#مرحوم_صافی_تبریزی

چون دشتِ کربلاده شهیدانِ کوی یار
جان و دلیله اولموشیدی جمله جان نثار

باش قویدولار اودور هامی میدانِ عشقیده
هر کیمسه اوز محبّتنی قیلدی آشکار

گورموشدولر مقاملرین بیر به بیر تمام
معیاریجه محبّته گوستردیلر عیار

بی اختیار ایلدیلر مرگی پیشواز
آلموشدی اختیارلرین مهربان نگار

قان آخدی بسکه جای خدنگ و سِناندن
بیر طُرفه لاله زاره دونوب دشت و کوهسار

دورت بیر طرفدن اوخ گلوری آنلاموردیلار
بیر دسته گُل سانوردی ، جوانانِ گلعذار

گون ایسّسی ، سوسوزلوق اودی ، یاره سوزشی
گَلدی آنا صودی کیمی شیرین و خوشگوار

هرگز دَمیر آجیلیقی اوخ نیزه زحمتی
بولمزدیلر او نچّه وفادارِ دین شعار

یتمیش ایکی شهید یکایک او عرصه ده
مقتولِ تیغِ تیز اولوب ، تیرِ جان شکار

تا که یتیشدی امرِ شهادت نهایته
زینب گوزینده تیره و تار اولدی روزگار

گون تک حسین باشی اوجالوب بیر جِدا بویی
محشر او عرصه گاهده اولموشدی آشکار

از بسکه پایداریدی سلطانِ دین باشی
اوّل چکیلدی نیزه ده داره ، مسیح وار

تکبیر باشلادی که منم کشتهء نماز
قالدی جِدا باشینداکی تکبیری یادگار

هر دسته اوز یرینه قایتدی او جَمعدن
هم لشگرِ پیاده ، همی لشگرِ سوار

سعد اوغلی گلدی قتلگهه سیر و گردشه
گوردی دگل او عرصه مگر گلشنِ بهار

هر رنگ گُل آچوبدی او صد پاره جسملر
رشگِ بهشتِ عدنیدی میدانِ کارزار

امّا او گلشن ایچره ایده لّه حزین حزین
هر بلبل اوز گُلندن اوتور ناله ، چون هَزار

لیلا باسوبدی سینیه اکبر جنازه سین
اولموش سریّه قاسمِ ناکامه اشکبار

امر ایتدی ای گروه دورمیون ، ایدون
بیر بیر شهیدلر بدنندن باشین کنار

کسدی آناسی لیلی مضطر باخا باخا
اکبر باشینی ، منقذِ بی رحمِ نابکار

یاندی عروس ، کسدیله داماد باشینی
باخموبدیلار که اللرینون قان حناسی وار

بیر بی حیاده کسدی علمدار باشینی
ایلوب اوزینه خلق آرا ، اسبابِ افتخار

راوی دیَر که کوفیه وارد اولاندا من
گوردوم جِداده باشلاری بیر بیر ایدر گذار

بیر باشی بیر لعین آتنون بوینونا سالوب
انظارِ خلقده ایلیوب چوخ او باشی خوار

آلدیم خبر کیمدی بو باش صاحبی؟ دئدی
سقّای تشنه کامیدی ، عبّاسِ نامدار

گچدی جِدایه رأسِ جوانانِ هاشمی
هر نیزه دار آلوب اله بیر دانهء انار

مقصودیمیز بیر اوزگه مصیبتدی (صافیا)
گیچماق گرک بو نکته نی بر وَجهِ اختصار

وقّاص زاده ایستدی قیلسون مجدّدا"
اول داغدار قلب لری بیرده داغدار

ظاهرده فکری زینبه آزاریدی ، ولی
باطنده روحِ فاطمه نی قویدی بی قرار

بیر اود ووروب دلِ جگرِ مصطفی' یانوب
دوشسه یانار ، اوددان اگر کونه بیر شرار

بو باشلار ایچره سویلدی بیر باشی گورمرم
کی آرتورور او باش منه چوخ عزّ و اعتبار

اولسا او باش الیمده اگر شامیده منیم
اولّام یزیددن هامی لطفه امیدوار

آخر وداعیده شهِ لب تشنه خیمه دن
میدانه گَتدی افسرده بیر طفلِ شیر خوار

گل تک سولوب سارالمیشدی غنچه لبلری
باخسیدون اوندا ظاهریدی حالِ احتضار

سو ایستدی او طفله ، حسین ابن فاطمه
اتمامِ حجّت ایلدی اول معدنِ وقار

اوز خدمتینده حرمله قویموب قصور اولا
سیراب ایلدی اونی پیکانِ آبدار

بو دم گرک تاپولسون او طفلینون جنازه سی
گر پایمال اولسادا بو دشت بو قفار

ویردی سراغ لشگرِ اشراردن بیری
دفن ایتدی پشتِ خیمه ده ، اول طفلی شهریار

یوز قویدولار همان طرفه اتّفاقیلن
بیر نچّه سخت قلب ، ستمکار نیزه دار

سبقت ایدردی بیر بیرینه بو خصوصده
باخ گور نقدر صابریدی حیِّ کردگار

لال اول دلیم دیمه دوتوب اود یاندی مجتبی'
اودلاندی قلبِ حیدرِ کرّار ، زینهار

بیردن ویراردی نیزه نی یوز سنگدل یره
گَرد و غبار ایلدی رویِ سپهری تار

گوگده قاریشدی بیر بیرینه گَرد و دودِ آه
گوز گورمیوب گوزی ، شبِ تاریک اولوب نهار

بیرده ووراندا نیزه لری غیظیلن یره
منظور اله گلوب داخی دفع اولدی انتظار

سس یاتدی ، های و هوی کسیلدی او قومدن
کم کم هوا آچیلدی ، اَنوب قوزانان غبار

بیلدی هامی تاپوبدیلا اصغر جنازه سین
سعد اوغلنون مُیّسر اولوب کامی هر نه وار

ناگاه گوردیلر وورولوب نیزیه باشی
ذبح ایلیوبله تازه ، اودور تازه قان دامار

باشین جِدا باشیندا گورن ، حیف اولا دئدی
اولموش مقرّ غنچهء نشکفته نوکِ خار

یا رب نه نوع صبر ایلدی ئولمه دی رباب؟
اولموب تعجّبم بیله موقعده انتهار

(صافی) جزای حرمله دوزخدی بیل یقین
عقرب اونون انیسی اولور ، هم جلیسی مار.

التماس دعا

اشعار ناب در کانال زیر⬇⬇
https://t.me/majmaol_ashaar