Erkin Vohidov

TUSHUNGAN ODAM

Kimga hasrat qilsam bag'rimni o'yib,
Kimdan yuragimga tilasam malham,
Ohista yelkamga qo'lini qo'yib,
Yupatar: sen o'zing tushungan odam.
Gohida alamim sig'may ko'nglimga,
She'r bo'lib to'kilar va lekin ey voh,
Qayga borsam she'rim qaytar qo'limga,
Tushungan odamsan, dunyodan ogoh...
Hayhot, deyman, adling shumi, ey xudo,
Shundoq chizilganmi tarxingda olam
Nogoh falakdan ham qaytar aks sado,
Axir sen tushungan odamsan, bolam.

✍ Erkin Vohidov

@Erkin_Vohidov

Erkin Vohidov


QALB SHUNDAY UMMONKI

Qalb shunday ummonki, uning bag'rida,
Dahshatli dolg'alar silsilasi bor.
Qalb shunday zaminki, otash qa'rida,
Vulqonlar otguvchi zilzilasi bor.

U bir sayyoradir. yerdek shafaqgun,
U bir olamdirki, bilmas nihoya.
Uni mehvaridan chiqarmoq uchun,
Atom jangi emas, bir so'z kifoya.

#💥 She'r sehri 💥
@Erkin_Vohidov

Do'st bilan obod uying

Do'st bilan obod uying
Gar bo'lsa u vayrona ham
Do'st qadam qo'ymas esa
Vayronadir koshona ham

Kim senga xamroz emasdur
Bog'araz deb o'lama
Gohida dushmanlik qilurlar
Qo'l siqib do'stona ham

So'rma mendan kim diloro
Do'stmi yo jonina deb
Do'st mening yonimdadir
Jonimdadir jonona ham

Yaxshi do'stlar davrasida
Ochilursan har zamon
Ko'kni shoda ichra topgay
Marvarid durdona ham

Mehr uyin keng ochsang Erkin
Do'st bo'lur begona ham
Erkin Vohidov


By: @sherlarolamii
@Erkin_Vohidov

​​Yangi yil she'ri

Inson fe’li ajabdan ajab,
Yo‘qdir unga mezonsiz olam.
Yulduzlarni o‘lchar botmonlab,
Qarichlaydi cheksizlikni ham.

O‘zi ega, o‘zi qul mangu
O‘zi topgan aqidalarga,
Ne dey, hatto mangulikni u
Bo‘lib chiqqan daqiqalarga.

Daqiqadan soatlar yig‘ib,
Kunlar tuzib oy jam qiladi.
Yig‘lamaydi umr o‘tdi deb,
Yil o‘tdi deb bayram qiladi.

Ko‘paysa-da ajinlar harchand,
Oqarsa-da yillardan boshi,
Quvonadi — ko‘paydi farzand,
Sevinadi — ulg‘aydi yoshi.

Bu tuganmas orzu-havasda
Bor umidbaxsh imonga asos:
Inson o‘lmas.
Asta va asta
Boqiylikka o‘tadi, xolos.

Erkin Vohidov

@Erkin_Vohidov

Erkin Vohidov

***
QARO QOSHING

Qaro qoshing, qalam qoshing,
Qiyiq qayrilma qoshing, qiz.
Qilur qatlima qasd qayrab —
Qilich qotil qaroshing, qiz.

Qafasda qalb qushin qiynab,
Qanot qoqmoqqa qoymaysan.
Qarab qoygil qiyo,
Qalbimni qizdirsin quyoshing, qiz.

💥💥 She'r sehri 💥💥
@Erkin_Vohidov

#Bir chimdim kulgu :))

MATMUSANING UYLANISHI

Safar qildi Matmusa
Olisdagi shaharga.
Ul shaharda yo'liqdi
Bir hur pari-paykarga.
Bo'ydoq edi Matmusa,
Uzoq turmay o'ylanib,
Qishlog'iga qaytdi u
Ul sanamga uylanib.
Xech gap emas baxt kelsa,
Aytar omad deb buni:
Uch oy o'tmay jononning
Yaqinlashdi oy-kuni.
Hamma hayron, hamma lol:
«Biz bir yilcha kutardik,
Matmusaning xotini
Chiqib qoldi udarnik».
Ne ekan deb, shoshilib
Zarbdorlikning bu siri,
Chopib keldi suhbatga
Donishgazet muxbiri.
«Biz ham chetda emasmiz,
Biz ham sherik mehnatga», -
Deb Matmusa tirjayib,
Qo'shiladi suratga.
Ertasiga bu xabar
Tarqab ketdi har yoqqa.
Sarlavha ham chiroylik:
«Ilg'or o'rnak — qishloqqa».
Xat yog'ilar erlardan:
«Tashabbusni qo'llaymiz!
Xotinlarni tajriba
Almashishga yo'llaymiz!»
Alvon-alvon shiorlar
Paydo bo'lar har joyda:
«Yangilikka — katta yo'l!»
«To'qqiz oyni — uch oyda!»
Hay'atlarda kekkayib
Yayrab yurar Matmusa.
Biz undoq, biz bundoq deb
Sayrab yurar Matmusa
Alqissa shu — ba'zida
Shunday bo'lib qoladi —
Birov qilib mehnatni,
Birov obro' oladi.

© Erkin Vohidov

@Erkin_Vohidov

PO'LAT

U dastavval oybolta bo‘ldi,
So‘ng zambarak bo‘lib quyildi.
Qilich ham u,
miltiq
va nagan,
U bomba ham bo‘lib portlagan.
Lekin olgan jahonni faqat
Pero bo‘lib quyilgach po‘lat.

✍Erkin Vohidov

1959 yil
@Erkin_Vohidov

KAMTARLIK HAQIDA

Garchi shuncha magrur tursa ham,
Piyolaga egilar choynak.
Shunday ekan, manmanlik nechun,
Kibru havo nimaga kerak?

Kamtarin bol, hatto bir qadam
Otma gurur ostonasidan.
Piyolani inson shuning-chun
O`par doim peshonasidan.
1956

@Erkin_Vohidov

🍃🍃🍃O'n sakkizga kirmagan kim bor,
Bog'ingdan gul termagan kim bor?
Sen haqingda yozib to'rt satr,
Sirdoshiga asta ko'rsatib,
Qo'shni qizga bermagan kim bor?

Dastlab har kim qalam olgan on
Yonib seni kuylar begumon.
Maskan qurib har bir ko'ngildan,
Oshiqlarni qoldirib tildan,
Shoirlarni qilursan biyron.

Tushdim chog'i men ham domingga,
Ezgu hislar baxsh etding menga,
Hayotimga zar lavha bo'lding,
Ilk she'rimga sarlavha bo'lding,
Xayollarim ulfatdir senga.


Yuragimda his etdim qanot,
Tilsim kabi ochilur hayot,
Visoldagi damlarim shirin,
Hijrondagi g'amlarim shirin,
Kulib boqar menga koinot...

O'n sakkizga kirmagan kim bor,
Bog`ingdan
gul termagan
kim bor?...🌺🌸🌼

✍Erkin Vohidov

@Erkin_Vohidov

KUY AVJIDA UZILMASIN TOR

Kuy avjida uzilmasin tor,
She’r yarmida sinmasin qalam.
Yashab bo’lmay umrini zinhor
Bu dunyodan ketmasin odam.

Qo’ldan tushib sinmasin qadah,
Lab tekkanda to’kilmasin may.
To’xtamasin urib turgan qalb,
Boshlab qo’ygan qo’shig’i bitmay.

©Erkin Vohidov

@Erkin_Vohidov

O'CHIRG'ICH

She'riyatning timsoli-qalam,
U haqda-ku, she'rlar behisob.
Ey shoirlar, bitganda kitob,
Eslab qo'ying o'chirg'ichni ham.

Usiz bo'lmas she'ringiz ravon,
Usiz qilmas satrlar xanda.
Siz qalamga she'r ataganda,
O'chirg'ichga bag'ishlang doston.
✍E.Vohidov

@sherlarolamii

@Erkin_Vohidov

🌨🌨🌨Do'stlarimni hayron qoldirar
Ba'zan ishqiy she'rlar yozganim.
Hazilkashlar qo'ymasdan so'rar:
– Kuylaganing qaysi nozanin ?

Yo'q, dey desam, kulgi bo'laman,
Aldamoqni hech ko'rmayman ep.
Ne ham derdim, hazil qilaman,
Shoir hali izlanishda, deb…

✍Erkin Vohidov

@Erkin_Vohidov

O'zbek Navoiyni o'qimay qo'ysa...🕯🕯🕯

O'zbek Navoiyni o'qimay qo'ysa,
Oltin boshning kalla bo'lgani shudir.
Bedil qolib Demyan Bedniyni suysa,
Qora sochning malla bo'lgani shudir.

O'zbek Navoiyni o'qimay qo'ysa,
Dod demoqqa palla bo'lgani shudir.
Ma'rifatdan ayri o'ynasa, kulsa,
Aza chog'i yalla bo'lgani shudir.

O'zbek Navoiyni o'qimay qo'ysa,
Aldangani, alla bo'lgani shudir.
Yulg'ich aziz bo'lib, bilgich xor bo'lsa,
Paytavaning salla bo'lgani shudir.

El komil bo'lmasa, yurt emas ulug',
Beqadr mahalla bo'lgani shudir.
Qalb to'la nur xalqning rizqi ham to'lig',
Ombor to'la g'alla bo'lgani shudir.

O'zbek o'zligini anglasa bekam,
Uning "Barakalla" bo'lgani shudir.
Olamga Navoiy nasliman degan
Ovozi baralla bo'lgani shudir...

✍Erkin Vohidov

@Erkin_Vohidov

🌱🌱🌱
Yurtdoshim, bog‘ingga bir nihol qada,
Bu nihol nomini Yaxshilik ata.
Niholing yoniga bir gul ekib qo‘y,
U gulning ismini Go‘zallik deb qo‘y.

Gulu niholingga baxsh etib hayot,
Suv ber va bu suvga Mehr deb qo‘y ot.
Sendan farzandingga bog‘ qolsin, ey do‘st,
Bog‘ing Vatan degan nom olsin, ey do‘st...

✍Erkin Vohidov

@Erkin_Vohidov