كلشي اخذ من السبي .. بس اظل بنت النبي
الدنيه انه الحَجبتها
بالحجـاب الـزيـنـبي
----------------------------------

لاتجرئون .. مــن تــذكــرون الجــره والــصار بــــيه
لاتجرئون .. (علي) خدري وعفتي (الزهره) الزچيه
لاتجرئون .. صـح مشــيت اويــه الشـمر انــي سـبيه
لاتجرئون .. لـــچــن خــــدر الدنـيه لابــسـته عـــليه

لا تـهـتكـون الـســتر .. ابخدري حيرت الخدر
خافو الله بالعقيـله
من يمر طاري العبي
----------------------------------

انه زينب .. كلي عـفه وهــاي عـــني مـو بعيـده
انه زينب .. اليذكر اسـمي كـون يتــوضه اريـده
انه زينب .. غايـب العـبـاس شـفــتوني وحـيده
انه زينب .. اشعر ابسـوط الشمر بشچم قصيده

انـه بــت البالنجـف .. زينب انه ام الشرف
المعارفنــي راح اگــله
الشرف ديني ومذهبي
----------------------------------

بت محمد .. النـبــي وامــي والـدي لــَمــن يگـــعدون
بت محمد .. امن اسمي جبرائيل يخجل من يذكرون
بت محمد .. طـولـــي ياهــالــناس بالله لاتــوصــفون
بت محمد .. تـره يـزعــل كــافـلي وبالــگمــر تــدرون

والـيـزعــل كـافــلـي .. منه شيخلصه وعلي
ابو راس الحار ينغر
من احلفه ابمعصبي
----------------------------------

من سبوني .. والله ادري الدنــيــه بچــاها مـــصابي
من سبوني .. ال امـيه اتــفــننــون هــمــه بــعــذابي
من سبوني .. كلشي من عندي وگع بس ظل حجابي
من سبوني .. طـولي ماشــافوه بــس شافــو سرابي

چنت عالناگه ضوه .. وستحه مني الهوه
الله مايرضاها امشي
انــي ويــه الاجـنبي
----------------------------------

راسي عالي .. ظنهم ايـذلوني ابــرحله طـويله
راسي عالي .. وانه ادري ابها المصيبه مو قليله
راسي عالي .. چنـت بس بالليـل المــدمع اسيله
راسي عالي .. حـتى ميگــولون زينــبكم ذلـيله

چنت من ابچي همس .. بيــه لا واحـد يحس
لايشوفون المدامع
الطغــاة ابمــوكــبي
----------------------------------

لاتسألون .. مـنو هـاذي عالهـزل يانــاس كـافي
لاتسألون .. لايـفز راس الاخـو الـعالرمـح غـافي
لاتسالون .. الـشام مــن طبيـته حيرته ابعـفافي
لاتسألون .. زينــب وتسبـيحة الزهـره ابشـفافي

نـَزلت روس الزلم .. وشامهم ظـلت اسم
انتهت لمَن صحت بيها
هــا يــشــام اتـهــذبــي
----------------------------------
حيدر تركي الكربلائي