‍ЖАВОБГАРЛИК

Ўпилмаган лаблар
Силанмаган сочлар
Эгалланмаган қалблар
Суянилмаган ёғочлар
Ҳар тун бағрини очиб ташрифим кутгувчи
Аммо мен ҳатто қаерда эканини билмайдиган
Дераза
Ғижимланмаган чойшаб
Босиб ўтилмаган йўл
Кўрилмаган тушлар
Тугилмаган муштлар
Йўлиққилмаган тасодифлар
Чекилмаган азоблар
Айтилмаган фикр
Фойдаланилмаган журъат
Занглаган қилич
Минилмаган от
Ҳатто қийноққа солишганда
Баралла айтилмаган ДОД
Тўкилмаган кўзёшлар
Тушилмаган чоҳ
Вақтида эсланмаган Аллоҳ
Эхтироссиз ўтган ҳар бир тун
Совиб қолган ўч
Олинмаган хун
Ҳарид қилинмаган билетлар
Бўшатилмаган қадаҳлар
Қилинмаган гуноҳлар
Қондирлмаган хоҳиш
Барҳам топган соғинч
Кулга тўймаган кулдон
Охирига етмай чертиб юборилган тамаки қолдиқлари
Чўлоқ кресло
Тегмаган қарғиш
“Мен албатта қайтаман”
Ёлғонига лаққа тушган қишлоқ
Ёзилмаган шеър
Висолсиз ўтган 16 ёшим
Мағрур тикилганча кутиб олинмаган
Ҳар бир тонг
Ва яна минг-минглаб
…лар олдида
Жавоб бераман ҳали
Ҳа, ҳа…
Сония бўлсин ўзини қанот дея ҳис этмаган қўллар
Босилмаган тепки
Ютиб юборилган
Ёки
Тупуриб ташланган ҳақиқат
Бузиб ўтилмаган деворлар қаршисида
Қўрқоқ юрагим билан
Жавоб беражакман...

Жонтемир

@Jontemir_t