Ruh sinib, ko‘nglingga botsa-da tig‘lar,
Boshingga qadalsa nobakor tug‘lar,
Sendan, ayt, ertaga kimlar tug‘ilar?
O‘zbekning ayoli, sabringga qoyil!

Muhabbat - bu faqat orzu va armon,
Siniqsa yuraging, kim bo‘lar darmon?
Qo‘ling faqat yumush bilan andarmon,
O‘zbekning ayoli, sabringga qoyil!

Toptalgan nomuslar urdi ulusni,
Tunlari to‘kilgan yoshlaring rostmi?
Aybing etak to‘la tuqqaning qizmi?
O‘zbekning ayoli, sabringga qoyil!

Saharlab shomgacha halaksan, ayol,
Behalovat urgan yuraksan, ayol,
Shu holingda kimga keraksan, ayol?
O‘zbekning ayoli, sabringga qoyil!

Dodingni tinglasam, eziladi dil,
Yodingni eslasam, buziladi dil,
Yasha o‘zing uchun, harakating qil!
O‘zbekning ayoli, sabringga qoyil!

Shoir Jo‘qiy

SAFSATA