Жамолиддин Муҳаммаджон

Агар мусулмон билан кофир сувга тушиб кетса, сузишни билган тирик қолади.

Аллоҳ "Ўқи" деди, биз ўқимадик ва чўкяпмиз.

Биз ўзимиз гуноҳ қилганимизда: "Аллоҳ таоло кечиримли Зот", деб, бировнинг гуноҳига "Аллоҳнинг азоби шиддатлидир!", дейдиган кишилармиз.

2008-йил..

Чорсудаги "Хўжа Аҳрор Валий" масжиди ёнидаги кичкина дўкончадан китоблар сотиб олдим.

"Тафсири Ҳилол" тўплами, "Ҳадис ва ҳаёт" тўплами, "Кифоя" тўплами, "Одоблар хазинаси", "Руҳий тарбия", "Иймон", "Васатия-ҳаёт йўли" яна бошқа китоблар ҳам. Юким шу қадар оғир, лекин пулим фақат "маршрутка"га етади. Китобларни ортиб, ўзим ҳам жойлашиб олдим.

Ўша пайтда бор пулимга китоб олганимдан шунақа севиндимки...

Китоб дўконларини айланишни, китоб харид қилишни севардим. Ҳозир китоб дўконим ва катта жамоам бор. Дўкон ичида ўзимни шунақа яхши ҳис қиламанки, буни сўз билан ифодалаб беролмайман.

Китобларни растага жойлаш, харидорларга излаган китобини топиб бериш, тавсия қилиш, дўкондан чиқиб кетишигача кузатиб қўйиш, ҳаммасидан завқланаман.

Ўзим севган касбда ишлатиб қўйгани учун Ўзига беадад ҳамд бўлсин.