م/ العلاقات والمصالح أهم من الجرايد...
كلش افرح من اشوف احد دازلي قصة او موضوع بحياته او شيء يريد يفيدكم بيه وكاتبلي كل تفاصيل بدون خوف مني بل احس يشاركني الثقة لكن اني ماحب اشارك هالقصص نصاً لهواية اسباب.. لازم تعرف قبلها ان محد يحب / يثق / يأمن على شخص فتان او "ميظم بحلكَه حچاية" اذا تريد انت توصل صدكَ لمستويات اعلى لازم تحفظ اسرار الناس تماماً واول شيء تسوي هو انك تحفظ سرك...
لازم تعرفون ان البوستات الانشرها منقحة تماماً او أحيانا محرفة او منقولة بتصرف حتى ما خليكم تعرفون أصحابها الأصليين تحديداً اللي تتعلق بالعراق وبلاويه. ليش ؟
اولاً حتى ما أضر نفسي او اثر على علاقتي بالناس هذولة حتى لو كانوا غلطانين وانتوا نفس الشيء لازم تسووه مصالحكم ملها دخل بالأمور تنشروها وتفيدون بيها حواليكم.
ثانياً انت من رح تفضح الناس مارح تستفاد شيء لا انت عندك قوة تغيير ولا انت تريد تجيب مشاكل لنفسك ف الحل هنا هو انك تحافظ على مصالحك من خلال فقط ماتذكر لا مصادر ولا أسماء. بالنهاية القارئ المقابلك اذا حب يصدكَ او ميصدكَ انت ملك دخل بام تفكيره انت جاي تفيد المقابل بالمعلومة حتى لو كانت بصيغة إشاعة.
على سبيل المثال اني احجي عالجيوش الالكترونية بس هذه مو يعني ان ما عندي أصدقاء او ناس تعاملت وياهم قبل واكتشفتهم يشتغلون بهاي الجيوش.. هل افضحهم هل اصير ضدهم ؟ لا طبعاً 100% ملي دخل بام الموضوع كل اللي اسوي اجي انشرلك يابه اكو هيج وهيج بالعراق انت اقتنعت مقتنعة ملي دخل بباجر عكَبة تصير شيء واضح وبوكتها تكَول فلان كللنا بفلان سنة. وبالمناسبة هواية أمور اني احجي عنها أصحابها القاصدهم متابعين الصفحة مثل موضوع الجيوش الالكترونية مالي اي دخل بيهم او أكون ضدهم لأني من لحظة قررت اسافر ملي دخل تماماً اني كمهاجر احتاج حلفاء وليس أعداء على حساب بلد منتهي تماماً.
ثالثاً علاقاتك ومصالحك المشتركة اللي تبنيها لا تدخلها ب أم أرائك الشخصية.. انت تشوفني انشر لك هنا وانتقد هواية أمور على سبيل المثال دينية و عقائدية عبالك اني هيج دائما او ويه الكل ف انت غلطان كلش غلطان... اني لو هيج اعامل الكل جان بعدني اطرش بالزفة مثل اغلب الحوالينا.. احنا هنا ننشر آرائنا اللي ضميناها بكَلبنا وماكَدرنا نشاركها لأنها تأثر على مصالحنا وانت هيج لازم تسوي لهذا دائما انصح سوولكم كلكم منصة او مكان تشاركون بيه ارائكم لان الموضوع فعلاً ياثر على نفسيتك اذا تظل هيج كاتم ارائك بغطاء مجاملة...
مصلحتك يم شيعي سني مسلم مسيحي يهودي هندوسي نتفلكساوي فيمنسط فاسد مرتشي.. امشي وياهم حسب مزاجهم قدر الإمكان في سبيل مصالحك لآن رائييك بهالبقعة مارح يحدث اي تغيير بحجمك الحالي... وايضاً لان بكل بساطة هذه هي الحياة ارائك الشخصية اذا تعرضها عالمقابل كل شيء متحصل تـ!كل خرا بالنهاية.. كل شيء متوصل.. الكل يصير ضدك.. العاهة الموجودة بمجتمعنا ان محد يحب يكون قريب من المختلف عنه..
لهذه السبب اني بالسنوات الاخيرة اكتشفت بعد ماحب استخدم فيسبوك باسمي ابداً او تحديداً ماضيف اي احد قريب عليه لأني بوكتها رح اكون صنم مثل اكثر حساباتكم الشخصية اللي ماتكَدرون تتصرفون بيها بحريتكم خوفاً من العندكم مصالح مشتركة وياهم سواء أهلكم, اصدقائكم, معارفكم, زملائكم بالشغل كل هذولة اذا شافوا شذوذ بافكاركم عن القطيع مالتهم رح يعتبروكم شيء خطر او تحديداً رح ينبذوكم واذا صار فديوم عندكم مصلحة تعتمد عليهم ف مارح يختاروكم ابداً ابداً وبهالحالة رح تخسر هواية امور وفرص فقط لأنك كنت صريح بافكارك بينما حقيقة المجتمع ميحب الصراحة ابداً ابداً واللي يكون صريح من صدكَ تنقهر على حالة...
لهالسبب اني هسه مستعد احچيلك على كل شيء فقط ما اذكر مصدر ولا اؤثر على مصالحي وبهالحالة اني رح افيدك وبنفس الوقت ما أضر نفسي. بينما من تدزلي جريدة عن حياتك ذاكر بيها أسماء وصلة قرابة وتفاصيل خاصة ممكن تكشفك هنا انت اللي رح تتاذة علمود كم لايك نحصلة بلبيج احنا ما مهتمين بيه. لهذه السبب اني انقح واخفي كل أمور ننشرها ولازم تحترمون هالشيء لصالحكم حتى باجر عكَبة انتو همين تشاركون تجاربكم المفيدة ويه البقية هنا.
// اكو احد شباب دزلي مسج من فترة كاتب بوستاتك حلوة بس مانكَدر نشاركها.. عزيزي بوست فوكَ هو جواب الك ماتكَدر تشاركها لان حسابك الخاص مو الك والدليل انت دتشوفها حلوة بس ماعندك حرية بالرأي لهذه سبب متكَدر تشاركها خوفاً من نقد معارفك وتأثيرهم على مصالحك واني مثل مكَتلك هاي بوستات هي ارائي شخصية انشرها ف مارح امشيها على حسب مصالح لكن اذا تواجهنا ببزنز او مصلحة مستقبلية رح تشوفني مراية الك انت ومعارفك شيحبون اني احب وبوكتها رح تشارك بوست بكل اريحية امام أبراج المراقبة حواليك...
