▪️يطاموره الدمع جاري
اذكرج تلتهب ناري▪️
ــــــــــــــــــــــــــــــــــــــــــــــــــــــــ

ندك ونوح اليوم عله امصاب المسموم تره الكاظم مظلوم
سيدي
**
عله الحير طبيبه تون حته المصيبه
رحل وجنازته فوك الجسر ضلت غريبه

الفرج بالجمعه كلهم واجو هليله كلهم
لجن ناعي الحزن لمن نعه خيب املهم

منو الهز الطغيان وجلد صبره السجان الك حن الآذان
سيدي
***
بسجن خلص حياته فلا تنعد صفاته
كظم غيضه وصفن حته السجن من معجزاته

كمر وجها ويلالي الشمس صاحت حلالي
تذوب وتحترك يمه اذا كلها تعالي

منو المثلك مسجون شغل هاكد هارون بصلاتك ما يدرون
سيدي
****

تعب ماكو ونساهر ونصبناها الجوادر
وحك راية علي بهذا الدرب ما عفنه زاير

خدمناك بكلبنه الهله اشكدها بدربنه
يبن جعفر ابد ما ينتهي تدري احنه حبنه

نحب هالخدمه اهواي بثوابك ننطي الماي ندلل كل مشاي
سيدي
*
يمن عشكك سباني وسحرني وجنناني
يمين الله صحت هذا العشك ما مثله ثاني

احبنك قليله يبو العشره الطويله
اعوفك وابتعد ما ابتعد بل مستحيله

امن طب للحضره ارتاح احس مني الهم راح دليلي بصحنك صاح
سيدي
**

احب نسمة عبيرك احب كلشي بضميرك
وحك رب العشك كلبي ابد ما عنده غيرك

تعب روحي نسيته وألك عمري فديته
يالسلطان الهوه حته الهوه ايحبك لكيته

شلي بروحي بلياك حبيبي وما انساك احن دوم الملكاك
سيدي
***
الضريحك لو خذوني اهيم انه بجنوني
افرفحلك هله واعطش شبك حته بعيوني

صحت حلوه صفاته ابد ماكو بحلاته
الكمر كله للكمر ماكو بشر هاكد غلاته

يسبحان السواه دخيل الله اشمحلاه يهنيال الحباه
سيدي
**
تمت
تحسين الخفاجي
الناشر رحيل القوافي الفاتحه ابوي الغالي واخواني سعيد وكريم ومحمد وماجد والجميع اموات شعيه أمير المؤمنين عليه السلا