НИЛУФАР ТОҲИРОВА ШЕЪРЛАРИ

ПОЙТАХТ МУСОФИРЛАРИГА

Бухоро, Навоий, Қарши, Самарқанд,
Ҳу деса эшитгай пойтахт овозин.
Шукурлар қилинг сиз ҳаётингиз қанд,
Сиз билан бошлангай омад парвози.

Мусофирман деманг, мусофир асли
Соғинчга сабридан қаср қурганлар.
Бир чечак кўрмасдан гул баҳор фасли,
Қор кечиб, ҳадикда ризқин терганлар.

Ижара уйларнинг гунг деворлари,
Қанча асрорларни ютиб чарчаган.
Тошдан тош бошларнинг кўз ёшларини,
Кўрсатмай муз бағрин тутиб чарчаган.

Онасин қайтишин соатлар эмас,
Жажжи бармоқчалар ойлаб санагай.
Аллалар тинглашни қилганча ҳавас,
Соғинчлар бағрида йиғлаб тунагай.

Мусофирманг деманг довонлар ошиб,
Йироқлар чангида қолмас зорингиз.
Ҳар саҳар янги завқ, ҳайратлар қўшиб,
Она юрт кўк этар ғурур орингиз.

Кўзингиз ойнасин яшнатар ҳар кун,
Меҳрнинг нурида чизилган дийдор.
Бахтнинг қучоғида уйғонар мамнун,
Умидлар ниҳоли кўрмасдан озор.

Байрамлар ўтмайди ташрифингизсиз,
Қадрдон уйларнинг азиз тўрида,
Ҳар фасл бўлсада оларсиз кувват,
Меҳрибон бағрлар оташ қўридан.

Дунё бозорида саналган умр,
Ўлчанган ризқ учун нолимоқ гуноҳ.
Қаерда бўлмасин яқинми йироқ,
Ватан фарзандларин асрасин Оллоҳ!

Мусофирманг деманг пойтахт ҳурлари.
Номингиз таралган бутун жаҳонга.
Келгинди эмассиз, шукрона айтинг,
Сизни болам деган Ўзбекистонга!

НИЛУФАР ТОҲИРОВА

https://t.me/cavsar

СЕНСИЗ

Ишқ энди йўқ оғриғи бор дил тўрида,
Яна кўнгил унсиз йиғлар дард зўрида,
Муҳаббатнинг кўзларида топган меҳрим,
Куйдиришин билмас эдим тафт-қўрида.

Дардим билан камол топган сенсизлигим,
Яна ўсди қалбга солиб ҳижронингни,
Наҳот сенга билинмайди менсизлигим,
Наҳот дилдан ололмадим армонингни.

Қийналаман,киприкларим қотиб қолган,
Тинмай оққан кўз ёшимнинг шўрлигидан,
Айрилиқ ҳам дармонини топиб олган,
Юрагимнинг гўдак каби ғўрлигидан.

Тонг отади,оппоқ олам таровати,
Билинмайди,кўринмайди қароғимга,
Яна қанча давом этар синоати?
Етарманми бир кун умр фароғимга?

Хаёлимнинг ҳуввиллаган кўчасида,
Тентирайди етим қолган орзуларим,
Айрилиқнинг базми-жамшид кечасида,
Юрагимни осиб қўйди қайғуларим.

Ҳаёт ширин,жон қарзимни бергим келмас,
Умидворлик ҳисларимнинг халоскори,
Беҳудага қийногига лойиқ билмас,
Демак яна қайтиб келар ишқ баҳори.

Овинаман тушкунликнинг тўрин йиртиб,
Хаёлимда ишқ суратин чизиб такрор,
Ёдинг билан кетсин майли умрим ўтиб,
Агар сенсиз қайтиб келса яна баҳор.

НИЛУФАР ТОҲИРОВА

https://t.me/cavsar

ҲАР КУНИ

Ҳар куни битта йўл,
Бир хил ҳаракат.
Автобус кутгандан яёв юрган соз.
Ҳар куни мингта ўй, жонинг минг ҳалак,
Ҳаётинг ўтмоқда чиқармай овоз.

Қадамлар сасидан қувнайсан баъзан,
Шукрким ҳеч кимга бўлмагансан юк.
Сокинлик ўзгача таратар оҳанг,
Ёлғизлик Худога айлаган суюк.

Ҳар куни кимгадир ёрдаминг тегар,
Дуолар бағишлар дилингга сурур.
Мусофир юртда ҳам омадинг берар,
Руҳингни кўтарар шижоат, ғурур.

Аслини йўқотар нозик қўлларинг,
Кунларинг улғайиб борар меҳнатдан.
Тиканли бўлса ҳам майли йўлларинг,
Яратган асрасин фақат миннатдан.

Ҳалолдан топилган насиба--роҳат,
Оппоқ орзуларда сузар туйғулар.
Юракда бор экан сабр-қаноат.
Бир куни тарк этар майда қайғулар.

Телефон жаранги,азиз овозлар--
Умид ниҳолига тушиб турган нур.
Ҳислар маржонидан яшнар қоғозлар,
Ювилган ойнадек кўнгил ҳам биллур.

Ҳар куни битта ғам--соғинч, ортидан,
Ўн қувонч яшайди хаёлда беун.
Юксалиб  яшайсан, қуёш юртида,
Жонингдай азизлар кутгани учун.

Ҳар куни битта йўл, бир хил ҳаракат,
Шукрким ҳеч кимга бўлмагансан юк...

                   НИЛУФАР ТОҲИРОВА
                      
https://t.me/cavsar

ОНАМ МАКТУБИ

Ҳар куни хаёлдан суратинг ўтар,
Ҳар туни дуолар тўрида ўзинг,
Дилимни соғинчлар қачон тарк этар?
Жон қизим порласин омад юлдузинг.

Қайтишинг кутяпман соатлар санаб,
Ҳижроннинг лабида юрагим қони,
Кўп каби мени ҳам бермаган боғлаб,
Банданинг ҳар лаҳза омонат жони.

Биламан ишлайсан югуриб-елиб,
Рўзнинг ғорларини тўлдирмоқ учун,
Яшадинг гул умринг йироққа бериб,
Фарзандинг бахтини кулдирмоқ учун.

Ўйлайман,қолганда ҳаволар совиб,
Кўзларим илинмас тун-кечаларда,
Кетмаса бўлдийди оёғинг тойиб,
Эҳтиёт бўлиб юр тош кўчаларда.

На баҳор гулларин тўйиб ҳидладинг,
На кузнинг мевасин кўргансан тотиб,
Ёзда ҳам ҳаловат нима билмадинг,
Соғиндим кел болам ишингдан ортиб.

Телефон қиласан шукр,ҳар саҳар,
Дийдоринг ўрнини босолмас сасинг,
Дунёда борлигинг олтину гавҳар,
Қалбимнинг ороми олган нафасинг.

Кўзимнинг қораси дастёрим боланг,
У билан бағрим бут,кўнглим нурафшон,
Лек сенинг жойингни босолмас онанг,
Йўлингга теримилиб кун санар ҳамон.

Елкандан дуёнинг ташвишин отиб,
Қайт болам ортингга кўзимнинг нури,
Соғинчинг дардида қолмайин ётиб,
Дийдоринг қалбимнинг дармон,ҳузури.

                   НИЛУФАР ТОҲИРОВА
                         21.05.2019й