Daʼvo
Amirga

Dunyo chiqdi koʻzin suzib qarshimizga,
Qaramadik, dunyosi ne boʻpti bizga?

Samo tushdi poyimizga yulduz sochib,
Yoʻq, dedik yoʻq, somon yoʻldan ketdik qochib.

Oq badanin koʻz-koʻzlab oy,
izimizni
Topib keldi,
oʻyib berdik koʻzimizni.

Hurlar oʻtdi jilva qilib, isyon boʻylik,
Dimogʻimiz alaf birlan boʻgʻib qoʻydik.

Chiqolmasin hech kim, boylab qoʻlimizni,
Poyimizdan yulib otdik yoʻlimizni.

Bizga bir Ishq kerak edi, birgina Ishq,
Boshimizga tushsa shul deb, xoʻp, necha ish.

Dunyo kuldi qarab rang-u roʻyimizga,
Kiritmadik ammo hargiz Oʻyimizga.

Shodlandilar, koʻksimizni tilib-tilib,
Ulab-ulab sitam chekdik, nashʼa qilib.

Boshimizning umri o'tsun shu sirtmoqda,
Ne tong, samo Koʻngil sendan Balandroqda!!!

04.09.2019

@jaloliddinsayid