በጨረቃ መሐል ሆኜ
ለፀዳልሽ ቆቤን ደፋው
ከብርሃና ሸማ አንስቼ
በመጠንሽ ቀሚስ ሰፋው
የወዟን ወንዝ ጨልፌባት
ግሩም ጠላ ጠምቂያለው
የማርያምን መቀነቷን
መንገድሽ ላይ አንጥፍያለው

ብቻ አንቺ ነይ


ሁሉን ነገር አዋቅሬ
በኮከብ ቤት ወርቅ አንጥሬ
ለመርገጫሽ ጉዝጓዝ ይዤ
መግቢያሽ ቦታ ጉም ወጥሬ
ፅዋ ቀዳው ከሰማዩ
አሰናዳው ድግስ ቤቴን
መቼም ውዴ ትመጫለሽ
ልትመስጫት አንደበቴን

ብቻ እሺ በይ

ብቻ አንቺ ነይ
መተሽ እይኝ ከድግሴ ተሳተፊ
ጠብቃለው መምጣሽን
ጎራ ሳትይ እንዳታልፊ

ይሄ ሁሉ አውደ ጥበብ
ይሄ ሁሉ ውቅረ ኹነት
ላንቺኮነው ለመምጣሽ
የሸመንኩት አውደ ነገስት


ይሄ ሁሉ ቃል ስደራ
የሌለ አለም ላንቺ ማኖር
ይሁንልሽ መገለጫሽ
አይመጥንሽ ምድር መኖር

ስለዚ
ግብዣዬን ከተቀበልሽ
ከተራመድሽ ወደኔ አለም
የጨረቃን ሸማ ቀሚስ
ልታደምቂው ሆነሽ ቀለም
ውል ልቶኚኝ ውል ልሆንሽ
አምነሽ መምጣት ብትጀምሪ
ፍቃዴ ነው በኔ አለም
ከኔ ውለሽ እንድታድሪ

ጠብቅሻለው እንዳትቀሪ