ አደር ማህበረሰብ ሰፊ የሥራ ዕድል የሚፈጥሩና የኮሌጁን የውስጥ ገቢ በከፍተኛ ደረጃ የሚያሳድጉ ናቸው ተብሏል።

የKFW ያደረገው ይህ አዲስ ድጋፍ በገንዘብ ሲገመት ከ280 ሚሊዮን ብር በላይ ሲሆን፤ ቀደም ሲል ሚኒስቴሩ ባመቻቸው ዕድል  ከቻይና መንግስት  ያገኘውን የ90 ሚሊዮን ብር የዲጂታላይዜሽን ማጠናከሪያ ድጋፍ ጨምሮ፣ ኮሌጁ በአጠቃላይ ከ370 ሚሊዮን ብር በላይ የሚገመት የአጋር አካላት ድጋፍ  ተደርጎለታል፡፡

ሰኔ 14/2018 ዓ.ም፤ የሥራና ክህሎት ሚኒስቴር