معرفتك لقيمة نفسك، وإبتعادك عن كل زاهد فيك، تنبيشك على علامات الصح الي فيك وتجاهلك لكل حاجة غلط -من باب جل من لا يخطئ- ، دعمك لنفسك في الوقت الي هلبا يدين رخاتك، وكيف ولعت شمعة لروحك وضويت بيها ظلامك.. ماستنيتش حد يمن عليك بضيه

رحلتك في الطريق المعاكسة، والي كل الظروف تقول إنها الصح لكن الناس تحب تلحق القطيع..
انت بروحك
الوحيد ..
الي اختار وماتبعش !

تصفيقك لإنجازاتك، وخلقك للفرص من العدم، ضحكتك الي هربتها من بين هلبا وجع، ودمعتك الي شديتها باش أمك ماتنشغلش، عينك الي شافت للجزئ المعبي من الطاسة، وعقلك الي ميز الحكمة من الشدائد، محاولتك الناجحة بعد هلبا منها فاشلات ..

كلهم حاجات صنعوا منك بطل، حتى لو مش في عيوننا .. في عين نفسك !